ខេត្តព្រៃវែង ៖ កម្មករធ្វើស្ពានអ្នកលឿងជិត១០០នាក់ បានធ្វើកូដកម្មមិនចូលធ្វើការ ដោយសារមានមន្ទិលរឿងក្រុមហ៊ុនកាត់ពន្ធ១០% លើប្រាក់ខែពួកគាត់ ។
ហេតុការណ៍នេះកើតឡើងនៅម៉ោង១២និង១០នាទីថ្ងៃទី២១ ឧសភា ២០១៣ នេះនៅត្រង់ចំណុចគល់ស្ពានត្រើយខាងលិច ។ ក្រុមអ្នកតំណាងកម្មករបាននិយាយថា ក្រុមហ៊ុនជប៉ុនម៉ៅការសាងសង់ស្ពានអ្នកលឿងបានកាត់ពន្ធ១០% លើប្រាក់ខែបន្តិចបន្តួចរបស់ពួកគាត់រយៈពេល២ឆ្នាំ មកហើយ ហើយពេលសុំការបកស្រាយខាងក្រុមហ៊ុនបែរជាមិនមានឯកសារគ្រប់គ្រាន់ ដើម្បីពន្យល់បង្ហាញពួកគាត់ពីបញ្ហានេះ ។
តំណាងក្រុមហ៊ុនលោក Akhterhossaim ជនជាតិបង់ក្លាដេស បានឱ្យដឹងថា ក្រុមហ៊ុនបានកាត់ពន្ធនេះបម្រុងទុកបង់ពន្ធជូនរដ្ឋាភិបាល បើមានការតម្រូវ តែបើអត់ទេ នឹងបង្វែរជូនកម្មករវិញនៅចុងបញ្ចប់នៃការសាងសង់ ។ តំណាងក្រុមហ៊ុនបន្តថា នៅល្ងាចនេះក្រុមហ៊ុននឹងចេញលិខិតព្រមានដល់ក្រុមបាតុករ ហើយថា បើព្រឹកស្អែកនៅតែធ្វើកូដកម្មទៀតនឹងឈានដល់ការបញ្ឈប់ការងារពួកគេទាំងអស់នោះតែម្តង ។
ប៉ុន្តែទោះបីជាយ៉ាងណា តំណាងកម្មករស្នើសុំឱ្យខាងក្រសួងពាក់ព័ន្ធមេត្តាជួយបំភ្លឺថា តើករណីពន្ធ១០% ពីប្រាក់ខែនេះពិតជាតម្រូវឱ្យកាត់ចេញពីប្រាក់ខែពួកគេឬយ៉ាងណា តែពួកគាត់ថា កម្មករមានប្រាក់ខែតិចតួចណាស់ ហេតុនេះសូមរដ្ឋាភិបាលជួយកុំឱ្យមានការកាត់ពន្ធពីពួកគាត់អី ៕
ចែករំលែកព័តមាននេះ