អ្នកវិទ្យាសាស្រ្ដនិយាយថា គេបានរកឃើញផ្នែកមួយនៃខួរក្បាលដែលអាចគ្រប់គ្រងភាពចាស់ជរានៃរាងកាយបាន ។ នេះគឺជាការបើកចំហភាពអាចទៅរួចមួយ ដែលនៅថ្ងៃណាមួយអាចនឹងយកវាមកប្រើដើម្បីធ្វើជាសម្មិតកម្មថាតើមនុស្សវិវឌ្ឍទៅរកភាពចាស់យ៉ាងដូចម្ដេច?
ការសិក្សាស្រាវជ្រាវដែលបានចេញផ្សាយក្នុងទំព័រកាសែត The Nature បានបញ្ជាក់ឱ្យឃើញពីផ្នែកខាងមុខនៃខួរក្បាល ឬហៅថា Hypothalamus ជាផ្នែកមួយនៃខួរក្បាលដែលកំណត់ការលូតលាស់ ការបន្ដពូជ និងការបំលែងអាហារទៅជាថាមពល ។ ក្រុមអ្នកស្រាវជ្រាវនិយាយថា គេអាចបង្កើន ឬបន្ថយភាពចាស់ជរាលើសត្វកណ្ដុរដោយការធ្វើឱ្យសកម្មឡើង ឬរារាំងខួរក្បាលដែលឱ្យសញ្ញាម៉ូលេគីល NF-kB នៅក្នុងផ្នែកមុខនៃខួរក្បាលដែលបានជះឥទ្ធិពលលើកម្រិតនៃអ៊័រម៉ូនដែលហៅថា GnRH មានតួនាទីសំខាន់នៅក្នុងការបង្កើតកោសិកាប្រសាទ ។
តាមរយៈការភ្ញោចម៉ូលេគីល NF-kB គេបានធ្វើឱ្យអ៊័រម៉ូន GnRH ធ្លាក់ចុះដែលនាំទៅដល់ការកកើត និងការវិវឌ្ឍជាលិកាប្រសាទ និងរោគសញ្ញាចាស់ជរាដូចជា ខ្សោយសាច់ដុំ ស្បែកជ្រីវជ្រួញ ពុកឆ្អឹង និងបាត់បង់ការចងចាំ ។
លោក Dongsheng Cai អ្នកនិពន្ធការសិក្សាស្រាវជ្រាវ និងជាសាស្រ្ដាចារ្យផ្នែកឱសថម៉ូលេគីលនៃមហាវិទ្យាល័យវេជ្ជសាស្រ្ដ Albert Einstein បានថ្លែងប្រាប់ AFP តាមអីុម៉េលថា «ការសិក្សារបស់យើងបានផ្ដល់នូវយុទ្ធសាស្រ្ដនៃការព្យាបាលដើម្បីបន្ថយភាពចាស់ជរាតាមរយៈការកំណត់មុខព្រួញផ្នែកខាងមុខនៃខួរក្បាល ។ លទ្ធផលដែលពិសោធន៍លើសត្វកណ្ដុរនឹងអាចយកពិសោធន៍លើមនុស្សបាន បើទោះបីជាវាត្រូវការខិតខំប្រឹងប្រែងនាពេលអនាគតដើម្បីវិវឌ្ឍវិធីសាស្រ្ដដែលមានសុវត្ថិភាព និងអាចអនុវត្ដបានចំពោះមនុស្ស» ៕
ចែករំលែកព័តមាននេះ