ស្ត្រីមានផ្ទៃពោះ៩ខែត្រូវចោរគាស់ទ្វារក្រោយចូលប្លន់យកប្រាក់ជាង១ម៉ឺនដុល្លារ
ដោយ ៖ឈិត គឹមឆុន
ថ្ងៃសុក្រ ទី៣ ខែកញ្ញា ឆ្នាំ២០១០ ម៉ោង ១៩:០៤
កោះសន្តិភាព
ស្ត្រីស៊ិន ម៉ូលីកាដែលត្រូវចោរគាស់ទ្វារក្រោយចូលប្លន់
រាជធានីភ្នំពេញ ៖ ស្ត្រីមានផ្ទៃពោះ៩ខែស្ថិតក្នុងគ្រួសារអ្នកធូរធារម្នាក់ត្រូវបានក្រុមចោរមានគ្នា២នាក់ លបគាស់ទ្វារសំរុកចូលប្លន់យកលុយ និងគ្រឿងអលង្ការជាង១ម៉ឺនដុល្លារ ហើយគេចខ្លួនបាត់ បន្សល់ទុកឱ្យនាងដេកសន្លប់ស្តូកស្តឹង បន្ទាប់ពីពួកចោរវាយដំបង្ខំយកទ្រព្យសម្បត្តិយ៉ាងឃោរឃៅ ។អំពើចូលប្លន់ដល់ក្នុងផ្ទះនេះបានកើតឡើងកាលពីវេលាម៉ោង៤រសៀលថ្ងៃទី៣ កញ្ញា ២០១០ នៅចំណុចផ្ទះលេខI២៨ ផ្លូវបេតុង ភូមិត្រពាំងល្វា សង្កាត់កាកាប ខណ្ឌដង្កោ ។ ស្ត្រីរងគ្រោះឈ្មោះស៊ិន ម៉ូលីកា អាយុ១៩ឆ្នាំ មានផ្ទៃពោះ៩ខែ ជិតដល់ថ្ងៃឆ្លងទន្លេទៅហើយ (សំរាលកូន) ក៏ត្រូវទទួលរងការវាយដំយ៉ាងខ្លាំងក្លាពីសំណាក់ពួកចោរថែមទៀត។ ចំណែកពួកចោរមានគ្នាពីរនាក់ មិនត្រូវបានគេស្គាល់អត្តសញ្ញាណទេ ព្រោះពួកគេបានរត់គេចខ្លួនបាត់ក្រោយពេលប្រមូលយកលុយខ្មែរ លុយបាត (ប្រាក់ថៃ) លុយដុល្លារ និងគ្រឿងអលង្ការសរុបជាង១ម៉ឺនដុល្លារ ។
តាមប្រភពព័ត៌មានបានឱ្យដឹងថា មុនពេលកើតហេតុស្ត្រីស៊ិន ម៉ូលីកា នៅផ្ទះជាមួយក្មួយតូចម្នាក់ និងប្អូនស្រីជីដូនមួយម្នាក់ ពេលនោះ នាងនឹកឃ្លានម្ជូរក៏ប្រើប្អូន និងក្មួយឱ្យទៅទិញម្ជូរមកទទួលទាន ។ បន្ទាប់ពីអ្នកទាំង២ចេញទៅបាត់ ស្រាប់តែពួកចោរ២នាក់បានលបចូលផ្ទះតាមទ្វារក្រោយ ដោយប្រើដែកស្បែងគាស់ទ្វារគឺគាស់ទ្វារពីរជាន់របើកចូលទៅខាងក្នុង ហើយចាប់នាងស៊ិន ម៉ូលីកា ចងដៃ ចងជើងនឹងខ្សែនីឡុង រួចហើយវាយដំសម្លុតឱ្យនាងយកលុយ និងគ្រឿងអលង្ការចេញមក ។
ពួកចោរបានវាយនាងស៊ិន ម៉ូលីកា រហូតដល់សន្លប់ ទើបធ្វើការរុករើយកលុយ និងគ្រឿងអលង្ការចេញទៅបាត់...លុះពេលក្មួយ និងប្អូនជីដូនមួយត្រឡប់មកពីទិញម្ជូរវិញ ហៅទ្វារ៤ទៅ៥ម៉ាត់ មិនឮអ្នកឆ្លើយឆ្លង ក៏មើលតាមចន្លោះប្រហោងឃើញបងស្រីដួលសន្លប់ដោយមានចំណងជាប់ដៃជើង និងរបួសលើដងខ្លួន ទើបស្រែកឆោឡោឡើង បង្កឱ្យមានការភ្ញាក់ផ្អើលតែម្តង ៕
