យោងតាមការសិក្សាមួយចេញផ្សាយតាមសារព័ត៌មានអង់គ្លេស Daily Mail ឲ្យដឹងថា ក្មេងចាប់ផ្តើមមើលរឿងអាសអាភាសតាមអ៊ីនធើរណេតចាប់ពីអាយុ៦ឆ្នាំនឹងចាប់ផ្តើមចេះញ៉ែតាមអនឡាញនៅអាយុ៨ឆ្នាំ ។សារព័ត៌មានរាយការណ៍ថា ឪពុកម្តាយជាង១៩.០០០នាក់នៅលើពិភពលោកបានចូលរួមនៅក្នុងការអង្កេតនេះ ជាមួយនឹងទិន្នន័យដែលបានចងក្រងដោយប្រើប្រាស់ព័ត៌មានពីវែបសាយដែលពួកគេប្រើប្រាស់ដើម្បីបិទចោលវែបសាយណាដែលកូនៗរបស់គេតែងតែចូលមើលជាញឹកញាប់ ។
ការសិក្សាបានរកឃើញថា ស្ទើរតែ១/៣នៃក្មេងៗទាំងនោះមានគណនីបណ្តាញសង្គមយ៉ាងហោច១នៅពេលដែលគេមានអាយុ១២ឆ្នាំហើយក្មេងៗទាំងនោះលាក់អាយុរបស់គេនៅពេលបង្កើតព័ត៌មានផ្ទាល់ខ្លួនតាមអនឡាញ ។ឧទាហរណ៍ដើម្បីចូលរួមបណ្តាញសង្គមហ្វេសប៊ុកអ្នកត្រូវមានអាយុ១៣ឆ្នាំ ។ជាការព្រួយបារម្ភបំផុត អ្នកដែលញៀនកំុព្យូទ័រចំនួន២%ជាក្មេងដែលមានអាយុត្រឹម៥ឆ្នាំ ហើយ១៧%ទៀតគឺជាអ្នកប្រើប្រាស់បណ្តាញសង្គមដែលមានអាយុ១០ឆ្នាំ ។ សរុបទៅក្មេងៗកំពុងងាកទៅរកការលេងហ្គែមតាមកុំព្យូទ័រ និងការផ្ញើសារក្នុងវ័យក្មេងបំផុត ។
ការសិក្សានេះចេញផ្សាយដោយក្រុមហ៊ុន Bitdefender ដែលជាក្រុមហ៊ុនបង្កើតសូហ្វវែរប្រឆាំងមេរោគល្អបំផុតសម្រាប់អីុនធើរណេត ។អ្នកយុទ្ធសាស្ត្រផ្នែកសន្តិសុខរបស់ក្រុមហ៊ុនលោក Catalin Cosoi ប្រាប់សារព័ត៌មាន US Today ថា បច្ចុប្បន្ននេះក្មេងៗកំពុងធ្វើខ្លួនដូចយុវវ័យ គ្រាន់តែឲ្យឧបករណ៍ភ្ជាប់អីុនធើរណេតទៅគេ គេនឹងអាចរកវិធីចូលទៅរកអ្វីដែលឪពុកម្តាយគេចង់ហាមប្រាមជារៀងរហូត ៕
ចែករំលែកព័តមាននេះ