បុរសម្នាក់ដែលគេសួរចម្លើយកាលពីព្រឹកថ្ងៃទី២២ ឧសភា នៅអ័រឡានដូ រដ្ឋផ្លរីដា ដោយសាររូបគេជាប់ទាក់ទិនជាមួយការស៊ើបអង្កេតលើការវាយប្រហារភេរវកម្មនៅក្រុងបូស្តុន ត្រូវបានសម្លាប់ពេលមានការប៉ះទង្គិចគ្នាមួយជាមួយកងកម្លាំងសន្តិសុខ ។
ប៉ូលិសសហព័ន្ធ FBI និយាយថា ភ្នាក់ងារ FBI ប៉ូលិស២នាក់នៃរដ្ឋម៉ាសាជូសេត និងតំណាងឯទៀតៗរបស់កងកម្លាំងសន្តិសុខកំពុងសួរចម្លើយជនម្នាក់ ដែលទាក់ទិននឹងការស៊ើបអង្កេតលើការវាយប្រហារភេរវកម្មប្រឆាំងការរត់ប្រណាំងម៉ារ៉ាតុងនៅក្រុងបូស្តុន ស្រាប់តែជននេះបង្កការប៉ះទង្គិចគ្នាមួយ ។ បុរសរូបនេះត្រូវសម្លាប់ពេលមានការប៉ះទង្គិចគ្នានោះ ហើយភ្នាក់ងារប៉ូលិសម្នាក់ត្រូវរបួសស្រាល ។
យោងតាមទូរទស្សន៍អាមេរិក NBC ថា បុរសឈ្មោះអីុប្រាហ៊ីម សូដាសេវ អាយុ២៧ឆ្នាំ មានដើមកំណើតេឆតឆេនី តាមពិតមានកាំបិតមួយដែលគេប្រើវាយប្រហារលើប៉ូលិសពេលសួរចម្លើយ ។ ជននោះជាមនុស្សស្គាល់គ្នាជាមួយ TAMERLAN TSARNAEV មានដើមកំណើតឆេតេឆនីដែរ ជាជនសង្ស័យវាយប្រហារកាលពីថ្ងៃទី១៥ មេសា បណ្តាលឱ្យមនុស្សស្លាប់៣នាក់ និងរបួស២៦៤នាក់ ។
TAMERLAN TSARNAEV អាយុ២៦ឆ្នាំ និងប្អូនប្រុសគេឈ្មោះ DJOKHAR អាយុ១៩ឆ្នាំ ជាជនសង្ស័យធ្វើឱ្យផ្ទុះគ្រាប់បែកច្នៃ២គ្រាប់កាលពីថ្ងៃទី១៥ មេសា នៅជិតកន្លែងដល់ទីនៃការរត់ប្រណាំងម៉ារ៉ាតុងប្រចាំឆ្នាំនៅក្រុងបូស្តុន ។ TAMERLAN ត្រូវសម្លាប់ពេលតតាំងជាមួយប៉ូលិសកាលពីថ្ងៃទី១៨ទៅ១៩ មេសា ហើយប្អូនប្រុសគេក្រោយមកត្រូវចាប់ខ្លួនទាំងរបួសធ្ងន់ ៕
ចែករំលែកព័តមាននេះ