រាជធានីភ្នំពេញ ៖ តារាចម្រៀងសួស វីហ្សា ទើបតែត្រឡប់មកពីសម្តែងនៅអូស្ត្រាលីវិញ កាលពីថ្ងៃទី៧ ឧសភា ដោយស្ពាយភាពជោគជ័យមកជាមួយ ប៉ុន្តែបែរជាមានជំងឺ ហើយសម្ងំនៅក្នុងផ្ទះដើម្បីព្យាបាល ។ សួស វីហ្សា ប្រាប់កោះសន្តិភាពឱ្យដឹងតាមទូរស័ព្ទកាលពីថ្ងៃទី១២ ឧសភា ថា ចាប់តាំងពីវិលមកពីបរទេសវិញ នាងមិនបានចេញទៅណាទេ គឺសម្ងំមើលថែសុខភាព ព្រោះពេលនាងចេញទៅច្រៀងនៅប្រទេសអូស្ត្រាលីនាងចាញ់អាកាសធាតុខ្លាំងរហូតបណ្តាលឱ្យឈឺតែម្តង ។
តារាចម្រៀង និងអ្នករបាំរូបនេះប្រាប់ឱ្យដឹងទៀតថា នាងបានជិះយន្តហោះទៅច្រៀងនៅរដ្ឋជាច្រើន ហើយអាកាសធាតុមិនដូចគ្នាទេ គឺរដ្ឋខ្លះក្តៅខ្លាំងពេលថ្ងៃ ហើយត្រជាក់ខ្លាំងនៅពេលយប់វិញ ឯរដ្ឋខ្លះទៀតត្រជាក់ខ្លាំងណាស់នាងទ្រាំស្ទើរតែមិនបាន ដូច្នេះបន់ឱ្យតែដល់ថ្ងៃ មកស្រុកវិញ ។ ទោះបីជាអាកាសធាតុនៅទីនោះ ខុសពីកម្ពុជាពិតមែន តែនាងចង់ទៅជាលើកទីពីរ ដើម្បីឱ្យសាុំទៅនឹងអាកាសធាតុ ហើយឆាប់ៗនេះនាងប្រហែលជាមានដំណឹងល្អ ទាក់ទងទៅនឹងការចេញទៅច្រៀងជាលើកទីពីរ តែនៅមិនទាន់ច្បាស់លាស់នៅឡើយទេ ។
កញ្ញាសួស វីហ្សា រៀបរាប់ថា នៅពេលត្រឡប់មកប្រទេសវិញ នាងមិនបានប្រាប់ឱ្យអ្នកណាដឹងទេក្រៅពីផលិតកម្មរបស់នាង ។ ពេលនេះជំងឺរបស់នាងគ្រាន់បើជាងមុន ហើយត្រៀមទៅថតចម្រៀងបញ្ចប់ជាមួយលោកឆន សុវណ្ណរាជ និងបទថ្មីៗជាច្រើនទៀតដែលក្រុមហ៊ុនរៀបចំឱ្យនាង ។
បន្ទាប់ពីឈានជើងចូលផលិតកម្មហង្សមាសមកស្រីស្អាតសួស វីហ្សា ហាក់ឡើងកូដស្រឺតៗជាលំដាប់បើទោះជាក្នុងផលិតកម្មមានតារាចម្រៀងច្រើននាក់ក៏ដោយ ។ ចំណែកឯរឿងស្នេហាវិញវីហ្សានៅតែមិនទាន់មានអ្នកណានៅក្នុងចិត្តនៅឡើយទេ ដោយនាងអះអាងថា នាងមិនចង់យកខួរក្បាលគិតទេចំពោះរឿងនេះគឺនាងគិតតែរឿងអាជីពសិល្បៈប៉ុណ្ណោះ ៕
ចែករំលែកព័តមាននេះ