រាជធានីភ្នំពេញ ៖ អគាររោងសម្រាកលំហែកាយនៃរោងចក្រកាត់ដេរឈ្មោះផាវើរ បានបាក់សង្កត់កម្មករ បណ្តាលឱ្យរងរបួសធ្ងន់ និងស្រាលប្រមាណ២០នាក់ បង្កឱ្យមានការភ្ញាក់ផ្អើល កាលពីវេលាម៉ោង១១ និង៤៥នាទីថ្ងៃត្រង់ ថ្ងៃទី២០ ឧសភា ២០១៣ ស្ថិតក្នុងភូមិជ្រោយអម្ពិល សង្កាត់ក្បាលកោះ ខណ្ឌមានជ័យ ។
ភ្លាមៗនោះ មន្ត្រីអាជ្ញាធរ និងសមត្ថកិច្ចបានចុះទៅអន្តរាគមន៍ជួយចាត់ចែងបញ្ជូនអ្នករបួសតាមរថយន្តពេទ្យជាច្រើនគ្រឿងទៅកាន់មន្ទីរពេទ្យមិត្តភាពខ្មែរ-សូវៀតដើម្បីសង្គ្រោះ ដែលហេតុការណ៍នេះ មានសភាពធ្ងន់ធ្ងរជាងគ្រោះថ្នាក់នៅរោងចក្រវីងស្តារស៊ូ នៅស្រុកគងពិសី ខេត្តកំពង់ស្ពឺទៅទៀត ។
តាមប្រភពព័ត៌មានបានឱ្យដឹងថា រោងចម្រាកលំហែកាយនៃរោងចក្រផាវើរនេះ មានទំហំប្រហែលជា១០ម៉ែត្រ គុណ១០ម៉ែត្រ សង់អំពីដែកស័ង្កសី ឆ្អឹងដែក និងសសរបេតុង ជាសំណង់ចាស់ ស្ថិតនៅលើស្រះទឹកមួយ (ដាំសសរចូលក្នុងទឹក) ហើយស្រាប់តែពេលនេះ ដល់ពេលវេលាដែលវាស្រុតផ្អៀងតែម្តង និងបង្កឱ្យបាក់សង្កត់កម្មករដែលអ្នកខ្លះទៅអង្គុយសម្រាកយកខ្យល់អាកាស និងអ្នកខ្លះយកបាយទៅញ៉ាំនៅទីនោះ ព្រោះជាពេលសម្រាក និងពេលញ៉ាំបាយ៕
ចែករំលែកព័តមាននេះ