រាជធានីភ្នំពេញ ៖ អំណោយរបស់អភិបាលខណ្ឌឫស្សីកែវ ផ្តល់ជូនដល់យោធាកងពលតូចលេខ៤៤២ ម្នាក់ប្រចាំការនៅប្រាសាទតាមាន់ ដែលត្រូវភ្លើងឆេះរលាកពេញខ្លួនយ៉ាងអាណោចអាធ័មកាលពីថ្ងៃទី១៣ កុម្ភៈ ២០១៣ ខណៈពេលយោធារូបនេះត្រូវអង្គភាពដាក់វិន័យក្នុងទ្រុងដែក ។ ជនរងគ្រោះត្រូវបានក្រុមគ្រួសារដឹកយកមកព្យាបាលនៅមន្ទីរពេទ្យកាល់ម៉ែត កាលពីរសៀលថ្ងៃទី២១ កុម្ភៈ ២០១៣ នេះ ។
មន្រ្តីយោធាមួយរូបបានឲ្យដឹងថា យោធារងគ្រោះនេះនៅកងពលតូចលេខ៤៤២ ប្រចាំការនៅប្រាសាទតាមាន់បានរងគ្រោះរលាកពេញខ្លួន ដោយសារភ្លើងឆេះ កាលពីថ្ងៃទី១៣ កុម្ភៈ ២០១៣ ។ ជនរងគ្រោះឈ្មោះអោក ឃួច ភេទប្រុស អាយុ២៣ឆ្នាំ មានទីលំនៅផ្ទះលេខ៤៤៩ ក្រុមទី៧ ភូមិដើមគរ សង្កាត់ជ្រោយចង្វា ខណ្ឌឫស្សីកែវ ហើយបានស្ម័គ្រចិត្តចូលបំរើកងទ័ពតាមរយៈសាលាខណ្ឌឫស្សីកែវកាលពីថ្ងៃទី១ សីហា ២០១១។ មូលហេតុឈានដល់ការឆេះរលាកពេញខ្លួននេះ ដោយសារតែយោធារូបនេះត្រូវបានអង្គភាពដាក់វិន័យឲ្យនៅក្នុងទ្រុងដែករយៈពេល១២មោ៉ង បន្ទាប់ពីមានជម្លោះ និងយោធាម្នាក់ទៀតដែលនៅអង្គភាពជាមួយគ្នា។ ខណៈពេលអោក ឃួច ជាប់វិន័យនោះមិត្តភក្តិរួមអង្គភាពបានមកលេង និងយកមែកឈើស្ងួតដាក់បាំងជុំវិញទ្រុងដែក កុំឱ្យក្តៅ ស្របពេលជាមួយគ្នានោះក៏មានមិត្តភក្តិម្នាក់យកដែកកេះដុតជន្លលេង បណ្តាលឲ្យឆាបឆេះទ្រុងដែកតែម្តង ៕
ចែករំលែកព័តមាននេះ