សម្តេចតេជោហ៊ុន សែន ៖ អាស៊ាន-អ.ស.ប អាចជួយបញ្ចប់កិច្ចឈប់បាញ់ ប៉ុន្តែការសម្រេចចុងក្រោយលើជម្លោះព្រំដែន គឺតុលាការអន្តរជាតិ
ដោយ ៖ ប្រុសកោះ
ថ្ងៃអង្គារ ទី២២ ខែកុម្ភៈ ឆ្នាំ២០១១ ម៉ោង ១៤:១៩
សហការី
សម្តេចនាយករដ្ឋមន្រ្តីហ៊ុន សែន ថ្លែងក្នុងវេទិកា
រាជធានីភ្នំពេញ ៖ សម្តេចតេជោនាយករដ្ឋមន្ត្រីហ៊ុន សែន បានមានប្រសាសន៍ថា អង្គការសហប្រជាជាតិ និងអាស៊ាន មិនអាចកាត់សេចក្តីរឿងជម្លោះព្រំដែនកម្ពុជា-ថៃបានទេ ព្រោះអង្គការ-សមាគមនេះមិនមែនជាតុលាការ...ហើយអ្នកដែលអាចកាត់សេចក្តីថា អ្នកណាយ៉ាងម៉េច? ព្រំដែនកន្លែងនេះជារបស់អ្នកណា? គឺមានតែតុលាការយុត្តិធម៌អន្តរជាតិប៉ុណ្ណោះ ទើបអាចកាត់សេចក្តីបាន ព្រោះបែបបទផ្លូវច្បាប់ រួមមានផែនទីសន្ធិសញ្ញាអន្តរជាតិបារាំង-សៀម និងសាលក្រមស្ថាពររបស់តុលាការយុត្តិធម៌អន្តរជាតិនោះដែរយើងមានគ្រប់គ្រាន់អស់ហើយ។
សម្តេចតេជោនាយករដ្ឋមន្ត្រីលើកឡើងបែបនេះ ខណៈសម្តេច និងលោកជំទាវបណ្ឌិត អញ្ជើញជាអធិបតីក្នុងពិធីប្រគល់សញ្ញាបត្រដល់និស្សិតនៅសាកលវិទ្យាល័យភូមិន្ទភ្នំពេញ កាលពីព្រឹកថ្ងៃទី២២ កុម្ភៈ ២០១១ ។ សម្តេចបានបញ្ជាក់ថា យើងមានជំនឿ គាំទ្រអាស៊ាន និងអង្គការសហប្រជាជាតិជួយធ្វើអន្តរាគមន៍ក្នុងរឿងជម្លោះឈ្លានពាននេះ ហើយអង្គការទាំងពីរនេះអាចដោះស្រាយបានដោយប្រសិទ្ធភាពផងដែរ ដូចជាតម្រូវឱ្យមានកិច្ចឈប់បាញ់ជាអចិន្ត្រៃយ៍ ជាអ្នកសម្របសម្រួល សង្កេតការណ៍រកខុសត្រូវ ជាអាជ្ញាកណ្តាល និងជាសាក្សីដ៏សំខាន់...។
សម្តេចតេជោនាយករដ្ឋមន្ត្រីសង្កត់ធ្ងន់ថា ចំណែកឯការសម្រេចចុងក្រោយអំពីជម្លោះព្រំដែន និងការបកស្រាយអំពីប្រាសាទព្រះវិហារនោះ គឺមានតែតុលាការយុត្តិធម៌អន្តរជាតិក្រុងឡាអេប៉ុណ្ណោះ ទើបអាចកាត់សេចក្តីបានប្រកបដោយប្រសិទ្ធភាព និងចប់សព្វគ្រប់ទៀតផង...ហើយជាមួយគ្នានេះដែរ រដ្ឋាភិបាលកម្ពុជាបានតៀមអ្នកច្បាប់ ឬមេធាវី៣រូប រួចហើយសម្រាប់តស៊ូមតិប្តឹងទៅតុលាការអន្តរជាតិពីការឈ្លានពានរបស់សៀមលើជម្លោះព្រំដែន និងប្តឹងឱ្យបកស្រាយសាលក្រមស្ថាពររបស់តុលាការនេះផងដែរ ដែលបានសម្រេចអធិបតេយ្យភាពព្រំដែនប្រទេសកម្ពុជា និងប្រាសាទព្រះវិហារ រួចមកហើយកាលពីឆ្នាំ១៩៦២ ៕
