យោងតាមទិន្នន័យពីរដ្ឋាភិបាលបានបង្ហាញថា ឱនភាពពាណិជ្ជកម្មរបស់ជប៉ុនបានកើនឡើងធ្ងន់ធ្ងរជាងការរំពឹងទុកចំនួន៧០% ដល់៨,៦ពាន់លានដុល្លារកាលពីខែមេសា គ្រាដែលការធ្លាក់ថ្លៃនៃប្រាក់យ៉េនបានធ្វើឱ្យការនាំចូលខាតបង់ប្រាក់ជាច្រើន ។
យោងតាមទិន្នន័យរបស់ក្រសួងហិរញ្ញវត្ថុបានបង្ហាញថា ឱនភាពពាណិជ្ជកម្មប្រចាំខែបានឈានដល់៨៧៩,៩ពាន់លានយ៉េន (៨,៦ពាន់លានដុល្លារ) កើន៦៩,៧% ខ្ពស់ជាងឱនភាពកាលពីឆ្នាំកន្លងទៅដែលមានចំនួន៥១៨,៤ពាន់លានយ៉េន ។ ការនាំចេញកាលពីខែមេសាបានកើនឡើង៣,៨% ដល់ ៥,៧៨លានលានយ៉េន ខណៈដែលការនាំចូលកើន៩,៤% ដល់៦,៦៦លានលានយ៉េន ។
អត្រាមធ្យមរបស់ប្រាក់យ៉េនមានតម្លៃ៩៦,០១យ៉េនក្នុងមួយដុល្លារកាលពីខែមេសា ធៀបនឹង៨២,៣១យ៉េនក្នុងមួយដុល្លារកាលពីខែមេសា ឆ្នាំ២០១២ ។ នេះមានន័យថា តម្លៃរូបិយប័ណ្ណយ៉េនធ្លាក់ចុះរហូតដល់ជិត១៧% ។ ជាទូទៅការធ្លាក់ថ្លៃនៃប្រាក់យ៉េនបានជួយដល់ក្រុមហ៊ុននាំចេញ ប៉ុន្តែជំរុញឱ្យរូបិយប័ណ្ណនាំចូលឡើងខ្ពស់ ។ជាមួយនឹងការធ្លាក់ថ្លៃនៃប្រាក់យ៉េនជាច្រើនឆ្នាំធៀបនឹងប្រាក់ដុល្លារ បណ្តាអ្នកនយោបាយជាច្រើនបានចាប់ផ្តើមបង្ហាញនូវក្តីបារម្ភចំពោះផលប៉ះពាល់អវិជ្ជមានលើការរស់នៅរបស់ប្រជាជន ៕
ចែករំលែកព័តមាននេះ