រាជធានីភ្នំពេញ ៖ យានយន្តគ្រប់ប្រភេទប្រមាណរាប់រយគ្រឿងបានកកស្ទះចរាចរណ៍យ៉ាងតាន់តាប់ដែលដើមហេតុមកពីរថយន្តធុនយក្ស២គ្រឿងបើកឆ្លងផ្លូវផ្ទុយក្បាលគ្នាសណ្តូកខ្លួនកាត់ទទឹងផ្លូវ ដូចគេចាប់វាស់ កាលពីវេលាម៉ោង៨ និង១៥នាទីព្រឹក ថ្ងៃទី២០ ឧសភា លើកំណាត់ផ្លូវលេខ២៧១ ត្រង់ចំណុចកែងផ្លូវលេខ៤៣២ ។ នេះជាសារមួយសម្រាប់សាលារាជធានីភ្នំពេញ គប្បីរកចន្លោះ (វេលាវិកាល) ពេលសមស្របណាមួយសម្រាប់រថយន្តប្រភេទនេះចេញដំណើរលើផ្លូវសាធារណៈដើម្បីបញ្ចៀសការកកស្ទះចរាចរណ៍រំខានដល់អ្នកដំណើរដែលកំពុងមមាញឹកឆ្ពោះទៅគោលដៅ ។
នៅលើដងផ្លូវលេខ២៧១នេះ គេសង្កេតឃើញតែងកកស្ទះចរាចរណ៍ស្ទើរមិនលស់ថ្ងៃពិសេសនៅចំណុចខាងលើ និងនៅម្តុំមុខវត្តសន្សំកុសល ដោយសារការបើកបរមិនយោគយល់គ្នា ក្នុងនោះរថយន្តធុនធំកន្ទុយវែងក៏ជាដើមហេតុក្នុងករណីនេះដែរ ។ ជាភស្តុតាងនៅព្រឹកថ្ងៃទី២០ ឧសភា គេឃើញយានយន្តគ្រប់ប្រភេទរាប់រយគ្រឿងបានកកស្ទះចរាចរណ៍យ៉ាងណែនណាន់តាន់តាប់លើកំណាត់ផ្លូវលេខ២៧១ កែងផ្លូវលេខ៤៣២ បង្កឡើងដោយរថយន្តធុនធំ២គ្រឿង ដែលមួយគ្រឿងមានកន្ទុយវែងប្រវែងជាង១០ម៉ែត្រ ពណ៌ខៀវ ដឹកទំនិញគ្របតង់ជិត និងមួយគ្រឿងទៀតជាប្រភេទរថយន្តបាញ់ស៊ីម៉ងត៍ធ្វើអគារ ។
មុនពេលកកស្ទះចរាចរណ៍ រថយន្តដឹកទំនិញបើកលើកំណាត់ផ្លូវលេខ៤៣២ ពីកើតទៅលិចពេលបើកជិតដល់ផ្លូវលេខ២៧១ ក៏បន្ថែមល្បឿនដើម្បីឡើងចំណោតដោយចុចស៊ីប្លេឱ្យយានយន្តទាំងឡាយចៀស និងប្រុងប្រយ័ត្ន ។ ពេលនោះម៉ូតូ និងរថយន្តគ្រប់ប្រភេទបើកផ្លូវឱ្យរថយន្តធំនោះឡើងតាមសម្រួល តែដោយចន្លោះនៃការបើកផ្លូវតូចចង្អៀតល្មមតែតួរថយន្តត្រង់កាត់ទទឹងផ្លូវធ្វើឱ្យអ្នកបើកបរមិនអាចយកចង្កូតឡើងជាចំណិតត្រសក់ ដើម្បីស្រួលបត់ក្បាលឆ្ពោះទៅទិសខាងត្បូងបានស្រួល ធ្វើឱ្យតួរថយន្តច្រងាងនៅទទឹងផ្លូវ ។
