អភិបាលក្រុងមួយរបស់ម៉ិចស៊ិកត្រូវបានបាញ់សំលាប់ក្នុងការិយាល័យ
ដោយ ៖ ប្រុសកោះ
ថ្ងៃព្រហស្បត្ត៏ ទី៩ ខែកញ្ញា ឆ្នាំ២០១០ ម៉ោង ១០:៤៦
មន្ត្រីនានានិយាយថា អភិបាលក្រុង El Naranjo រដ្ឋ San Luis Potosi ប្រទេសម៉ិចស៊ិក ត្រូវបានជនប្រដាប់អាវុធបាញ់សំលាប់នៅ ក្នុងការិយាល័យរបស់លោកកាលពីល្ងាចថ្ងៃទី៨ កញ្ញា កន្លងមក ។ ទាក់ទិនទៅនឹងការបាញ់ប្រហារនេះ សាក្សីនិយាយថា ជនប្រដាប់អាវុធ៤នាក់ បានចុះពីរថយន្តកាំមីញ៉ុង ពណ៌ស មួយគ្រឿង ដែលចតនៅបរិវេណខាងមុខសាលាក្រុង El Naranjo ។ បន្ទាប់មក ជនប្រដាប់អាវុធ២នាក់ក្នុងចំណោមជនប្រដាប់អាវុធទាំង៤ បានចូលទៅក្នុងអគារការិយាល័យរបស់អភិបាលក្រុង ហើយបានបាញ់សំលាប់អភិបាលក្រុងតែម្តង ។
អភិបាលក្រុងដែលត្រូវបានបាញ់សំលាប់រូបនោះឈ្មោះ Alexander Lopez Garcia បានចូលកាន់តំណែងជាអភិបាលក្រុង El Naranjo កាលពីខែតុលា ឆ្នាំ២០០៩កន្លងមក ។
ក្នុងឆ្នាំ២០១០នេះមានអភិបាលក្រុង៧រូបក្នុងរដ្ឋផ្សេងៗគ្នាក្នុងប្រទេសម៉ិចស៊ិកត្រូវបានធ្វើឃាត ។ ប្រធានាធិបតីម៉ិចស៊ិក លោក Felipe Calderon បានថ្កោលទោសការធ្វើឃាតអភិបាលក្រុងទាំងនេះថា ជាអំពើឧក្រិដ្ឋ និងជាទង្វើកំសាកបំផុត ៕
