ខេត្តក្រចេះ ៖ ថវិកាចំនួន១០ម៉ឺនរៀល ដែលកោះសន្តិភាពទទួលពីសប្បុរសជន បាននាំយកទៅប្រគល់ជូនលោកយាយ អ៊ំ ម៉ៅ អាយុ៦៤ឆ្នាំ ដែលអ្នកភូមិចាត់ទុកថាជាជនទុរគតរស់នៅឯកោគ្មានទីពឹង និងចិញ្ចឹមចៅប្រុសស្រី៤នាក់ ហូបតែបាយស្រូបទឹកអំបិលមានរយៈពេលជាង៤ឆ្នាំមកហើយ ។ កន្លងទៅថ្មីៗនេះ លោកយាយ និងចៅៗក៏បានទទួលការធ្វើអំណោយទានជាបន្តបន្ទាប់ពីសប្បុរសជនគ្រប់ទិសទី និងបានស្រោចស្រង់ទុក្ខវេទនានៃជីវិតអភ័ព្វនេះ ។
ថវិកាចំនួន១០ម៉ឺនរៀលនេះជាអំណោយរបស់អ្នកស្រី ឯម ណាវី បុគ្គលិកកំពង់ផែស្វយ័តក្រុងព្រះសីហនុ ត្រូវបាននាំយកទៅប្រគល់ជូនដល់ដៃលោកយាយ អ៊ំ ម៉ៅ និងចៅប្រុសស្រីទាំង៤នាក់ ដែលកំពុងតែស្នាក់នៅផ្ទះអ្នកភូមិមួយក្នុងភូមិគោលាប់ ឃុំគោលាប់ ស្រុកចិត្របុរី កាលពីព្រឹកថ្ងៃទី២២ ឧសភា ។
ជីដូនវ័យចំណាស់ឈ្មោះ អ៊ំ ម៉ៅ បានតស៊ូចិញ្ចឹមចៅប្រុសស្រីទាំងលំបាកវេទនា ក្រោយពីកូនស្រីបង្កើតរបស់គាត់បានលែងលះគ្នាជាមួយប្តីហើយទៅធ្វើការនៅប្រទេសម៉ាឡេស៊ីបាត់ជាច្រើនឆ្នាំគ្មានដំណឹង រីឯកូនប្រសាប្រុសជាឪពុក ពួកគេក៏បានស្លាប់បាត់បង់ជីវិតនៅឯខេត្តកំពង់ចាម បន្ទាប់ពីយកប្រពន្ធក្រោយមួយទៀតរួចមក ។ អ្នកភូមិនិយាយថា ដោយមើលឃើញពីភាពក្រលំបាកតោកយា៉ករបស់ជីដូនចំណាស់ដែលខ្លួនគាត់មានជំងឺ និងប្រឹងចិញ្ចឹមចៅប្រុសស្រីទាំងបួននាក់ស្នាក់អាស្រ័យនៅលើក្បាលដីកប់ខ្មោចមួយកន្លែងនៅចុងភូមិយ៉ាងកណ្តោចកណ្តែង ទើបពួកគាត់បានឱ្យផ្ទះឈើទ្រុឌទ្រោមមួយខ្នងនៅភូមិគោលាប់ ឃុំគោលាប់ ស្រុកចិត្របុរី ស្នាក់នៅបណ្តោះអាសន្នមានរយៈពេលជាច្រើនឆ្នាំមកហើយ ។
ទោះបីជាយ៉ាងណា បច្ចុប្បន្នជីដូនរូបនេះ និងចៅប្រុសស្រីទទួលបានការហូបចុកគ្រប់គ្រាន់ ហើយដោយមានអង្ករ និងសម្ភារៈ គ្រឿងឧបភោគបរិភោគមួយចំនួនទៀតនៅលើផ្ទះសម្រាប់ទុកទទួលទាន ដែលជាការជួយឧបត្ថម្ភពីសប្បុរសជននានា បន្ទាប់ពីសប្បុរសជនមើលឃើញ អំពីទុក្ខលំបាកនៃជីវិតទុរគតរបស់លោកយាយដែលខំប្រឹងចិញ្ចឹមចៅៗប្រុសស្រីទាំងបួននាក់ រស់ទាំងត្រដរនោះ ។
លោកយាយ អ៊ំ ម៉ៅ មានប្រសាសន៍ថា សព្វថ្ងៃនេះចៅៗប្រុសស្រីចំនួន៣នាក់ បានទៅរៀនសូត្រនៅសាលាដោយមានសៀវភៅ ក្តារគ្រប់គ្រាន់នឹងគេ ខុសពីឆ្នាំមុននាគ្រាដើមរដូវវស្សា ពួកគេពុំបានទៅរៀនទេ គឺដើរតាមមាត់ព្រែកអូរនៅខាងក្រោយភូមិដើម្បីរកកង្កែប និងក្តាមខ្យង សម្រាប់ធ្វើម្ហូបហូប និងលក់យកលុយទិញអង្ករខ្លះ ។
លោកយាយមានប្រសាសន៍ទៀតថា អ្វីដែលប្រឈមមុខសព្វថ្ងៃនេះគឺគាត់មានការលំបាកនៅពេលមេឃភ្លៀងខណៈដែលដំបូល និងជញ្ជាំងផ្ទះឈើប្រក់ស្បូវមួយខ្នងរបស់អ្នកភូមិដែលគាត់សុំស្នាក់នៅបណ្តោះអាសន្ននេះ បានធ្លុះធ្លាយអស់មួយចំនួនទៅហើយ ធ្វើឱ្យទឹកភ្លៀងលិចបាចសាចមិនអាចសម្រាកបាន ៕
ចែករំលែកព័តមាននេះ