ស្របពេលនោះ ស្រាប់តែរថយន្តធុនធំជាប្រភេទរថយន្តបាញ់ស៊ីម៉ងត៍បើកលើផ្លូវលេខ២៧១ ពីត្បូងទៅជើងរុលមកដល់ទៅមុខមិនរួច ក៏បួងចង្កូតបត់មកខាងស្តាំដៃចុះចំណោតឆ្ពោះមកផ្លូវលេខ៤៣២ តែដោយខ្លាចជាន់លើយានយន្តដទៃទៀតពេលបត់ក្បាលមកដល់ចិញ្ចើមផ្លូវ ក៏ឈប់ទ្រឹងធ្វើឱ្យកន្ទុយរថយន្តទាំងពីរនៅទន្ទឹមគ្នា ដូចគេចាប់វាស់ ឯក្បាលរថយន្តមួយគ្រឿងបែរទៅលិច និងមួយទៀតបែរទៅកើតផ្ទុយទិសគ្នា ។ ពេលនោះម៉ូតូ រ៉ឺម៉កនិងរថយន្តតូចធំរាប់រយគ្រឿង ដែលកំពុងប្រញាប់ប្រញាល់ទៅកាន់គោលដៅបានកកស្ទះយ៉ាងណែនតាន់តាប់ប្រជ្រៀតគ្នាច្របូកច្របល់លែងគិតពីគ្រោះថ្នាក់ ឬគោរពច្បាប់ចរាចរណ៍ទេ ធ្វើយ៉ាងណាគេចឱ្យផុតពីចំណុចកកស្ទះនេះ ដោយទិសដៅលើកំណាត់ផ្លូវជាតិលេខ២៧១ ពីជើងទៅត្បូងក៏ជាប់គាំង និងពីត្បូងទៅជើងក៏ស្ទះ រីឯយានយន្តមួយផ្នែកធំទៀតដែលចរាចរតាមផ្លូវលេខ៤៣២ ក៏បើកសម្រុកឡើងផ្លូវ២៧១ទៀត ធ្វើឱ្យស្ថានភាពកកស្ទះកាន់តែធ្ងន់ធ្ងរឡើង។
ដោយសារតែជាប់គាំងដោយរថយន្តធំ២គ្រឿងឈប់ច្រងាងកាត់ទទឹងផ្លូវបែបនេះអ្នកបើកបរយានយន្តមួយចំនួនបើកគេចទៅផ្លូវ៤៣២ ហើយចូលទៅតាមផ្លូវផ្សេងៗ ដើម្បីបើកផ្លូវឱ្យរថយន្តបាញ់ស៊ីម៉ងត៍អាចរង្កិលខ្លួនចុះទៅផ្លូវ៤៣២នោះបាន ចំណែករថយន្តដឹកទំនិញឃើញចន្លោះសមល្មមអាចបត់ខ្លួនបានក៏បត់ក្បាលសន្សឹមៗឆ្ពោះទៅត្បូងធ្វើហី ។ ដោយឡែកម៉ូតូ រ៉ឺម៉ក និងរថយន្តតូចធំបានចាប់ផ្តើមបើកប្រជ្រៀតគ្នាទៅមុខរៀងខ្លួនលែងគិតពីចំណែកផ្លូវឡើយ ឱ្យតែមានចន្លោះគឺរុលចូលភ្លែតតែម្តងជាង១ម៉ោងទើបស្បើយ ធ្វើឱ្យអ្នកបើកបរខឹងសម្បាយ៉ាងខ្លាំងចំពោះការរំខាននេះ ។
ករណីខាងលើជាសារមួយសម្រាប់សាលារាជធានីភ្នំពេញ គួរប្រើធម៌ក្តៅចំពោះរថយន្តធំកន្ទុយវែង ថែមទាំងផ្ទុកទំនិញលើសតោនដើម្បីឱ្យត្រូវតាមច្បាប់ចរាចរណ៍ផ្លូវគោក ។ ជាការល្អគប្បីរកចន្លោះពេលវេលាសមស្របណាមួយ ដែលស្បើយយានយន្តដទៃធ្វើដំណើរលើដងផ្លូវ ដើម្បីបញ្ចៀសការកកស្ទះចរាចរណ៍តែងតែកើតមានស្ទើរមិនលស់ថ្ងៃ ដែលករណីនេះកន្លងមកក៏មានប្រតិកម្មពីប្រមុខរាជរដ្ឋាភិបាលដែរ ចំពោះរថយន្តប្រភេទនេះឱ្យកាត់កន្ទុយចេញ និងទម្លាក់ទំនិញទុកឱ្យត្រឹមត្រូវតាមប្រភេទរថយន្ត ដើម្បីកាត់បន្ថយគ្រោះថ្នាក់ចរាចរណ៍លើផ្លូវសាធារណៈជាយថាហេតុ ៕
ចែករំលែកព័តមាននេះ