ខេត្តប៉ៃលិន ៖ បុរសពីរនាក់ជិះម៉ូតូម៉ាកសូនិក ស៊េរីចាស់ ពណ៌ខ្មៅ គ្មានស្លាកលេខ ឌុបគ្នាចេញពីកន្លែងផឹកស៊ី ពីត្បូងទៅជើង ក្នុងបំណងទៅលេងចម្ការមិត្តភក្តិបន្តទៀតនៅភូមិភ្នំកុយ ស្រុកសាលាក្រៅ តែជិះដល់ពាក់កណ្តាលផ្លូវ រេចង្កូតជ្រុលទៅបុកស្លាកសញ្ញាគណបក្សមួយពេញទំហឹង បណ្តាលឱ្យដួលរងរបួសធ្ងន់ម្នាក់ និងស្រាលម្នាក់ ត្រូវបងប្អូនបញ្ជូនទៅមន្ទីរពេទ្យបង្អែកខេត្ត ។ ហេតុការណ៍នេះកើតឡើងកាលពីវេលាម៉ោង៨ និង៣៥នាទីយប់ ថ្ងៃទី២០ ឧសភា នៅចំណុចក្បែរស្ពានតារាប ភូមិទួលល្វា សង្កាត់ទួលល្វា ក្រុងប៉ៃលិន ។
ជនរងគ្រោះទាំងពីរនាក់មាន ឈ្មោះ ឃិន ភេទប្រុស អាយុ២៨ឆ្នាំ ជាអ្នកបើកម៉ូតូ រងរបួសបែកក្បាលរយះដៃជើង សន្លប់នៅនឹងកន្លែង និងម្នាក់ទៀតឈ្មោះ យ៉ង ថៃ ភេទប្រុស អាយុ២២ឆ្នាំ រងរបួសស្រាល រលាត់ដៃជើងតិចតួច អ្នកទាំងពីររស់នៅភូមិបហ៊ុយ សង្កាត់បយ៉ាខា ក្រុងប៉ៃលិន ។
ប្រភពព័ត៌មានឱ្យដឹងថា មុនពេលកើតហេតុ បុរសទាំងពីរនាក់ ផឹកស៊ីជាមួយមិត្តភក្តិចំនួន៥នាក់ ពីព្រឹកដល់យប់ជ្រៅទើបចប់ ហើយយកម៉ូតូជិះទាំងស្រវឹង ដើម្បីបន្តដំណើរទៅលេងចម្ការមិត្តភក្តិបន្តទៀត តែជិះបានពាក់កណ្តាលផ្លូវ ក៏រេចង្កូតជ្រុលទៅបុកស្លាកគណបក្សនៅខាងស្តាំដៃ បណ្តាលឱ្យទ្រេត ចំណែកជនរងគ្រោះផ្លោងទៅធ្លាក់ក្នុងប្រឡាយទឹក ។ ម៉ូតូត្រូវសមត្ថកិច្ចយកទៅរក្សាទុកនៅអធិការដ្ឋានក្រុងប៉ៃលិន រង់ចាំម្ចាស់មកទទួលវិញ ៕
ចែករំលែកព័តមាននេះ