សមត្ថកិច្ចដកដើមកញ្ឆា៥១ដើមបំផ្លាញចោល និងឃាត់ខ្លួនអ្នកដាំ
ដោយ ៖ អប្សរា
ថ្ងៃព្រហស្បត្ត៏ ទី៩ ខែកញ្ញា ឆ្នាំ២០១០ ម៉ោង ១០:២០
នាយកឺប
សមត្ថកិច្ចឃាត់ខ្លួនបុរសជាអ្នកដាំ
ខេត្តកំពត ៖ ដើមកញ្ឆា៥១ដើម ត្រូវបានសមត្ថកិច្ចដកបំផ្លាញចោល និងឃាត់ខ្លួនបុរសជាអ្នកដាំ កាលពីវេលាម៉ោង១រសៀលថ្ងៃទី៧ កញ្ញា នៅភូមិជ្រោះតាសោម ឃុំប្រាសាទភ្នំខ្យង ស្រុកកំពង់ត្រាច ។ ការចុះបង្ក្រាប និងដកបំផ្លាញរុក្ខជាតិគ្រឿងញៀននេះ ក៏មានលោកអ៊ិន ជីវ៉ា ស្នងការរង និងជាប្រធានការិយាល័យកណ្តាលនគរបាលយុត្តិធម៌ រួមទាំងមន្ត្រីនគរបាលឃុំស្តេចគង់ខាងលិច ស្រុកបន្ទាយមាសផងដែរ ។
លោកអ៊ិន ជីវ៉ា ស្នងការរងបានមានប្រសាសន៍ថា ដើមកញ្ឆាចំនួន៥១ដើម ត្រូវបាននគរបាលខេត្តចុះទៅដកបំផ្លាញចោលដែលដើមកញ្ឆាទាំងនោះគេលួចដាំបន្លំភ្នែកនៅក្នុងចំការអំពៅ ។ ជាមួយគ្នានេះ សមត្ថកិច្ចបានឃាត់ខ្លួនបុរសជាអ្នកដាំកញ្ឆាឈ្មោះ ស ហាង អាយុ៥១ឆ្នាំ ។ ឯកន្លែងលួចដាំកញ្ឆានេះ នៅតំបន់ព្រំប្រទល់ឃុំ២ គឺឃុំប្រាសាទភ្នំខ្យង និងឃុំស្តេចគង់ខាងលិច ហើយអាជ្ញាធរទាំង២ឃុំនេះ បានបដិសេធថា កន្លែងលួចដាំកញ្ញានេះ មិនបានស្ថិតក្នុងភូមិសាស្ត្រគ្រប់គ្រងរបស់ខ្លួនទេ ។
លោកង៉ែត វ៉ាត ប្រធាននគរបាលប៉ុស្តិ៍ស្តេចគង់ ប្រាប់ថា ភូមិសាស្ត្រដាំកញ្ឆា ដែលបានរកឃើញនោះគឺនៅលើដីជ្រោះតាសោម រីឯលោកវណ្ណ ថា នាយរងប៉ុស្តិ៍ប្រាសាទភ្នំខ្យង និយាយថា ដីដាំកញ្ឆា៥១ដើមនេះជាដីនៅភូមិដើមចំរៀក ។ ការវង្វេងពីតំបន់គ្រប់គ្រងនេះមកពីភូមិ២ មានឃុំផ្សេងគ្នាជាប់ព្រំប្រទល់ តែទោះជាបែបណា ក៏គេបានស្គាល់ថា ចំការរបស់ឈ្មោះ ស ហាង ស្ថិតនៅលើភូមិជ្រោះតាសោមច្រើនជាងភូមិដើមចំរៀកដែរ ៕
