គេកាប់មួយកាំបិតផ្គាក់ចំក្បាលជង្គង់៧ថ្ងៃក្រោយស្លាប់
ដោយ ៖ អប្សរា
ថ្ងៃសុក្រ ទី៣ ខែកញ្ញា ឆ្នាំ២០១០ ម៉ោង ១៦:២២
នាយកឺប
សពបុរសម្នាក់ត្រូវបានគេកាប់មួយកាំបិតផ្គាក់ចំក្បាលជង្គង់របួសយ៉ាងធ្ងន់ធ្ងរ
ខេត្តកំពត ៖ បុរសម្នាក់ត្រូវបានគេកាប់មួយកាំបិតផ្គាក់ចំក្បាលជង្គង់របួសយ៉ាងធ្ងន់ធ្ងរ ហើយត្រូវបានក្រុមគ្រួសារដឹកទៅកាន់មន្ទីរពេទ្យខេត្តតាកែវ ដើម្បីព្យាបាល ប៉ុន្តែជាអកុសល៧ថ្ងៃក្រោយក៏ស្លាប់ចោលប្រពន្ធ និងកូនប្រុសស្រីចំនួន៧នាក់ កាលពីវេលាម៉ោង៧ព្រឹកថ្ងៃទី២ កញ្ញា ។ បុរសដែលត្រូវគេកាប់មួយកាំបិតហើយទើបតែត្រូវស្លាប់នេះឈ្មោះយន់ តេង អាយុ៤២ឆ្នាំ នៅភូមិឈើទាលរាំ ឃុំស្វាយទងខាងជើង ស្រុកកំពង់ត្រាច ។ តាមសំដីលោកមេភូមិឈើទាលរាំ បានប្រាប់ឱ្យកោះសន្តិភាពដឹងថា នៅវេលាម៉ោង៥និង៣០នាទីល្ងាចថ្ងៃទី២៦ សីហា បុរសរងគ្រោះបានត្រឡប់ពីស្ទូងវិញស្រាប់តែឃើញទារបស់ខ្លួនងាប់នៅក្នុងស្រែ៣ទៅ៤ក្បាល ហើយនិយាយចោទប្រកាន់ទៅលើយុវជនឈ្មោះអ៊ុម លីម អាយុ១៨ឆ្នាំ និងស្ត្រីជាម្តាយថា បានដាក់ថ្នាំបំពុលទើបធ្វើឱ្យទាគាត់ងាប់ ។
តាមលោកមេភូមិឱ្យដឹងទៀតថា ពេលនោះបុរសរងគ្រោះក៏ទំនងជាស្រវឹងស្រាផងដែរ ។ ដោយសារតែការចោទប្រកាន់នេះ ទើបបង្កឱ្យមានជំលោះគ្នាក៏ឈានទៅដល់ប្រើអំពើហិង្សាយ៉ាងក្តៅគគុក ។ យុវជនអ៊ឹម លីម ដែលមានផ្ទះឃ្លាតគ្នាប្រហែលជា៧០ម៉ែត្របានយកកាំបិតផ្គាក់តាមមកកាប់ដល់ក្នុងត្រពាំងទឹកបណ្តាលឱ្យបុរសឈ្មោះយន់ តេង ដួលនៅនឹង កន្លែង ។ បន្ទាប់ពីយុវជនឈាមរាវនោះកាប់ជនរងគ្រោះចំក្បាលជង្គង់ជើងឆ្វេងមួយកាំបិតរួច មនុស្សពីរនាក់ទៀត ម្នាក់ឈ្មោះសេង គិត បានរួមគ្នាវាយប៉ងសំលាប់ ប៉ុន្តែតាមលោកមេភូមិនិយាយថា ជនដៃដល់បានគេចខ្លួនបាត់បន្ទាប់ពីបង្កហេតុឯមនុស្ស២នាក់ទៀតដែលផ្សំគំនិតទើបតែនាំគ្នារត់គេចខ្លួនកាលពីព្រឹកថ្ងៃទី២ កញ្ញា ក្រោយពីទទួលដំណឹងថាជនរងគ្រោះត្រូវស្លាប់ ។
ប្រពន្ធបុរសរងគ្រោះបាននិយាយថា គាត់បានលើកដៃសំពះទាំង២នាក់ប្តីប្រពន្ធដល់ពួកគេនិងកូនដែលរួមគ្នាប៉ុនប៉ងសំលាប់ប្តីគាត់ថា កុំឱ្យសំលាប់ប្តីគាត់អីព្រោះកូនច្រើនណាស់ទើបពួកគេមិនកាប់បន្ថែម ។ យោងតាមមន្ត្រីនគរបាលស្រុកនិយាយថា ពេលកើតហេតុដំបូងយើងមិនទាន់ដឹងថាភាគីណាម្នាក់ខុសត្រូវទេ តែជនរងគ្រោះត្រូវបានដឹកទៅកាន់មន្ទីរពេទ្យខេត្តតាកែវ ចំណែកជនសង្ស័យនិងបក្សពួកគេចខ្លួនបាត់ស្រមោល ។ ទោះបីជាបែបណា មន្ត្រីប៉ូលិសនិយាយថា ករណីនេះនឹងបន្តស្វែងរកចាប់ខ្លួន មិនអាចឱ្យជនដៃដល់និងអ្នករួមគំនិតរួចខ្លួនទេ ៕
