ខេត្តសៀមរាប ៖ សំណង់សណ្ឋាគារធំៗ ក្លិបរាត្រី ហាងឌីស្កូដ៍សំបូរបែបបំពាក់គ្រឿងសង្ហារិមប្រណីតៗ រួមទាំងមានលម្អដោយភ្លើងអំពូលចម្រុះពណ៌នាពេលរាត្រីទាំងអស់នោះ វាគ្រាន់តែជាការឆ្នៃប្រឌិតរបស់មនុស្សជំនាន់ក្រោយប៉ុណ្ណោះ មិនមែនជាបេះដូង ឬជាដួងព្រលឹងនៃទីក្រុងទេសចរណ៍សៀមរាបទេ។
បេះដូងនិងដួងព្រលឹងរបស់ទីក្រុងសៀមរាបគឺជាប្រាសាទបុរាណនៅឆ្ងាយពីទីប្រជុំជនក្រុងឯណោះទេ ពិសេស «អង្គរវត្ត» ដែលឈរបង្ហាញខ្លួនយ៉ាងត្រដែតចាំទទួលភ្ញៀវទេសចរជាតិ-អន្តរជាតិអស់រយៈពេលរាប់រយឆ្នាំមកហើយ ដោយមានស្ទឹងប្រវត្តិសាស្ត្រសៀមរាបជាអ្នកដើរតួដ៏សំខាន់ក្នុងការនាំទឹកមកបន្សើមគ្រឹះរបស់វា ប៉ុន្តែបច្ចុប្បន្នខ្សែទឹកមួយនេះកំពុងក្លាយទៅជាក្តីបារម្ភដ៏ធំធេងបំផុតមួយសម្រាប់ក្រុមអ្នកអភិរក្សប្រាសាទបុរាណ ខណៈតំបន់ជួរភ្នំគូលែនដែលជាប្រភពទឹកស្ទឹងនេះត្រូវបានគំរាមកំហែងធ្វើឲ្យកម្រិតទឹកនៅរដូវប្រាំងធ្លាក់ចុះស្ទើរតែរីងហួតអស់ពីបាតស្ទឹងទៅហើយ។
អគ្គនាយកអាជ្ញាធរអប្សរា លោកប៊ុន ណារិទ្ធ ដែលគ្រប់គ្រងប្រាសាទបុរាណ រួមទាំងស្ទឹងប្រវត្តិសាស្រ្តសៀមរាបផងដែនោះ បានមានប្រសាសន៍តាមទូរស័ព្ទកាលពីព្រឹកថ្ងៃទី២៤ មេសា ២០១៣ ថា តាមការកត់សម្គាល់ពីមួយឆ្នាំទៅមួយឆ្នាំកម្រិតទឹកស្ទឹងសៀមរាបនៅរដូវប្រាំងកាន់តែតិចទៅៗ គួរឲ្យព្រួយបារម្ភ ដែលអាចជះឥទ្ធិពលមិនល្អចំពោះការគង់វង្សនៃប្រាសាទបុរាណរាប់រយជាដួងព្រលឹងជាតិខ្មែរ៕
ចែករំលែកព័តមាននេះ