រាជធានីភ្នំពេញ ៖ ការប្រកួតបាល់ទាត់ Metfone Cambodian League 2013 កាលពីថ្ងៃអាទិត្យ ទី១៩ ឧសភា នៅពហុកីឡដ្ឋានជាតិអូឡាំពិកមាន២ប្រកួត ក្នុងនោះក្រុមបៀលប្រាយលេងចាញ់ក្រុមខេត្តស្វាយរៀង ក្នុងលទ្ធផល១ទល់២ ចំណែកក្រុមគិរីវង់សុខសែនជ័យ លេងឈ្នះក្រុមសាកលវិទ្យាល័យអាស៊ីអឺរ៉ុបក្នុងលទ្ធផល៤ទល់២ ។
ឆាកប្រយុទ្ធនៅលើវាលស្មៅរវាងក្រុមបៀលប្រាយ និងក្រុមខេត្តស្វាយរៀង នៅវេលាម៉ោង២រសៀល ពេលដែលមេឃកំពុងចាប់ផ្តើមធ្លាក់ភ្លៀងក្នុងតង់ទី១ មើលទៅគ្មានក្រុមណាលើក្រុមណាទេ ជាលទ្ធផលក្រុមទាំង២នៅរក្សាបាន០ទល់០ដដែល ។ ចូលដល់តង់ទី២ នៅនាទីទី៦៦ កីឡាករពាក់អាវលេខ២២ សំអឿន ពិដោរ របស់ក្រុមខេត្តស្វាយរៀង រកបាន១គ្រាប់ឱ្យក្រុមខ្លួនបានមុនគេ ។ បន្ទាប់មកនៅនាទីទី៩៣ គឺក្នុងម៉ោងបន្ថែមកីឡាករឃួន ឡាបូរ៉ាវី ពាក់អាវលេខ១១ របស់ក្រុមខេត្តស្វាយរៀង រកបាន១គ្រាប់ឱ្យក្រុមដែរ តែ១នាទីក្រោយមកគឺនៅនាទីទី៩៤ ដែលជានាទីចុងក្រោយនៃម៉ោងបន្ថែមនោះ ក្រុមបៀលប្រាយទទួលបានឱកាសទាត់បាល់ពិន័យប៉េណាល់ទី១១ម៉ែត្រ ដោយសារកីឡាករក្រុមខេត្តស្វាយរៀងធ្វើឱ្យមានកំហុស ។
កីឡាករពាក់អាវលេខ៦ ព្រំ ពុទ្ធសិទ្ធី របស់ក្រុមបៀលប្រាយទាត់បាល់បញ្ចូលទីបានសម្រេចធ្វើឱ្យចប់ការប្រកួត ក្រុមខេត្តស្វាយរៀងឈ្នះក្រុមបៀលប្រាយ២ទល់១ ។ សូមបញ្ជាក់ថា កាលពីជុំទី១ ក្រុមទាំង២នេះលេងស្មើគ្នា ០ទល់០ តែជុំទី២ ក្រុមខេត្តស្វាយរៀងរកបាន៣ពិន្ទុ ។ ១១ប្រកួតរបស់បៀលប្រាយឈ្នះ៣ ស្មើ៣ និងចាញ់៥ មាន១២ពិន្ទុ ចំណែកក្រុមខេត្តស្វាយរៀងលេងបាន១០ប្រកួត ក្នុងនោះឈ្នះ៧ ស្មើ១ និងចាញ់២ មាន២២ពិន្ទុ ។
នៅថ្ងៃដដែលវេលាម៉ោង៤ល្ងាច ក្រុមគិរីវង់សុខសែនជ័យបានលេងឈ្នះក្រុមសាកលវិទ្យាល័យអាស៊ីអឺរ៉ុបក្នុងលទ្ធផល៤ទល់២ ។ ២គ្រាប់របស់ក្រុមសាកលវិទ្យាល័យអាស៊ីអឺរ៉ុបរកបានដោយកីឡាករ ADESEYE ពាក់អាវលេខ៣៦ តែម្នាក់ឯងនៅនាទីទី៧ និងទី១៥។ ចំណែក៤គ្រាប់របស់ក្រុមគិរីវង់សុខសែនជ័យរកបានដោយកីឡាករ FRIDAY ពាក់អាវលេខ១៨ នៅនាទីទី៤០, កីឡាករ NJOKU DAVID ពាក់អាវលេខ៨ នៅនាទីទី៨៩ និងកីឡាករសាវន រតនវិសារ ពាក់អាវលេខ១៩ នៅនាទីទី៨២ និងទី៩០ ។
សូមបញ្ជាក់ថា កាលពីជុំទី១ ក្រុមគិរីវង់សុខសែនជ័យលេងឈ្នះក្រុមសាកលវិទ្យាល័យអាស៊ីអឺរ៉ុប១ទល់០ប៉ុណ្ណោះ ។ តាមរយៈជ័យជម្នះនេះធ្វើឱ្យ១១ប្រកួតរបស់ក្រុមគិរីវង់សុខសែនជ័យឈ្នះ៥ ស្មើ៣ និងចាញ់៣ មាន១៨ពិន្ទុ ចំណែកក្រុមសាកលវិទ្យាល័យអាស៊ីអឺរ៉ុបលេងបាន១០ប្រកួត ក្នុងនោះឈ្នះ១ ស្មើ៤ និងចាញ់៥ មាន៧ពិន្ទុ ៕
ចែករំលែកព័តមាននេះ