ខេត្តក្រចេះ៖មន្ត្រីរដ្ឋបាលព្រៃឈើក្រចេះ បានកសាងសំណុំរឿងរថយន្តឡង់គ្រីស្ស័រ ដឹកឈើគ្រញូងជាង១ម៉ែត្រគូបនិងមានតម្លៃច្រើនម៉ឺនដុល្លារ ដែលក្រឡាប់នៅលើផ្លូវជាតិលេខ៧ កាលពីថ្ងៃទី១៥ ឧសភា ២០១៣ នៅចំណុចឃុំអូរគៀង ស្រុកសំបូរ ទៅតុលាការ និងបានធ្វើសេចក្ដីប្រកាសដើម្បីស្វែងរកម្ចាស់រថយន្តឱ្យចូលខ្លួនមកដោះស្រាយនៅចំពោះមុខច្បាប់។
នាយសង្កាត់រដ្ឋបាលព្រៃឈើអូរគៀងលោក ម៉ី វុទ្ធី បានឱ្យដឹងតាមទូរស័ព្ទកាលពីថ្ងៃទី២១ ឧសភា ២០១៣នេះថា បន្ទាប់ពីរថយន្តឡង់គ្រីស្ស័រ ពណ៌ខ្មៅ ខាងលើបានជួបហេតុការណ៍ក្រឡាប់រួច សម្ភារនិងរថយន្តត្រូវបានមន្ត្រីជំនាញ យកទៅរក្សាទុកនៅសង្កាត់រដ្ឋបាលនិងធ្វើការវាស់វែងចំនួនឈើទាំងនោះ។
មន្ត្រីរដ្ឋបាលព្រៃឈើបានបន្តថា ឈើទាំងនោះសុទ្ធសឹងជាឈើគ្រញូងមានចំនួនរាប់រយកំណាត់មានទម្ងន់ជាង១ ពាន់គីឡូក្រាម ស្មើនឹង១ម៉ែត្រគូប។ពេលនេះវត្ថុតាងទាំងនោះត្រូវបានកម្លាំងជំនាញកសាងសំណុំរឿងបញ្ជូនទៅសាលាដំបូងខេត្តដើម្បីចាត់វិធានការបន្ត។
គួររំលឹកផងដែរថាកាលពីវេលាម៉ោង១២ ថ្ងៃត្រង់ថ្ងៃទី១៥ ឧសភា ២០១៣មានឧប្បត្តិហេតុគ្រោះថ្នាក់ក្រឡាប់រថយន្តឡង់គ្រីស្ស័រមួយ ខណៈដែលរថយន្តនេះមានផ្ទុកឈើគ្រញូងពេញបើកស្របទិសគ្នាជាមួយក្បួនរថយន្តស៊ីរ៉ែនបើកផ្លូវឱ្យរថយន្តថ្នាក់ដឹកនាំមួយចំនួន ដែលត្រឡប់ពីចូលរួមពិធី សម្ពោធដាក់ឱ្យប្រើប្រាស់នូវរោងចក្រផលិតនិងចៀរជ័រកៅស៊ូ នៅស្រុកសេសាន ខេត្តស្ទឹងត្រែង៕
ចែករំលែកព័តមាននេះ