ខេត្តព្រះសីហនុ ៖ នៅសាលប្រជុំនៃសាកលវិទ្យាល័យឡាយហ្វខេត្ត នារសៀលថ្ងៃទី២១ ឧសភា មានរៀបចំពិធីប្រឡងអាននិងច្រៀងចម្រៀងជាភាសាកូរ៉េ មានច្រៀងទោល និងច្រៀងជាក្រុមដែលមានបេក្ខជន បេក្ខនារីចូលរួមប្រឡងចំនួន៣០នាក់ ជានិស្សិតឆ្នាំទី១ និងទី៤ មកពីមហាវិទ្យាល័យផ្សេងៗគ្នានៃសាកលវិទ្យាល័យឡាយហ្វ ។
ពិធីនេះបានប្រព្រឹត្តទៅក្រោមអធិបតីភាពលោក ដេវីដ ឃូ សាកលវិទ្យាធិការនៃសាកលវិទ្យាល័យឡាយហ្វ លោកស្រី ឈីង ស៊ុកសុង សាកលវិទ្យាធិការរង លោកព្រឹទ្ធបុរសឈុន វុងយូន គ្រប់គ្រងមហាវិទ្យាល័យសិល្បៈមនុស្សសាស្រ្តនិងភាសាកូរ៉េ លោកលឹម ប្យុងជេ ប្រធានដេប៉ាតឺម៉ង់ភាសាកូរ៉េ និងទទួលបានការចូលរួមដោយនិស្សិតនៅក្នុងសាកលវិទ្យាល័យឡាយហ្វ យ៉ាងច្រើនកុះករ ។
លោកដេវីដ ឃូ ឱ្យដឹងថា ក្នុងកម្មវិធីប្រឡងអាននិងច្រៀងចម្រៀងជាភាសាកូរ៉េនាពេលនេះគឺក្នុងគោលបំណងដើម្បីឱ្យបេក្ខជន បេក្ខនារីជានិស្សិតបានបញ្ចេញសមត្ថភាពរបស់ខ្លួនក្នុងការអាននិងស្តាប់បានត្រឹមត្រូវទៅតាមវេយ្យាករណ៍ភាសាកូរ៉េ ។ បង្កើតភាពរីករាយដល់និស្សិតនៅក្នុងសាកលវិទ្យាល័យឡាយហ្វ និងបានបង្ហាញពីក្តីស្រលាញ់របស់ព្រះជាម្ចាស់ ។ លោកសាកលវិទ្យាធិការបានបញ្ជាក់ឲ្យដឹងទៀតថា លទ្ធផលនៃការប្រឡងខាងលើនេះ និស្សិតជាបេក្ខជន-បេក្ខនារីដែលចូលរួមប្រឡងអានភាសាកូរ៉េទទួលបានចំណាត់ថ្នាក់ពីលេខ១ដល់លេខ៤ ទទួលបានរង្វាន់លើកទឹកចិត្តជាប្រាក់ ។ ចំណាត់ថ្នាក់លេខ១ ទទួលបានប្រាក់៣០ដុល្លារអាមេរិក លេខ២ទទួលបានប្រាក់២០ដុល្លារអាមេរិក លេខ៣ទទួលបានប្រាក់១០ដុល្លារអាមេរិក និងលេខ៤ទទួលបានប្រាក់៥ដុល្លារអាមេរិក ។ លោកបន្តទៀតថា និស្សិតដែលជាប់ចំណាត់ថ្នាក់ទាំងអស់ត្រូវបានលើកទឹកចិត្តផ្តល់អាទិភាពជំរុញឲ្យខិតខំរៀនភាសាកូរ៉េបន្ថែមទៀត និងអាចចេញទៅសិក្សានៅប្រទេសកូរ៉េបានថែមទៀតផង ។
ដោយឡែកបេក្ខជន-បេក្ខនារីដែលជានិសិ្សតប្រឡងចម្រៀងភាសាកូរ៉េក៏កំណត់យកចំណាត់ថ្នាក់ និងរង្វាន់លើកទឹកចិត្តដូចគ្នានឹងការប្រឡងអានភាសាកូរ៉េខាងលើនេះដែរ ។ ចុងបញ្ចប់កម្មវិធីប្រឡងក៏មានរៀបចំពិធីចាប់ឆ្នោតយករង្វាន់មានសៀវភៅ ប៊ិក ឃីបត ដើម្បីបង្កើតបរិយាកាសសប្បាយរីករាយជូនដល់និស្សិតនៅក្នុងសាកលវិទ្យាល័យឡាយហ្វទាំងមូលផងដែរ ៕
ចែករំលែកព័តមាននេះ