អាជ្ញាធររាយការណ៍កាលពីថ្ងៃទី២៤ មេសាថា មនុស្សយ៉ាងតិច២១នាក់ ក្នុងនោះរួមមានទាំងប៉ូលិសផង បានត្រូវស្លាប់ក្នុងអំពើហិង្សាទាំងឡាយដែលកើតមានកាលពីថ្ងៃទី២៣ មេសា ក្នុងតំបន់ XINJIANG ដែលតែងកើតមានភាពវឹកវរ ។លោកកាវ អ្នកទទួលខុសត្រូវម្នាក់នៃស្រុក BARCHUK នៃតំបន់ XINJIANG មានពួកអ៊ិស្លាមភាគច្រើន នាភាគខាងលិចចិនថ្លែងថា សរុបមនុស្ស២១នាក់បានត្រូវស្លាប់ ។ ដំបូងមានមនុស្សស្លាប់១៥នាក់ ក្នុងនោះមានប៉ូលិស និងបណ្តាភ្នាក់ងាររបស់ក្រុង បន្ទាប់មកពេលមានការប៉ះទង្គិចគ្នា ពួកអ្នកវាយប្រហារ៦នាក់ត្រូវបានបាញ់សម្លាប់ ។ អាជ្ញាធរ XINJIANG អះអាងថា អំពើហិង្សាផ្ទុះឡើងពីក្រុមមួយដែលរៀបចំអំពើភេរវកម្មនានា ។
នៅតំបន់ XINJIANG តែងកើតមានភាពវឹកវរ ដោយសារតែមានភាពតានតឹងខ្លាំងរវាងពួកហានដែលមានភាគច្រេើននៅចិន និងពួកអ៊ូយហ្គួរ(ជាពួកអ៊ិស្លាម) ។លោកកាវបញ្ជាក់ថា មនុស្ស៨នាក់បានត្រូវចាប់ខ្លួន ។ពួកអ៊ូយហ្គួរបានបរិហារពីការគាបសង្កត់ខាងវប្បធម៌ និងខាងសាសនាប្រឆាំងពួកគេ ព្រមទាំងពីការហូរចូលច្រើននៃពួកហាន ដែលជាអ្នកពូកែរកស៊ី ធ្វើឱ្យមានការអភិវឌ្ឍន៍តំបន់នោះ ដែលនៅក្រីក្រតែសម្បូរដោយធនធានធម្មជាតិ៕
ចែករំលែកព័តមាននេះ