ដោយមើលឃើញពីគុណបំណាច់និងការដឹកនំាប្រកបដោយបញ្ញាញាណ របស់សម្តេចនាយករដ្ឋមន្រ្តី ហ៊ុន សែន ក្នុងការដឹកនំាប្រទេសកម្ពុជាឆ្លងផុតពីដំណាក់កាលសង្រ្គាមមកកាន់សុខសន្តិភាព និងកសាងប្រទេសមានការអភិវឌ្ឍរីកចម្រើន និងការគោរពស្រលាញ់របស់ថ្នាក់ដឹកនំានិងប្រជាពលរដ្ឋខេត្តស៊ូឡាវេស៊ី អភិបាលខេត្តស៊ូឡាវេស៊ី លោក ស៊ីយ៉ារូល យ៉ាស៊ីន លីមប៉ូ បានផ្តល់ឋានៈសម្តេចតេជោ ជាពលរដ្ឋកិត្តិយសរបស់ខេត្តស៊ូឡាវេស៊ី តាមរយៈការបំពាក់មួក ដំបងដាវ និងជូនវត្ថុអនុស្សាវរីយ៏ ។
ពិធីនេះ បានបា្ររព្វធ្វើនៅក្នុងទីក្រុងម៉ាកាសាក្នុងពិធីលាងសោយភោជន៏មួយជូនចំពោះសម្តេចនាយករដ្ឋមន្រ្តី ហ៊ុន សែន កាលពីរាត្រីថ្ងៃទី១៩ ឧសភា ២០១៣ ក្នុងអំឡុងពេលដែលសម្តេចនិងគណៈប្រតិភូជាន់ខ្ពស់រាជរដ្ឋាភិបាលកម្ពុជា បានអញ្ជើញចូលរួមក្នុងមហាសន្និបាតលើកទី២ នៃអង្គការអ្នកប្រជាធិបតេយ្យនិយមកណ្តាលអន្តរជាតិ អាស៊ីប៉ាស៊ីហ្វិក ហៅកាត់ថា CAPDI ។
គួរបញ្ជាក់ថា កាលពីថ្ងៃទី២០ឧសភាម្សិលមិញ អំឡុងពេលឡើងថ្លែងសុន្ទរកថាក្នុងមហាសន្និបាតលើកទី២ នៃអង្គការអ្នកប្រជាធិបតេយ្យនិយមកណ្តាលអន្តរជាតិ អាស៊ីប៉ាស៊ីហ្វិកនេះដែរ សម្តេចនាយករដ្ឋមន្រ្តី ហ៊ុន សែន ក៏បានអំពាវនាវឲ្យ CAPDI បញ្ជូនអ្នកសង្កេតការណ៏របស់ខ្លួនមកកាន់ប្រទេសកម្ពុជា ដើម្បីអង្កេតតាមដានពីការបោះឆ្នោតជ្រើសតំាងតំណាងរាស្រ្តនីតិកាលទី៥ ដែលនឹងប្រព្រឹត្តទៅនៅថ្ងៃទី២៨ កក្កដា ២០១៣ខាងមុខ ។
សូមបញ្ជាក់ដែរថា មហាសន្និបាតលើកទី២ នៃអង្គការអ្នកប្រជាធិបតេយ្យនិយមកណ្តាលអន្តរជាតិ អាស៊ីប៉ាស៊ីហ្វិក ដែលបានបា្ររព្វធ្វើពីថ្ងៃទី១៩ ដល់ថ្ងៃទី២១ ឧសភា២០១៣នេះ ផ្តោតសំខាន់ទៅលើការប្រមូលផ្តុំរដ្ឋាភិបាល គណបក្សនយោបាយនិងសង្គមស៊ីវិល ដើម្បីជំរុញសន្តិភាព ការផ្សះផ្សានិងប្រយុទ្ឋប្រឆាំងការប្រែប្រួលអាកាសធាតុ ។
សម្តេចនាយករដ្ឋមន្រ្តី ហ៊ុន សែន និងគណៈប្រតិភូអមដំណើរ បាននិវត្តន៏មកដល់ប្រទេសកម្ពុជាវិញហើយ កាលពីម៉ោងជាង៥ល្ងាចថ្ងៃទី២០ ឧសភា ២០១៣ ៕
ចែករំលែកព័តមាននេះ