រាជធានីភ្នំពេញ ៖ និស្សិតស្រីដែលម្តាយអះអាងម្តងថាសរសៃប្រសាទ ម្តងថាមិនគ្រប់អាយុ បន្ទាប់ពីបើករថយន្តបុករះ បណ្តាលឱ្យស្លាប់ និងរបួសច្រើននាក់នោះ ត្រូវបានព្រះរាជអាជ្ញារងអមសាលាដំបូងរាជធានីភ្នំពេញ ចេញដីកាសម្រេចឃុំខ្លួនជាបណ្តោះអាសន្នហើយកាលពីរសៀលថ្ងៃទី ៣ មីនា ២០១៣ ។
សូមរំលឹកឡើងវិញថា ម៉ូតូប្រមាណ៩គ្រឿងនិងកង់៤គ្រឿង ត្រូវបានរថយន្តកាមរីបាឡែនមួយគ្រឿងបុករះឥតមេត្តានៅលើកំណាត់មហាវិថីព្រះនរោត្តម ស្ថិតក្នុងសង្កាត់ទន្លេបាសាក់ ខណ្ឌចំការមន ចំពីមុខក្រសួងមហាផ្ទៃនាវេលាម៉ោងជាង៥ល្ងាចថ្ងៃទី១ មីនា ដែលបានធ្វើឱ្យមានការស្លាប់ដ៏រន្ធត់បំផុត២នាក់នៅនឹងកន្លែងនិងជាង១០នាក់ទៀតរបួសធ្ងន់ និងស្រាល ត្រូវបានដឹកទៅសង្គ្រោះនៅតាមមន្ទីរពេទ្យនានា ។ ឧបទ្ទវហេតុនេះបណ្តាលឱ្យមានការកកស្ទះចរាចរណ៍លើកំណាត់ផ្លូវមុខក្រសួងមហាផ្ទៃណែនណាន់តាន់តាប់ផងដែរ ។
តាមប្រភពព័ត៌មានជំហានដំបូងឱ្យដឹងថា នៅវេលាម៉ោងខាងលើនេះរថយន្តកាមរីធុនបាឡែនពណ៌មាស ពាក់ស្លាកលេខភ្នំពេញ២R ៥០០៨ ដែលបើកបរមកពីទិសវិមានឯករាជ្យពេលមកដល់ចំណុចមុខស្ថានទូតថៃក៏ជ្រុលល្បឿនបុកម៉ូតូ១គ្រឿង ហើយបន្ទាប់មកក៏បានបុកម៉ូតូ២គ្រឿងទៀតនៅចំណុចផ្លូវបំបែកលេខ៤៦៦ កែងរបងក្រសួងមហាផ្ទៃ ។ ដោយសារតែការស្លន់ស្លោបាត់ម្ចាស់ការ អ្នកបើករថយន្តក៏បានបុករះម៉ូតូ៦គ្រឿងជាបន្តបន្ទាប់ ហើយក៏បានបុកកង់៤គ្រឿងទៀតដែលសិស្សសាលាជិះពេលចេញពីសាលាទៅផ្ទះ ។ ភ្លាមៗនោះរថយន្តក៏បានជ្រុលល្បឿនទៅបុកដើមជើងគោ១ដើមដាច់ហើយហោះទៅបុករបងក្រសួងមហាផ្ទៃទើបរថយន្តអស់ល្បឿនទៅមុខទៀតលែងរួច ។
ក្នុងការបុករះជាបន្តបន្ទាប់នោះតាមប្រភពព័ត៌មានជំហានដំបូងឱ្យដឹងថា សិស្សសាលាប្រុសម្នាក់និងស្រីម្នាក់ ដែលមានអាយុក្រោម១០ឆ្នាំ ត្រូវស្លាប់នៅកន្លែងកើតហេតុ និងជាង១០នាក់ទៀតបានរងរបួសធ្ងន់និងស្រាលដេកដួលរដូករណែលដាបទៅ ដោយឈាមរលនពេញរាងកាយ ។ តាមហេតុការណ៍ដ៏អាក្រក់បំផុតនេះ វាសនាអ្នករបួសធ្ងន់ខ្លះទៀតមិនដឹងថា អាចសង្គ្រោះជីវិតបាន ឬយ៉ាងណានៅឡើយទេ ព្រោះរថយន្តសង្គ្រោះមកដឹកជញ្ជូនជាបន្តបន្ទាប់ឆ្ពោះទៅមន្ទីរពេទ្យផ្សេងៗគ្នា ។
