នាយកទីចាត់ការរដ្ឋបាលនៃសាលារាជធានីភ្នំពេញ លោក កើត ឆែ បានបា្រប់កោះសន្តិភាពឲ្យដឹងនៅព្រឹកថ្ងៃទី ១៩ ឧសភា ២០១៣នេះថា ឆ្លងតាមកិច្ចប្រជុំមួយជុំវិញសំណើរបស់គណបក្សសង្គ្រោះជាតិ ក្នុងការសុំធ្វើបាតុកម្មអហិង្សានិងហែក្បួនយកញ្ញត្តិទៅដាក់នៅការិយាល័យ ឧត្តមស្នងការសហប្រជាជាតិនោះ សាលារាជធានីភ្នំពេញបានសម្រេចយល់ព្រមតាមសំណើរបស់គណបក្សសង្គ្រោះជាតិ ដោយអនុញ្ញាតឲ្យធ្វើការតវ៉ានៅទីលានប្រជាធិបតេយ្យ ស្ថិតនៅក្រោយស្ថានទូតអាមេរិកប្រចំាកម្ពុជា ដែលមានបាតុករ ៥០០០នាក់ និង អនុញ្ញាតឲ្យមានការហែក្បួន ១០០នាក់ប៉ុណ្ណោះ ។
គួរបញ្ជាក់ថានេះជាលើកទី២ហើយ បន្ទាប់ពីកាលពីថ្ងៃទី២៤ មេសា ២០១៣ គណបក្សសង្គ្រោះជាតិបានធ្វើបាតុកម្មដូចគ្នានេះ ប្រយោជន៏ដើម្បីទាមទារឲ្យមានការកែទម្រង់នីតិវិធីមួយចំនួន របស់គណៈកម្មាធិការជាតិរៀបចំការបោះឆ្នោត ក៏ដូចជាទាមទារឲ្យ គជប ទទួលយកនូវអនុសាសន៏របស់អង្គការសហប្រជាជាតិ និង អនុសាសន៏របស់អង្គការក្រៅរដ្ឋាភិបាលដែលធ្វើការងារពាក់ព័ន្ឋនឹង ការបោះឆ្នោត ព្រមទាំងទាមទារឲ្យលោកសមរង្ស៊ី វិលចូលប្រទេសកម្ពុជាវិញ ដើម្បីចូលរួមការបោះឆ្នោត ដែលនឹងប្រព្រឹត្តទៅនៅថ្ងៃទី២៨កក្កដា ២០១៣ខាងមុខនេះ ៕
ចែករំលែកព័តមាននេះ