រាជធានីភ្នំពេញ ៖ ក្រុមសិល្បៈរបាំបុរាណ និងប្រពៃណីខ្មែរចំនួន៣៥នាក់បានទៅសម្ដែងនៅក្រុងតូក្យូ ប្រទេសជប៉ុន ដើម្បីអបអរសាទរខួបអនុស្សាវរីយ៍លើកទី៦០នៃការទាក់ទងការទូតកម្ពុជា-ជប៉ុន កាលពីថ្ងៃទី១៣ ឧសភា ឆ្នាំ២០១៣ ។ ជោគជ័យគួរឱ្យរំភើបរីករាយសម្រាប់ការសម្ដែងរបស់ក្រុមរបាំកម្ពុជា ដ្បិតថ្វីបើមានភ្លៀងធ្លាក់ពេលសម្ដែង តែមិនធ្វើឱ្យទស្សនិកជនជប៉ុនប្រមាណជិត២.០០០នាក់ ចាកចេញទេ គឺពួកគេស៊ូនៅទស្សនាដោយទទូរឆត្រ និងពាក់អាវភ្លៀងរហូតដល់ចប់ ។
កម្មវិធីសម្ដែងរបាំបុរាណ និងប្រពៃណីខ្មែរនៅក្រុងតូក្យូនោះក្រោមការផ្ដួចផ្ដើមគំនិតពីឯកអគ្គរាជទូតកម្ពុជាប្រចាំនៅប្រទេសជប៉ុនលោកហោ មុន្នីរ័ត្ន ដោយមានការសហការពីក្រសួងវប្បធម៌ និងវិចិត្រសិល្បៈ និងលោកបណ្ឌិតហារូហ៊ីសា ហាន់ដា ប្រធានមូលនិធិអន្ដរជាតិដើម្បីសិល្បៈ និងវប្បធម៌នៃទីក្រុងតូក្យូ ។
លោកម៉ៅ កេង ប្រធាននាយកដ្ឋានសិល្បៈទស្សនីយភាពនៃក្រសួងវប្បធម៌ និងវិចិត្រសិល្បៈ និងជាអ្នកដឹកនាំសិល្បករ សិល្បការិនីទៅសម្ដែងនៅប្រទេសជប៉ុន ប្រាប់កោះសន្ដិភាពថា សិល្បករ សិល្បការិនីកម្ពុជាយើងបានចេញទៅសម្ដែងនៅប្រទេសជប៉ុនតាំងពីថ្ងៃទី១៣ ឧសភា និងថ្ងៃទី១៨ ឧសភា ទើបត្រឡប់មកវិញ។
នេះជាលើកទី៥ហើយ ដែលក្រសួងវប្បធម៌ និងវិចិត្រសិល្បៈដឹកនាំសិល្បករចេញទៅសម្ដែងនៅប្រទេសជប៉ុនខាងផ្នែករបាំបុរាណ និងប្រពៃណី ។ លើកទី៥នេះការសម្ដែងមានទ្រង់ទ្រាយធំជាងរាល់ដង ព្រោះសិល្បករមានរហូតដល់៣៥នាក់ឯណោះ ។ កន្លងមក មិនងាយមានសិល្បករចេញទៅសម្ដែងនៅប្រទេសក្រៅច្រើនបែបនេះទេ ។
អ្វីដែលធ្វើឱ្យលោកប្រធាននាយកដ្ឋានសិល្បៈទស្សនីយភាពនឹកស្មានមិនដល់នោះ គឺ ខណៈពេលក្រុមរបាំកម្ពុជាសម្ដែង ស្រាប់តែមេឃចាប់ផ្ដើមធ្លាក់ភ្លៀងធ្វើឱ្យលោកព្រួយបារម្ភយ៉ាងខ្លាំង តែជនជាតិជប៉ុនដែលអង្គុយទស្សនាប្រមាណជិត២.០០០នាក់ មិនបានដើរចេញពីមុខវេទិកាទេ គឺពួកគេអង្គុយទទូរឆត្រ និងពាក់អាវភ្លៀងនៅទស្សនារហូតដល់ចប់ ។ ជាពិសេសនៅពេលក្រុមរបាំចេញសម្ដែង ទស្សនិកជនទះដៃអបអរសាទរយ៉ាងខ្លាំង ដែលនេះជាសញ្ញាបញ្ជាក់ថា ជនជាតិជប៉ុនគាំទ្រយ៉ាងខ្លាំងចំពោះសិល្បៈរបាំបុរាណខ្មែរយើង ។ ខណៈភ្លៀងធ្លាក់យ៉ាងខ្លាំងនោះ ទស្សនិកជនជប៉ុនមិនព្រមងើបដើរចេញទេ ពួកគេនៅតស៊ូទស្សនារហូតដល់ចប់ ធ្វើឱ្យសិល្បករ ព្រមទាំងមន្ដ្រីទូតខ្មែរយើងដែលបានចូលរួមទស្សនាមានការរំភើបរីករាយយ៉ាងខ្លាំង ។
លោកម៉ៅ កេង ថ្លែងថា តាមសម្ដីលោកបណ្ឌិតហារូហ៊ីសា ហាន់ដា ដែលជាប្រធានមូលនិធិអន្ដរជាតិ ដើម្បីសិល្បៈ និងវប្បធម៌នៃទីក្រុងតូក្យូ ប្រទេសជប៉ុនប្រាប់លោកថា មានជនជាតិជប៉ុនខ្លះអង្គុយស្រក់ទឹកភ្នែកនៅពេលពួកគេទស្សនារបាំរបស់កម្ពុជាយើង ។ នៅពេលឮសម្ដីបែបនេះ ចំពោះលោកផ្ទាល់មិនដឹងថា ពួកគេស្រក់ទឹកភ្នែកដោយសារមូលហេតុអ្វីទេ តែតាមប៉ាន់ស្មានគឺប្រហែលជាពួកគេរំភើបពេលបានឃើញទស្សនីយភាពដ៏អស្ចារ្យរបស់ក្បាច់របាំបុរាណខ្មែរយើង ។
លោកម៉ៅ កេង ឱ្យដឹងថា នៅពេលចប់ការសម្ដែង លោកបណ្ឌិតហារូស៊ីសា ហាន់ដា បាននាំក្រុមសិល្បករខ្មែរយើងទស្សនាទីក្រុងតូក្យូ និងនាំទៅទទួលទានអាហារដ៏វិសេសវិសាល ដែលជាស្នាដៃរបស់ភរិយាលោកនៅគេហដ្ឋានរបស់លោកថែមទៀតផង ។នេះគឺជាមោទនភាពបំផុតរបស់ប្រទេសកម្ពុជា និងសិល្បករ-សិល្បការិនី រួមទាំងរូបលោកផ្ទាល់ផងដែរ ។
លោកប្រធាននាយកដ្ឋានសិល្បៈទស្សនីយភាពសង្ឃឹមថា ទៅថ្ងៃអនាគតសិល្បៈខ្មែរនឹងមានមុខមាត់នៅលើឆាកតន្ដ្រីអន្ដរជាតិមិនចាញ់ប្រទេសនានាទេ ៕
ចែករំលែកព័តមាននេះ