ក្រុងប៉ោយប៉ែត ៖ រថយន្តកាមរីស៊េរីឆ្នាំ១៩៩៥មួយគ្រឿង បើកបរមានគ្រោះថ្នាក់ចរាចរណ៍២លើកបន្តបន្ទាប់គ្នាភ្លាមៗ នៅលើផ្លូវបេតុងមួយលើក និងលើកផ្លូវជាតិលេខ៥មួយលើក ស្ថិតក្នុងក្រុងប៉ោយប៉ែត កាលពីយប់ថ្ងៃទី២១ ឧសភា ។
ប្រភពពីមន្ត្រីអាវុធហត្ថឱ្យដឹងថា គ្រោះថ្នាក់ចរាចរណ៍លើកទី១ កើតឡើងនៅលើផ្លូវបេតុង ស្ថិតក្នុងភូមិក្បាលស្ពាន ដោយរថយន្តកាមរីស៊េរីឆ្នាំ១៩៩៥ ពណ៌ស ពាក់ស្លាកលេខព្រះសីហនុ 2A-0313 បើកជ្រុលកៀររថយន្តកាមរីបាឡែនក្នុងដំណើរបញ្ច្រាសទិសគ្នា បណ្តាលឱ្យរថយន្តបាឡែនបែកកញ្ចក់ខាងឆ្វេង នៅវេលាម៉ោងជិត៨យប់ រួចរថយន្តកាមរីខាងលើ បើករត់ទៅទិសខាងកើត ដោយរថយន្តបាឡែនបើកដេញពីក្រោយឱ្យទទួលខុសត្រូវ ។ ពេលនោះរថយន្តកាមរីស៊េរីឆ្នាំ១៩៩៥ បើកលឿនជ្រុលទៅបុកម៉ូតូមា៉កសង់ស៊េរីឆ្នាំ២០០៣ ពណ៌ខ្មៅ ចំពីក្រោយ ដែលកំពុងធ្វើដំណើរលើផ្លូវជាតិលេខ៥ ស្ថិតក្នុងភូមិអូរជ្រៅ បណ្តាលឱ្យជនរងគ្រោះ២នាក់ឪពុកកូន ដួលរងរបួស ត្រូវរថយន្តឯកជនទៅព្យាបាលនៅគ្លីនិកក្រុងសេរីសោភ័ណ ។
ជនរងគ្រោះដែលបើកម៉ូតូឈ្មោះ ស៊ីន សិរីរិទ្ធ ភេទប្រុស អាយុ៤៦ឆ្នាំ និងកូនស្រីឈ្មោះ រ៉ាទី អាយុ១២ឆ្នាំ មានលំនៅភូមិបាលិលេយ្យ២ ។ រថយន្តកាមរីក្រោយពីកៀររថយន្តបាឡែន និងបុកម៉ូតូហើយ បានបើករត់ទាំងបែកកង់មុខខាងស្តាំយកទៅចតចោល ចម្ងាយពីកន្លែងកើតហេតុជិត៣គីឡូម៉ែត្រ ត្រូវមន្ត្រីអាវុធហត្ថក្រុងប្រទះឃើញ និងស្ទូចយកទៅរក្សាទុកនៅទីបញ្ជាការអាវុធហត្ថក្រុង ដើម្បីឱ្យអ្នកបើកបរចូលដោះស្រាយតាមផ្លូវច្បាប់ ៕
ចែករំលែកព័តមាននេះ