រាជធានីភ្នំពេញ ៖ នៅលើសង្វៀនបាយ័នបឹងស្នោនាថ្ងៃសុក្រទី៥ មេសា ស្អែកនេះអ្នករៀបចំកម្មវិធីបានបង្កើតនូវព្រឹត្តិការណ៍ប្រកួតប្រដាល់ជាលក្ខណៈអន្តរជាតិសាជាថ្មីម្តងទៀត ក្នុងន័យលើកកម្ពស់ក្បាច់គុនបុរាណខ្មែរ ដែលធ្វើឡើងដើម្បីអបអរឱកាសចូលឆ្នាំថ្មីប្រពៃណីជាតិខ្មែរផងដែរ ។
នៅថ្ងៃស្អែកនេះទស្សនិកជនក្រៅពីបានទស្សនាការប្រកួតកីឡាករជើងខ្លាំងមួយចំនួនហើយនោះ នឹងជក់ចិត្តមួយកម្រិតទៀតជាមួយកំពូលអ្នកប្រដាល់ល្បីឈ្មោះកែវ រំចង់ មកពីក្លិបកងពលតូចអន្តរាគមន៍លេខ៨ភ្នំទ្រព្យ ប៉ះជាមួយកីឡាករមកពីប្រទេសថៃ Pich Asawine ខណៈដែលកីឡាករជើងចាស់វាយមិនចេះខ្លាច ជ័យ កុសល មកពីក្លិបសិង្ហកីឡាត្រូវប្រកួតជាមួយជើងខ្លាំងមកពីប្រេស៊ីល Jero Alves Franca Neto ។ មជ្ឈដ្ឋានដែលបានដឹងច្បាស់ពីស្នៀតប្រដាល់របស់កីឡាករខ្មែរយើងកំពុងតែរង់ចាំអ៊ុតមើលតើអ្នកប្រដាល់កម្ពុជា ២រូបនេះអាចបំបាក់កីឡាករបរទេសបានឬអត់នាថ្ងៃស្អែកនេះ ដែលមានផ្សាយបន្តផ្ទាល់ចាប់ពីម៉ោង៤និង៣០នាទីរសៀលតទៅ ។
សម្រាប់គូអន្តរជាតិទី១រវាងកំពូលអ្នកប្រដាល់កែវ រំចង់ ជួបប្រកួតជាមួយកីឡាករថៃ Pich Asawine នោះអ្នកគាំទ្ររំចង់ពិបាកប៉ាន់ស្មានស្នៀតគុនគេណាស់ ព្រោះកីឡាករថៃដែលមកនេះក៏មិនមែនអន់ដែរ បើមិនអ៊ីចឹងគេក៏មិនមកចាប់គូប្រកួតជាមួយជើងខ្លាំងប្រចាំស្រុកខ្មែរឡើយ ។
យោងតាមប្រភពពីអ្នករៀបចំកម្មវិធីប្រចាំទូរទស្សន៍បាយ័នបានឱ្យដឹងខ្លះៗថា កីឡាករថៃដែលមកប្រកួតជាមួយរំចង់នោះ គេគឺជាម្ចាស់ខ្សែក្រវាត់ដល់ទៅ៣ឯណោះ ។ ចំណែកប្រវត្តិឡើងរេញប៉ុន្មានដង មានឈ្នះមានចាញ់ប៉ុន្មានដងនោះនៅមិនទាន់ដឹងនៅឡើយទេ គ្រាន់តែដឹងថា ខាងថៃគេមានសមត្ថភាពខ្លាំងមិនធម្មតាឡើយ ដែលទាមទារឱ្យរំចង់ជាម្ចាស់ផ្ទះ ត្រូវតែប្រុងប្រយ័ត្នឱ្យបានខ្ពស់លើសពេលណាទាំងអស់ និងបន្តការហ្វឹកហាត់បន្ថែមទៀតជាការល្អសម្រាប់ទប់ទល់ ។
