ខេត្តស្វាយរៀង ៖ ក្មេងប្រុសជំទង់ដែលល្បីល្បាញខាងលួចមិនរើសមុខ និងធ្វើឱ្យអ្នកភូមិព្រៃញ៉យ ឃុំក្រោលគោ ស្រុកស្វាយជ្រំ ដេកមិនលក់ ត្រូវសមត្ថកិច្ចចាប់បានកាលពីថ្ងៃទី២១ ឧសភា ។ ក្មេងជំទង់រូបនេះឈ្មោះ ថន ស៊ីណាត អាយុ១៦ឆ្នាំ មានទីលំនៅភូមិព្រៃញ៉យ ឃុំក្រោលគោ ស្រុកស្វាយជ្រំ ។
លោកវរសេនីយ៍ទោ សួស សារិន នាយការិយាល័យព្រហ្មទណ្ឌកម្រិតស្រាលស្នងការនគរបាលខេត្តបានប្រាប់ឱ្យដឹងថា ឈ្មោះ ថន ស៊ីណាត នេះបានធ្វើសកម្មភាពលួចទ្រព្យសម្បត្តិប្រាក់កាសរបស់លោកសុិន ឈុំសារឿន អាយុ៥២ឆ្នាំ ជាគ្រូបង្រៀននៅភូមិកើតហេតុខាងលើ កាលពីថ្ងៃទី២១ ឧសភា វេលាម៉ោង៩និង៣០នាទីព្រឹក ដោយយកបានប្រាក់ចំនួន២៤ម៉ឺនរៀល និង១០ដុល្លារ ខណៈពេលម្ចាស់ផ្ទះទៅបង្រៀន គ្មានមនុស្សនៅផ្ទះ ប៉ុន្តែត្រូវបានអ្នកជិតខាងឃើញហើយក៏ប្តឹងសមត្ថកិច្ចឱ្យព័ទ្ធចាប់ខ្លួនបានភ្លាមៗតែម្តង ។
លោកសួស សារិន បន្តទៀតថា ក្រោយពីធ្វើការសាកសួរ ក្មេងប្រុសជំទង់រូបនេះបានសារភាពនៅចំពោះមុខសមត្ថកិច្ចថា ខ្លួនធ្លាប់ធ្វើសកម្មភាពលួចប្រាក់នៅផ្ទះជនរងគ្រោះបានចំនួន៤លើកមកហើយ ។ក្រោយពេលចាប់ខ្លួន សមត្ថកិច្ចបានកសាងសំណុំរឿងបញ្ជូនទៅសាលាដំបូងខេត្តស្វាយរៀង ហើយក៏ត្រូវតុលាការបានចេញដីកាឃុំខ្លួនបណ្តោះអាសន្ននៅពន្ធនាគារខេត្តនាល្ងាចថ្ងៃទី២២ ឧសភា ៕
ចែករំលែកព័តមាននេះ