រាជធានីភ្នំពេញ ៖ ក្រុមយុវជនថ្នាលភ្នំពេញក្រោនបានក្លាយជាជើងឯកពានរង្វាន់ Asia’s Premier Soccer Sixes Tournament កាលពីថ្ងៃទី១៩ ឧសភា លើទឹកដីសិង្ហបុរីដោយបានយកឈ្នះក្រុមបាល់ទាត់២មកពីប្រទេសថៃ នៅវគ្គពាក់កណ្តាលផ្តាច់ព័្រត្រនិងផ្តាច់ព្រ័ត្រ និងឈ្នះ៧ប្រកួតជាប់ៗ
គ្នា ។ នេះជាសមិទ្ធផលដ៏អស្ចារ្យមួយរបស់ក្រុមយុវជនថ្នាលភ្នំពេញក្រោនក្រោមការដឹកនាំរបស់លោកបួយ ដារី ជាគ្រូបង្គោលដែលបានយកឈ្នះបន្តបន្ទាប់គ្រប់ការប្រកួតពោលគឺ៧ប្រកួតជាប់គ្នាចាប់តាំងពីបើកកម្មវិធីដល់វគ្គផ្តាច់ព្រ័ត្រតែម្តង និងមិនមានរបូតគ្រាប់បាល់សូម្បីតែមួយគ្រាប់ណាសោះ ។
ក្រុមយុវជនថ្នាលភ្នំពេញក្រោនបានយកឈ្នះក្រុម Klung Toey របស់ថៃនៅវគ្គ១/២ដោយលទ្ធផល ៤-០ និងបន្តឈ្នះក្រុមថៃ Youth Home មួយទៀតនៅវគ្គផ្តាច់ព្រ័ត្រក្នុងលទ្ធផល២-០ លើកពានរង្វាន់ Asia’s Premier Soccer Sixes Tournament យ៉ាងសប្បាយរីករាយ ។ លទ្ធផល៧ប្រកួតរបស់ក្រុមយុវជនថ្នាលភ្នំពេញក្រោនគឺ៖ វគ្គជម្រុះ ភ្នំពេញក្រោន២-០ Klung Toey (ថៃ),ភ្នំពេញក្រោន ៥-០ Youth Home (ថៃ), ភ្នំពេញក្រោន ៤-០ Bali Sports(ឥណ្ឌូណេស៊ី),ភ្នំពេញក្រោន ២-០ Hevea MK (ឥណ្ឌូណេស៊ី),ភ្នំពេញក្រោន ៦-០ Rumah Faith (ម៉ាឡេស៊ី) វគ្គពាក់កណ្តាលផ្តាច់ព្រ័ត្រ៖ ភ្នំពេញក្រោន ៤-០ Klung Toey (ថៃ) និងវគ្គផ្តាច់ព្រ័ត្រៈភ្នំពេញក្រោន ២-០ Youth Home (ថៃ) ។
សូមបញ្ជាក់ថា ក្នុងឆ្នាំដំបូងក្រុមយុវជនថ្នាលភ្នំពេញក្រោនទទួលបានចំណាត់ថ្នាក់លេខ៣ និងឆ្នាំមុនពួកគេទទួលបានជើងឯងរងប៉ុណ្ណោះ តែនៅឆ្នាំនេះពួកគេទទួលបានជើងឯកបន្ទាប់ពីផ្តួលក្រុម២មកពីប្រទេសថៃក្នុងវគ្គពាក់កណ្តាលផ្តាច់ព្រ័ត្រ និងផ្តាច់ព្រ័ត្ររួចមក ។ អ្វីដែលធ្វើឱ្យមានការកត់សម្គាល់និងមោទនភាពបំផុតនោះគឺក្រុមយុវជនថ្នាលភ្នំពេញក្រោនលេង៧ប្រកួត ឈ្នះទាំង៧ប្រកួត ទាត់ចូលទី២៧គ្រាប់ និងមិនមានក្រុមណាស៊ុតបាល់បញ្ចូលទីពួកគេបានសូម្បីតែ១គ្រាប់ ដែលនេះជាសមិទ្ធផលមួយដ៏អស្ចារ្យសម្រាប់ពួកគេ ។ កីឡាករដែលស៊ុតបាល់បញ្ចូលទីបានច្រើនជាងគេប្រចាំព្រឹត្តិការណ៍នេះគឺសួន នឿត និងគឹម ឆាយ៉ា ដោយពួកគេធ្វើបានសម្រេចម្នាក់៧គ្រាប់ ។
សម្រាប់ការប្រកួតដណ្តើមពានរង្វាន់ខាងលើនេះ ក្រុមបាល់ទាត់នីមួយៗតម្រូវឱ្យមានកីឡាករ៦នាក់លើទីលាន ។ គ្រប់កីឡាករទាំងអស់កំណត់យកអ្នកកើតនៅឆ្នាំ១៩៩៩ ឬ២០០០ ។ ក្រុមយុវជនថ្នាលភ្នំពេញក្រោន ដែលបញ្ជូនទៅចូលរួមប្រកួតលើកនេះមានចំនួន៨នាក់ ដឹកនាំដោយលោកបួយ ដាវី និងបានត្រឡប់មកដល់កម្ពុជាវិញកាលពីរសៀលថ្ងៃម្សិលមិញ ៕
ចែករំលែកព័តមាននេះ