សម្ដេចតេជោនាយករដ្ឋមន្ដ្រីនឹងប្រែក្លាយប្រទេសកម្ពុជាឱ្យទៅជាប្រទេសនាំអង្ករចេញទី៣នៅតំបន់អាស៊ី
ដោយ ៖ អប្សរា
ថ្ងៃអាទិត្យ ទី២៥ ខែកក្កដា ឆ្នាំ២០១០ ម៉ោង ១០:៤៥
ច័ន្ទថា
សម្ដេចតេជោចាប់ដៃស្វាគមន៍លោកឆាលរ៉េ
រាជធានីភ្នំពេញ ៖ លោកអ៊ាង សុផល្លែត ជំនួយការសម្ដេចអគ្គមហាសេនាបតីតេជោ ហ៊ុន សែន នាយករដ្ឋមន្ដ្រីនៃព្រះរាជាណាចក្រកម្ពុជា បានថ្លែងប្រាប់ឱ្យដឹងថា នៅក្នុងជំនួបសំដែងការគួរសមនារសៀលថ្ងៃទី២៣ ខែកក្កដា ឆ្នាំ២០១០ ជាមួយសម្ដេចតេជោ នាយករដ្ឋមន្ដ្រីនៅភូមិគ្រឹះក្បែរវិមានឯករាជ្យ លោក CHARLE RAY អតីតឯកអគ្គរដ្ឋទូតសហរដ្ឋអាមេរិកប្រចាំនៅកម្ពុជា និងជាឯកអគ្គរដ្ឋទូតអាមេរិកប្រចាំនៅហ្សំបាវ៉េ បានសំដែងជាថ្មីម្ដងទៀតនូវអំណរគុណយ៉ាងជ្រាលជ្រៅបំផុតចំពោះសម្ដេចតេជោ នាយករដ្ឋមន្ដ្រី ក៏ដូចជារាជរដ្ឋាភិបាលកម្ពុជា ដែលផ្ដល់នូវកិច្ចសហប្រតិបត្ដិការយ៉ាងល្អប្រសើរ ជាទីបំផុតនៅពេលលោកបំពេញបេសកកម្មនៅកម្ពុជា ។
លោកអតីតឯកអគ្គរដ្ឋទូតអាមេរិករូបនេះបន្ដថា នៅពេលដែលលោកវិលត្រឡប់ មកកម្ពុជានៅពេលនេះគឺដើម្បីចូលរួមក្នុងខួប៦០ឆ្នាំ រវាងទំនាក់ទំនងកម្ពុជា-សហរដ្ឋអាមេរិក ក្នុងនោះលោកមានចំណាប់អារម្មណ៍ និងមានក្ដីរីករាយយ៉ាងខ្លាំងដោយបានឃើញ កម្ពុជាមានការផ្លាស់ប្ដូរនិងរីកចំរើនយ៉ាងខ្លាំងជាទីបំផុត ។ ក្នុងន័យនេះ លោកអតីតឯកអគ្គរដ្ឋទូតបានសំដែងនូវការអបអរសាទរ ចំពោះសម្ដេចតេជោ នាយករដ្ឋមន្ដ្រី ក្នុងការដឹកនាំដ៏ឈ្លាសវៃបាននាំកម្ពុជាឈានទៅការអភិវឌ្ឍ ។
ឆ្លៀតក្នុងឱកាសនោះដែរលោកជំទាវឯកអគ្គរដ្ឋទូតអាមេរិកប្រចាំនៅកម្ពុជាបានមាន ប្រសាសន៍ថ្លែងអំណរគុណចំពោះសម្ដេចតេជោ នាយករដ្ឋមន្ដ្រីដែលបានផ្ដល់ឱកាសជូនលោក WILLIAM J-BURNS អនុរដ្ឋមន្ដ្រីក្រសួង ការបរទេសសហរដ្ឋអាមេរិកចូលជួបសវនាការ ។ លោកជំទាវមានប្រសាសន៍ថា លោក BURNS បានត្រឡប់ទៅទីក្រុងវ៉ាស៊ីនតោនវិញ ប្រកបដោយមោទនភាព និងមានសេចក្ដីរីករាយយ៉ាងខ្លាំងក្នុងគោលបំណងពង្រឹងនិងពង្រីក កិច្ចសហប្រតិបត្ដិការឱ្យបានកាន់តែខ្លាំងថែមទៀតជាមួយព្រះរាជាណាចក្រកម្ពុជា ។
លោកជំទាវឯកអគ្គរដ្ឋទូតប្រចាំកម្ពុជា បានថ្លែងអំណរគុណចំពោះរាជរដ្ឋាភិបាលកម្ពុជាដែលបានផ្ដល់នូវកិច្ចសហប្រតិបត្ដិការ និងបានចូលរួមយ៉ាងសកម្មនៅក្នុងពិធីរៀបចំខួបទី៦០ឆ្នាំទំនាក់ទំនងកម្ពុជា-សហរដ្ឋអាមេរិក ។
ជាការឆ្លើយតបសម្ដេចតេជោនាយករដ្ឋមន្ដ្រីបានថ្លែងអំណរគុណចំពោះសហរដ្ឋអាមេរិក ក៏ដូចជាពាក្យពេចន៍ដ៏ល្អប្រសើរ របស់លោក CHARLE RAY និងលោកជំទាវឯកអគ្គរដ្ឋទូតប្រចាំកម្ពុជា ។ សម្ដេច បានថ្លែងអំណរគុណចំពោះសហរដ្ឋអាមេរិក ដែលបាននាំមកនូវរាល់អតីតឯកអគ្គរដ្ឋទូត សហរដ្ឋអាមេរិកប្រចាំនៅកម្ពុជាទាំងអស់ ដើម្បីប្រារឰធ្វើខួប៦០ឆ្នាំ ទំនាក់ទំនងកម្ពុជា-សហរដ្ឋអាមេរិកនេះ ។ សម្ដេចបានជំរាប ជូនលោក CHARLE RAY អំពីសកម្មភាព របស់ប្រទេសកម្ពុជា ពាក់ព័ន្ធនឹងកំណែទំរង់នានា ក៏ដូចជាទស្សនវិស័យជំរុញវិស័យកសិកម្មធ្វើយ៉ាងណាជំរុញកម្ពុជាឱ្យក្លាយ ទៅជាប្រទេសទី៣ នៅក្នុងអាស៊ីក្នុងការ នាំអង្ករទៅប្រទេសក្រៅ ៕
