មនុស្សយ៉ាងតិច៩១នាក់ ក្នុងនោះមានកុមារ២០នាក់បានត្រូវស្លាប់ កាលពីថ្ងៃទី២០ ឧសភា នៅសហរដ្ឋអាមេរិក ដោយសារការវាយប្រហារនៃព្យុះកំបុតត្បូងដ៏ធំំមួយមានមុខដល់ទៅ៣គីឡូម៉ែត្រ លើទីក្រុង MOORE ជាទីក្រុងមួយនៅជាយក្រុងអូក្លាហូម៉ា ស៊ីធី ។
តុល្យការផ្លូវការនៅតែរាយការណ៍ពីមនុស្សស្លាប់៥១នាក់ ក៏ប៉ុន្តែពួកអ្នកជួយសង្គ្រោះរាយការណ៍ប្រាប់ផ្នែកសុខាភិបាលរដ្ឋថា ពួកគេកំពុងបញ្ជូនសាកសពមនុស្ស៤០នាក់ថែមទៀត ។នេះជាព្យុះកំបុតត្បូងដ៏មហាប្រល័យមួយនៅសហរដ្ឋអាមេរិកចាប់តាំងពីព្យុះកំបុតត្បូងដែលសម្លាប់មនុស្ស១៦១នាក់កាលពីឆ្នាំ២០១១ នៅក្រុង JOPLIN រដ្ឋមីស៊ូវី មក ។
ប្រធានាធិបតីអាមេរិក លោកបារ៉ាក់អូបាម៉ា ប្រកាសគ្រោះមហន្តរាយចម្បងនៅរដ្ឋអូក្លាហូម៉ា ហើយបញ្ជាឱ្យបញ្ចេញជំនួយសហព័ន្ធសម្រាប់ជួយបំពេញសេចក្តីត្រូវការខាងសង្គ្រោះ ។ ព្យុះកំបុតត្បូងនេះពិតជាសាហាវដោយកួចរថយន្តទាំងឡាយប៉ើងគរលើគ្នា។ សាលារៀននានាត្រូវបំផ្លាញខ្ទេច ក៏ដូចជាផ្ទះជាច្រើនខ្នង ព្រមទាំងមន្ទីរពេទ្យមួយ ។
អភិបាលក្រុង MOORE ប្រជាជនប្រមាណ៥០.០០០នាក់និយាយថា ទីក្រុងទាំងមូលក្លាយជាទីលាននៃការបំផ្លាញ ។ តាមដងវិថីពោរពេញដោយបំណែកផ្សេងៗ អគ្គិសនីត្រូវដាច់ ប៉ាណូទាំងឡាយប៉ើងបាត់អស់ ហើយរថយន្តទាំងឡាយប៉ើងគរលើគ្នា ។មន្ទីរពេទ្យនានាក្នុងតំបន់នោះរាយការណ៍ពីមនុស្ស២៤០នាក់ត្រូវរបួស ក្នុងនោះមានកុមារយ៉ាងតិច៦០នាក់ ៕
ចែករំលែកព័តមាននេះ