រាជធានីភ្នំពេញ ៖ បុរសជនជាតិបារាំងម្នាក់ត្រូវបានគេប្រទះឃើញស្លាប់នៅលើកៅអីសាឡុងក្នុងផ្ទះលេខ៤៥E4 ផ្លូវលេខ៥១ ភូមិទី១ សង្កាត់ផ្សារថ្មីទី៣ ខណ្ឌដូនពេញ កាលពីវេលាម៉ោង១០និង៣០នាទីព្រឹកថ្ងៃទី១២ ឧសភា ។ មន្ត្រីនគរបាលមូលដ្ឋានបានឱ្យដឹងថា បុរសជនជាតិបារាំងដែលគេឃើញដេកស្លាប់នៅលើកៅអីសាឡុងក្នុងផ្ទះខាងលើនោះមានឈ្មោះ NYHEIM JIMMY អាយុ៥៦ឆ្នាំ កាន់លិខិតឆ្លងដែនលេខ២៨៨៧១១៧៨ ចូលមកប្រទេសកម្ពុជាក្នុងអំឡុងខែមីនា ឆ្នាំ២០០២ ហើយបានស្នាក់នៅផ្ទះកើតហេតុ ។
យោងតាមចម្លើយស្ត្រីម្នាក់ជាអ្នកបោសសម្អាតផ្ទះបុរសជនជាតិបារាំងនេះបានប្រាប់ឱ្យសមត្ថកិច្ចដឹងថា នៅព្រឹកថ្ងៃទី១២ ឧសភា វេលាម៉ោង១០និង៣០នាទី គាត់បានឡើងទៅលើផ្ទះបុរសជនជាតិបារាំងឈ្មោះ NYHEIM JIMMY ដើម្បីបោសសម្អាតតាមទម្លាប់ដែលត្រូវធ្វើជាប្រចាំ ខណៈពេលឡើងមកដល់មិនឃើញម្ចាស់ផ្ទះបើកទ្វារដូចសព្វដង ។ ពេលនោះគាត់ក៏តោងបង្អួចមើលស្រាប់តែឃើញបុរសជនជាតិបារាំងជាម្ចាស់ផ្ទះបានដេកស្លាប់នៅលើកៅអីសាឡុងក្នុងផ្ទះមុខបន្ទប់ដេករបស់គាត់ ទើបមានការភ្ញាក់ផ្អើលហើយរាយការណ៍ឱ្យសមត្ថកិច្ចជំនាញចុះមកពិនិត្យក្រែងជាករណីឃាតកម្ម ។
តាមការអះអាងរបស់ប្រជាពលរដ្ឋដែលដឹងេហតុការណ៍បានឱ្យដឹងថា ជានិច្ចកាលបុរសជនជាតិបារាំងខាងលើនេះតែងតែទៅផឹកស៊ី នៅហាងបារាំងម្តុំផ្លូវលេខ៥១ ស្ថិតក្នុងសង្កាត់ផ្សារថ្មីទី៣ ខណ្ឌដូនពេញជាប្រចាំនៅពេលយប់ ហើយគេក៏បានលួចប្រើប្រាស់គ្រឿងញៀនផងដែរ ។ បុរសជនជាតិបារាំងរូបនេះ មិនមានប្រពន្ធទេ តែបើស្រីដូរម៉ាកដូចដូរខោអាវអុីចឹង ប៉ុន្តែគេជាមនុស្សស្លូតមិនដែលមានទំនាស់ជាមួយប្រជាពលរដ្ឋជិតខាងនោះឡើយ ។
នគរបាលជំនាញបានឱ្យដឹងថា បើតាមការអះអាងពីក្រុមគ្រូពេទ្យដែលចូលទៅពិនិត្យលើសាកសពបានបង្ហាញថា បុរសជនជាតិបារាំងសា្លប់ដោយសារគាំងបេះដូង មិនមែនជារឿងឃាតកម្មនោះទេ ៕
ចែករំលែកព័តមាននេះ