នេះគឺជាព័ត៌មានដ៏គួរឱ្យតក់ស្លុតបំផុតសម្រាប់ស្ត្រីទូទាំងពិភពលោកបន្ទាប់ពីតារាសម្តែងហូលីវូដជើងចាស់អេនចេលីណា ចូលីបានបើកកកាយទម្លាយអាថ៌កំបាំងខ្សែជីវិតចំពោះការវះកាត់សុដន់ទាំងសងខាង ដើម្បីចៀសផុតពីជំងឺមហារីកសុដន់ ។នេះគឺជាការសម្រេចយ៉ាងវៃឆ្លាត និងក្លាហានបំផុតរបស់កំពូលតារាហូលីវូដវ័យ៣៧ ដែលហា៊នលះបង់ទ្រព្យសម្បត្តិមហាសាលរបស់នាងចោល បន្ទាប់ពីទទួលបានការផ្តល់យោបល់ពីក្រុមវេជ្ជបណ្ឌិតថា នាងប្រឈមមុខនឹងជំងឺមហារីកសុដន់៨៧ភាគរយ និងជំងឺមហារីកអូវែ៥០ភាគរយ ។
នៅក្នុងកិច្ចសំភាសន៍ជាមួយកាសែត New York Times ចូលីបាននិយាយថា ៖ «ម្តាយរបស់ខ្ញុំបានតស៊ូរស់នៅជាមួយនឹងជំងឺមហារីកអស់រយៈពេល១ទសវត្សរ៍ ទីបំផុតគាត់ក៏ទទួលមរណភាពក្នុងវ័យ៥៦ឆ្នាំ ។ ខ្ញុំបានវះកាត់សុដន់អស់រយៈពេល៣ខែកន្លងមកហើយ ទើបតែបញ្ចប់កាលពីថ្ងៃទី២៧ មេសា ឆ្នាំ២០១៣ តែខ្ញុំបានរក្សាការសម្ងាត់នេះតាំងពីដំបូងរហូតមក ទើបតែពេលនេះខ្ញុំសម្រេចចិត្តបង្ហាញជាសាធារណៈដើម្បីឱ្យស្ត្រីដទៃទៀតទទួលបានផលប្រយោជន៍ពីបទពិសោធន៍របស់ខ្ញុំ» ។
ក្រោយការវះកាត់ក្រុមគ្រូពេទ្យនិយាយថា ជំងឺមហារីករបស់នាងចូលី និងមិនមានការរាលដាលទៀតទេ ហើយជាមួយគ្នាដែរ សុដន់របស់នាងទាំងពីរត្រូវបានគេបណ្តុះឡើងវិញតាមបច្ចេកវិទ្យាទំនើប ដើម្បីលួងចិត្តស្វាមីរបស់នាងគឺលោក ប្រេដ ភីត ។ ទន្ទឹមនឹងការវះកាត់បានជោគជ័យ តារាសម្តែងដែលជាឯកអគ្គរដ្ឋទូតសុច្ឆន្ទៈអង្គការសហប្រជាជាតិរូបនេះ ក៏បានអរគុណដល់ស្វាមីរបស់នាងគឺលោកប្រេដភីត រួមទាំងកូនៗ៦នាក់ដែលជួយផ្តល់កម្លាំងចិត្តបង្ហាញវត្តមានពេលនាងកំពុងវះកាត់ក្នុងមន្ទីរពេទ្យ ៕
ចែករំលែកព័តមាននេះ