រាជធានីភ្នំពេញ ៖ រថយន្តឡិចស៊ីសប្រភេទ RX 330 ពណ៌ស្ករ ពាក់ស្លាកលេខភ្នំពេញ 2P-5956 ជិះដោយបុរស២នាក់ក្នុងស្ថានភាពស្រវឹង ជ្រុលបុកបាក់របងផ្ទះរបស់ប្រជាពលរដ្ឋ ជណ្តើរ ដើមស្វាយ បង្គោលភ្លើង និងជញ្ជាំងផ្ទះទើបអស់ល្បឿនទៅលែងរួច ។ ហេតុការណ៍ដ៏គួរឱ្យភ្ញាក់ផ្អើលនេះ មិនបណ្តាលឱ្យមានអ្នករងរបួសទេ នៅវេលាម៉ោង១២និង១០នាទីរំលងអធ្រាត្រ ឈានចូលថ្ងៃទី២២ ឧសភា ចំណុចផ្លូវលេខ៥៧ កែងផ្លូវលេខ៣៩៨ ក្រុម៧២ ភូមិ៩ សង្កាត់បឹងកេងកងទី១ ខណ្ឌចំការមន ។
សាក្សីនិយាយថា មុនពេលកើតហេតុ រថយន្តឡិចស៊ីសខាងលើ បើកតាមផ្លូវលេខ៣៩៨ ពីលិចទៅកើតយ៉ាងលឿន ពេលទៅដល់ចំណុចកើតហេតុ ក៏ជ្រុលទៅបុករបងផ្ទះរបស់ប្រជាពលរដ្ឋ ដើមស្វាយមួយដើមបណ្តាលឱ្យបាក់់ជាពីរកំណាត់ ជណ្តើរ បង្គោលភ្លើង និងចុងក្រោយទៅបុកផ្ទប់នឹងជញ្ជាំងផ្ទះ ទើបទៅមុខលែងរួច ។ រថយន្តរងការខូចខាតខ្ទេចមួយកំណាត់មុខ តែមិនមានអ្នករងរបួសទេ ដោយសារតែម្ចាស់ផ្ទះដេកលក់អស់ទៅហើយ ។
ក្រោយពេលកើតហេតុ អ្នកបើករថយន្តចេញមកទាំងសភាពស្រវឹងជោកជាំ ទៅសំពះសុំទោសម្ចាស់ផ្ទះ និងធានាសងការខូចខាតទាំងអស់ ។ ទោះយា៉ងណារថយន្តត្រូវសមត្ថកិច្ចស្ទូចយកទៅការិយាល័យនគរបាលចរាចរផ្លូវគោក ៕
ចែករំលែកព័តមាននេះ