ប្រភពព័ត៌មានបានបន្តថា អ្នកបើកបររថយន្តគឺជានិស្សិតស្រីម្នាក់ឈ្មោះគៀម ពិសិដ្ឋម៉ារីតា អាយុ២២ឆ្នាំ ជានិស្សិតពេទ្យ ហើយអ្នកជិះក្នុងរថយន្តនេះមានយុវនិស្សិត ឬសិស្ស ភេទប្រុស ពីរនាក់ទៀត ។ បន្ទាប់ពីរថយន្តបានជ្រុលល្បឿនទៅបុករបងក្រសួងមហាផ្ទៃនោះ មនុស្សម្នាក់ដែលមានកំហឹងនៅតាមដងផ្លូវបានទៅចោមរោមរថយន្តនោះ តែចាត់ទុកជាសំណាងដែរ នៅកន្លែងកើតហេតុមុខក្រសួងមហាផ្ទៃមានប៉ូលិសច្រើនក៏រំដោះអ្នកនៅក្នុងរថយន្តដែលបុកគេនាំចូលទៅក្នុងបរិវេណក្រសួងមហាផ្ទៃ នៅសល់តែរថយន្តត្រូវបានអ្នកមានកំហឹងប៉ុនប៉ងនាំគ្នាវាយបំផ្លាញខ្លះៗបន្សាបកំហឹង។ ពិតណាស់ថា ប្រសិនបើមិនមានសមត្ថកិច្ច ឬប៉ូលិសធ្វើអន្តរាគមន៍នាំចូលបរិវេណក្រសួងទាន់ពេលវេលានោះ អ្នកបើកបរនិងអ្នកជិះក្នុងរថយន្តនោះជាមួយច្បាស់ជាត្រូវវាយដំមិនខានឡើយ ។
មន្ត្រីប៉ូលិសមួយរូបដែលស្ថិតនៅកន្លែងកើតហេតុបាននិយាយថា ហេតុការណ៍បុករះនេះដោយសារតែនិស្សិតស្រីអ្នកបើករថយន្តនេះស្លន់ស្លោពេកបុកម៉ូតូតាមដងផ្លូវ ហើយបានព្យាយាមបើកគេចក៏ជ្រុលទៅបុករះបន្តបន្ទាប់តែម្ដង ។
មន្ត្រីប៉ូលិសឱ្យដឹងថា អ្នកបើករថយន្តនិងអ្នករួមដំណើរជាមួយត្រូវបានបញ្ជូនតាមរថយន្តប៉ូលិសមកកាន់អធិការដ្ឋាននគរបាលខណ្ឌចំការមន ដោយមានការដាក់កម្លាំងការពារយ៉ាងប្រុងប្រយ័ត្នផងដែរ ព្រោះតែខ្លាចអ្នកមានកំហឹងតាមវាយសម្លាប់ដោយសារតែការអាណិតអាសូរសិស្សសាលាតូចៗដែលត្រូវបានបុកស្លាប់ ។ ត្រឹមវេលាម៉ោង៧យប់ទៅហើយមិនមានព័ត៌មានបន្ថែមឱ្យដឹង ជាផ្លូវការនៅឡើយទេ ទាំងអ្នកស្លាប់ អ្នករបួស និងម៉ូតូ ព្រមទាំងកង់ដែលត្រូវបុក ៕
ចែករំលែកព័តមាននេះ