ខេត្តកំពត ៖ ស្ត្រីម្នាក់ដែលប្រសូតបានកូន ភ្លោះ៣សុទ្ធតែប្រុសទាំងអស់ កាលពីវេលាម៉ោង៤រសៀលថ្ងៃទី១៥ ឧសភា នៅក្នុងមន្ទីរពេទ្យបង្អែកស្រុកកំពង់ត្រាច ជាគ្រោះអកុសលកូនភ្លោះ២នាក់បានស្លាប់ទៅវិញ ។ ស្ត្រីដែលឆ្លងទន្លេបានកូនភ្លោះ៣នេះឈ្មោះប៉ុន រដ្ឋធី អាយុ២៣ឆ្នាំ ប្តីឈ្មោះឌុច អាយុ២៤ឆ្នាំ នៅភូមិព្រៃតាព្រឹត ឃុំស្តេចគង់ខាងលិច ស្រុកបន្ទាយមាស ។
តាមឪពុកកូនភ្លោះ៣នេះនិយាយប្រាប់ឱ្យដឹងថា ក្រោយពីរៀបការបានគ្នាជាប្តីប្រពន្ធ រូបគេបាននាំប្រពន្ធទៅធ្វើការនៅរោងចក្រកាត់ដេរឯភ្នំពេញ តែដោយទទួលបានប្រាក់ខែតិចតួចពេកក៏នាំគ្នាទៅធ្វើការនៅស្រុកថៃ ។ លុះពេលប្រពន្ធមានទម្ងន់ក៏ត្រឡប់មកស្រុកកំណើតវិញ ហើយប្រពន្ធជិតគ្រប់ខែក៏នាំមកឱ្យគ្រូពេទ្យពិនិត្យមើលពោះ ប៉ុន្តែគ្រូពេទ្យនៅមណ្ឌលសុខភាពស្តេចគង់ខាងលិចប្រាប់ថាមានផ្ទៃពោះធំម្ល៉ឹងៗពិតជាកូនភ្លោះ៣ហើយ ។
ពេលប្រពន្ធឈឺពោះក៏នាំប្រពន្ធមកកាន់មន្ទីរពេទ្យបង្អែកស្រុកកំពង់ត្រាចហើយមិនទាន់សម្រាកបានមួយយប់ផង នៅវេលាម៉ោង៤រសៀលថ្ងៃទី១៥ ឧសភា ប្រពន្ធក៏ឆ្លងទន្លេកើតបានកូនភ្លោះ៣នាក់សុទ្ធតែប្រុស ។ ឪពុកកូនភ្លោះ៣នេះនិយាយទៀតថា ប្រពន្ធគាត់ឆ្លងទន្លេនេះគឺជាកូនដំបូងព្រោះទើបតែរៀបការបានជាង១ឆ្នាំប៉ុណ្ណោះ ។
ក្រោយពីឆ្លងទន្លេរួចសុខភាពម្តាយនិងកូនភ្លោះទាំង៣នាក់នេះមានសុខភាពល្អទេ ហើយម្តាយឪពុកនិងក្រុមសាច់ញាតិកូនភ្លោះ៣ត្រេកអរណាស់ ព្រោះគេបានដឹងថាកូនភ្លោះ៣នាក់ក៏ជាកូនសម្តេចតេជោ ហ៊ុន សែន ដែលលោកមិនដែលមើលរំលងឡើយឱ្យតែកើតបានកូនភ្លោះ៣សម្តេចតែងជួយឧបត្ថម្ភគ្រប់គ្នា ។ ជាអកុសលរំលងបានតែ១ថ្ងៃ កូនភ្លោះ២នាក់ក៏ស្លាប់ទៅវិញ និងនៅសល់តែម្នាក់ប៉ុណ្ណោះ ៕
ចែករំលែកព័តមាននេះ