ប្រធានាធិបតីអាមេរិក លោកបារ៉ាក់អូបាម៉ា បានសម្តែងការអបអរសាទរចំពោះការកែទម្រង់នយោបាយ និងសេដ្ឋកិច្ចនៅប្រទេសមីយ៉ាន់ម៉ា(ភូមា) ពេលលោកជួបពិភាក្សាកាលពីថ្ងៃទី២០ ឧសភា ជាមួយសមភាគីភូមា លោកថេន សេន ដែលមកបំពេញទស្សនកិច្ចផ្លូវការជាប្រវត្តិសាស្ត្រមួយនៅសេតវិមាន ក៏ប៉ុន្តែលោកអូបាម៉ា ទាមទារឱ្យបញ្ចប់អំពើហិង្សាប្រឆាំងពួកអ៊ិស្លាមក្នុងប្រទេសនេះ។
៦ខែក្រោយពីលោកទៅកាន់ក្រុងរ៉ង់ហ្គូន លោកអូបាម៉ា កត់សម្គាល់ថា ទំនាក់ទំនងរវាងប្រទេសទាំង២មានការកែលម្អដោយសារសកម្មភាពនានារបស់លោកប្រធានាធិបតីថេន សេន ដើម្បីធ្វើឱ្យមានការរីកចម្រើននៅភូមាលើផ្លូវនៃការកែទម្រង់នយោបាយ ព្រមទាំងសេដ្ឋកិច្ច ។
ចំណែកលោកថេន សេន វិញអះអាងថា លោកចង់បន្តការកែទម្រង់ប្រជាធិបតេយ្យក្នុងប្រទេសរបស់លោកក្រោយរបបយោធា ។
ជាភាសាអង់គ្លេស លោកអូបាម៉ាបានពោលពាក្យថា មីយ៉ាន់ម៉ាជាច្រើនលើក ជាជាងប្រើពាក្យថា ភូមា ។ លោកក៏បានពោលផងដែរថា លោកថេន េសន បានធ្វើការខិតខំប្រឹងប្រែងពិតប្រាកដនានា ដើម្បីស្វែងរកដំណោះស្រាយមួយចំពោះអំពើហិង្សាជនជាតិភាគតិច ដែលប៉ះពាល់ដល់ប្រទេស ប៉ុន្តែលោកផ្តោតពិសេសលើជនជាតិភាគតិចរ៉ូហ៊ីញយ៉ា កាន់សាសសនាអ៊ិស្លាម។
ប្រធានាធិបតីអាមេរិកបានសម្តែងពីការព្រួយបារម្ភយ៉ាងខ្លាំងរបស់លោកចំពោះអំពើហិង្សារវាងសហគមន៍ ដែលសំដៅលើបណ្តាក្រុមអ៊ិស្លាមនៅភូមា ។ លោកទទូចថា ការជម្លៀសមនុស្ស ព្រមទាំងអំពើហិង្សាសំដៅលើក្រុមអ៊ិស្លាមទាំងនេះត្រូវបញ្ឈប់ ។
ចំណែកលោកថេន សេន វិញ ទទួលស្គាល់ថា ប្រទេសរបស់លោកត្រូវប្រឈមមុខនឹងការលំបាកជាច្រើន ហើយលោកបានសម្តែងការដឹងគុណចំពោះលោកអូបាម៉ា ដោយសារជំហររបស់លោកក្នុងសំណុំរឿងមីយ៉ាន់ម៉ា ដែលលោកថាជាការជួយសម្រួលដល់ដំណើរការកែទម្រង់ដែលកំពុងប្រព្រឹត្តទៅ ។
លោកថេន សេន មានប្រសាសន៍ថា ដើម្បីឱ្យលទ្ធិប្រជាធិបតេយ្យមានការរីកចម្រើនក្នុងប្រទេសយើង នោះយើងត្រូវបោះជំហានទៅមុខ ហើយយើងត្រូវធ្វើការកែទម្រង់នយោបាយ និងសេដ្ឋកិច្ច ។ហាក់ដូចជាចង់និយាយសំដៅលើសំណើនានារបស់លោកអូបាម៉ា ដែលថ្លែងប៉ុន្មាននាទីមុននេះក្នុងសុន្ទរកថាឯសាកលវិទ្យាល័យក្រុងវ៉ាស៊ីនតោនមួយថា លោកថេន សេន ប្រាថ្នាឱ្យអំពើហិង្សា សហគមន៍ និងការរើសអើងត្រូវបញ្ចប់ក្នុងប្រទេសលោក ដោយស្នើឱ្យមានការបង្រួបបង្រួមជាតិកាន់តែទូលំទូលាយ ក៏ប៉ុន្តែមិននិយាយយោងដោយផ្ទាល់ចំពោះពួករ៉ូហ៊ីញយ៉ា ជាជនជាតិភាគតិចអ៊ិស្លាមមួយក្រុមគ្មានប្រទេសឡើយ ។រហូតមកទល់ពេលនេះ លោកថេន សេន ជាមេដឹកនាំភូមាដំបូងគេ ទទួលដោយកិត្តិយសនៅសេតវិមានចាប់តាំងពីទស្សនកិច្ចរបស់ឧត្តមសេនីយ៍ នេ វីន កាលពីឆ្នាំ១៩៦៦ សម័យក្រោមអំណាចប្រធានាធិបតីលីនដុន ចនស៊ុន មក ៕
ចែករំលែកព័តមាននេះ