អ៊ែនឌី មូរ៉េ បានប្រកាសឱ្យដឹងកាលពីថ្ងៃអង្គារទី២១ ឧសភា ថា ខ្លួននឹងមិនទៅចូលរួមព្រឹត្តិការណ៍វាយកូនបាល់ក្របខ័ណ្ឌ French Open ដែលនឹងចាប់ផ្តើមនៅថ្ងៃអាទិត្យចុងសប្តាហ៍នេះនៅទីក្រុងបា៉រីស ប្រទេសបារាំងនោះទេ ពោលគឺបន្ទាប់ពីរបួសខ្នងរបស់គេដែលបានកើតមានកាលពីសប្តាហ៍កន្លងទៅនៅមិនទាន់ជាសះស្បើយ ។
ការសម្រេចចិត្តដកខ្លួនរបស់កីឡាករលំដាប់ទី២ពិភពលោករូបនេះបានកើតមានក្រោយពីការពិគ្រោះយោបល់ជាមួយវេជ្ជបណ្ឌិតជំនាញ ។ គេបានបញ្ជាក់ថា ការដកខ្លួនពី French Open គឺដើម្បីព្យាបាលរបួសឱ្យជាសះស្បើយ១០០%ទាន់ការចូលរួមក្នុងក្របខ័ណ្ឌធំ Wimbledon នៅប្រទេសអង់គ្លេស ។ បើគិតពីក្របខ័ណ្ឌធំ Wimbledon ឆ្នាំ២០០៧ មក នេះជាលើកទី១ហើយដែលមូរ៉េអវត្តមានពី French Open ។ គោលដៅចម្បងរបស់កីឡាករអង់គ្លេសរូបនេះក្នុងពេលនេះគឺព្យាបាលខ្លួនឱ្យជាហើយត្រៀមដណ្តើមយកជ័យជម្នះនៅទីលាន Queens Club ថ្ងៃទី១០ខែក្រោយឱ្យខាងតែបាន ៕
ចែករំលែកព័តមាននេះ