រាជធានីភ្នំពេញ ៖ សម្តេចអគ្គមហាសេនាសបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជានារសៀលថ្ងៃទី២៥ មេសា បានដឹកនាំគណៈប្រតិភូត្រឡប់មកពីចូលរួមកិច្ចប្រជុំកំពូលអាស៊ានលើកទី២២ នៅទីក្រុងបេនដារ សេរីបេហ្គាវ៉ាន់ ប្រទេសប៊្រុយណេ ដារូសាឡឹមវិញហើយ ។
លោកកៅ គឹមហ៊ួន រដ្ឋលេខាធិការក្រសួងការបរទេស និងសហប្រតិបត្តិការអន្តរជាតិបានប្រាប់ពីលទ្ធផលកិច្ចប្រជុំកំពូលអាស៊ានលើកទី២២ ចង្អៀតដែលមានប្រធានបទ៤ គឺថ្នាក់ដឹកនាំប្រមុខ ប្រមុខរដ្ឋាភិបាលទាំងអស់បានធ្វើការពិភាក្សាគ្នាយ៉ាងយកចិត្តទុកដាក់ក្នុងកិច្ចខិតខំប្រឹងប្រែងកសាងសហគមន៍អាស៊ាននៅឆ្នាំ២០១៥ និងក្រោយឆ្នាំ២០១៥ ។
នៅក្នុងក្របខណ្ឌអាស៊ាននេះធ្វើយ៉ាងណាសម្រួលឱ្យខាងយុវជនដើរតួនាទីទៅមុខ ។ ដោយឡែកចំពោះសហគមន៍អាស៊ានមាន៣ចំណុច ដែលលើកស្នើដោយប្រធានអាស៊ាន គឺធ្វើយ៉ាងណាឱ្យជនជាតិអាស៊ានមានទិដ្ឋាការឆ្លងដែនដោយមិនបាច់បង់លុយ ។ ធ្វើយ៉ាងណាឱ្យមានឆាកអន្តរជាតិរបស់ភាគីនីមួយៗសម្រាប់អន្តោប្រវេសន៍ដែលអាចឱ្យជនជាតិអាស៊ានឆ្លងដែន និងធ្វើយ៉ាងណាឱ្យមានប័ណ្ណសម្រាប់អ្នកធុរកិច្ចអាស៊ាន ដើម្បីងាយស្រួលក្នុងការធ្វើដំណើរឆ្លងកាត់ប្រទេសនីមួយៗរបស់អាស៊ាន ។
លោករដ្ឋលេខាធិការបន្តថា អំពីអនាគតនៃអាស៊ាននេះភាគច្រើនប្រមុខរដ្ឋ ប្រមុខរដ្ឋាភិបាលបានផ្តោតទៅលើការពិនិត្យឡើងវិញនូវធម្មនុញ្ញអាស៊ានដូចជា ការពង្រឹងអគ្គលេខាធិការអាស៊ាន តួនាទីរបស់អគ្គលេខាធិការ ក៏ដូចជា ត្រូវពិនិត្យមើលឡើងវិញនូវស្ថាប័ននេះមិនឱ្យមានភាពលំអៀងនិងមានប្រសិទ្ធភាពជាងមុន ៕
ចែករំលែកព័តមាននេះ