ចំពោះកែវ រំចង់ វិញ គេក៏មិនអន់ជាងកីឡាករថៃដែរ ព្រោះបើគិតទៅគេមានសមត្ថភាពគ្រងខ្សែក្រវាត់ដល់ទៅ៤ឯណោះ ក្នុងនោះស្ពាយមកពីប្រទេសបារាំង២ និងបានមកពីធ្វើការប្រកួតក្នុងស្រុកខ្មែរ២ថែមទៀត ។ កេរ្តិ៍ឈ្មោះគេកាន់តែល្បីថែមទៀតបន្ទាប់ពីវាយឈ្នះជើងខ្លាំងរបស់ថៃ Jatsda ដោយពិន្ទុកាលពីដើមខែមករាកន្លងទៅ ។ រំចង់ធ្លាប់ផ្តួលកីឡាករបរទេសឱ្យដួលរាបជាច្រើននាក់ហើយ គឺមានអូស្ត្រាលី ជប៉ុន បារាំង អាល្លឺម៉ង់ ប្រេស៊ីល និងអ៊ូសបេគីស្ថានជាដើម ។ អ៊ីចឹងគេអាចចាប់អារម្មណ៍ថា គូប្រកួតទី១ អន្តរជាតិនឹងបើកឈុតឆាកប្រយុទ្ធបែបញាក់សាច់សាហាវដល់កម្រិតពុំខាន ។
ដោយឡែកគូប្រកួតទី២ ជ័យ កុសល នឹងប៉ះជាមួយកីឡាករប្រេស៊ីលJero Alves Franca Neto ក៏នឹងធ្វើឱ្យសង្វៀនកក្រើកពុំខាន ព្រោះគូនេះក៏ជាគូជក់ចិត្តណាស់ដែរ ។ មួយរយៈនេះ ក្បាច់គុនកុសលបានកើនឡើងជាងមុន បើទោះជាមានអាយុច្រើនបន្តិចមែន តែគេមានកម្លាំងពេញល្អ ។ គេបានធ្វើឱ្យមហាជនលាន់មាត់សរសើរគ្រប់គ្នាកាលពីជួបប្រកួតជាមួយកែវ រំចង់ និងបើកការវាយលុកកក្រើកសង្វៀន ឯលទ្ធផលគឺស្មើគ្នា ។ តាំងពីពេលនោះមក គេត្រូវបានអ្នកគាំទ្រស្រឡាញ់និងចាត់ទុកជាជើងខ្លាំងដូចពីពេលមុន និងមានអ្នកអាណិតស្រឡាញ់ច្រើន ។ តាមប្រវត្តិប្រកួតរំចង់គឺចាញ់កុសល គេធ្លាប់ឡើងរេញបាន២១ដង ឈ្នះ១៩ដង ចាញ់៣ដង មិនដែលស្មើ ។ កុសលធ្លាប់ប៉ះជាមួយកីឡាករបរទេសច្រើននាក់ និងជួបប្រកួតចុងក្រោយចាញ់កីឡាករមកពីប្រទេសថៃ Amin Matli ដោយពិន្ទុ ។ គេមានស្នៀតគុនខ្លាំងខាងកណ្តាប់ដៃរហ័សនិងវាយចេញច្បាស់លាស់ ។ បើនិយាយពីកែងវិញក៏លឿនកម្លាំងស៊ុហ្វក៏គ្រាន់បើ ។ ដោយឡែក Jero គេធ្លាប់មកប្រកួតនៅកម្ពុជាម្តងកាលនោះបានជួបប្រកួតជាមួយភេឌី ម៉ឺនសុភា មកពីក្លិបយុវជនអង្គរ ហើយបានឈ្នះកីឡាករខ្មែររូបនេះ ។ ដោយកីឡាករបរទេសរូបនេះបានស្គាល់ច្បាស់ពីគុនខ្មែរទើបទាមទារឱ្យកុសលមិនត្រូវប្រហែសមួយវិនាទីណាឡើយ ៕
ចែករំលែកព័តមាននេះ