កងរាជអាវុធហត្ថស្រុកកំពង់ត្រាច ចុះជួយស្ទូងស្រូវប្រជាពលរដ្ឋក្រីក្រ
ដោយ ៖ អប្សរា
ថ្ងៃអង្គារ ទី៧ ខែកញ្ញា ឆ្នាំ២០១០ ម៉ោង ១៥:៥៤
កែវឆាត
កងរាជអាវុធហត្ថស្រុកកំពង់ត្រាច ចុះជួយស្ទូងស្រូវប្រជាពលរដ្ឋ
ខេត្តកំពត ៖ កំលាំងកងរាជអាវុធហត្ថស្រុកកំពង់ត្រាច បានចុះជួយស្ទូងស្រូវប្រជាពលរដ្ឋក្រីក្រមួយគ្រួសារនៅភូមិកោះខ្លូត ឃុំកំពង់ត្រាចខាងកើត កាលពីរសៀលថ្ងៃទី៤ កញ្ញា កន្លងមកនេះ ។ លោកអនុសេនីយ៍ឯក លឹម ហុកសេង មេបញ្ជាការកងរាជអាវុធហត្ថស្រុកកំពង់ត្រាច បានមានប្រសាសន៍ថា ឆ្នាំនេះ ប្រជាកសិករធ្វើស្រែចំការក្នុងរដូវវស្សានេះមានការយឺតយ៉ាវ ព្រោះជួបនឹងការរាំងស្ងួតដែលមកដល់ខែកញ្ញា ទៅហើយនៅតែមិនទាន់បានស្ទូងដកនៅឡើយ ។ លោកមេបញ្ជាការបានបន្តថា ថ្វីដ្បិតតែកំលាំងកងរាជអាវុធហត្ថស្រុកមានគ្នាតិចមែន ប៉ុន្តែជាការលើកទឹកចិត្តដល់ប្រជាកសិករក្រីក្រជាងគេនៅភូមិកោះខ្លូត លោកបានដឹកនាំកំលាំងចុះមកជួយដកស្ទូងពួកគាត់ ដើម្បីរួមចំណែកក្នុងការបង្កបង្កើនផលក្នុងរដូវវស្សានេះ ។
រីឯស្រ្តីជាម្ចាស់ស្រែឈ្មោះប៉ែន ទ្រី មានការសប្បាយរីករាយដោយមិននឹកស្មានថា មានកំលាំងកងរាជអាវុធហត្ថចុះមកជួយស្ទូងស្រូវគាត់បែបនេះសោះឡើយ ។ ម្ចាស់ស្រែនិយាយថា គាត់ឃើញកំលាំងប៉េអឹមមកច្រើនស្មានតែចុះចាប់នរណាម្នាក់ធ្វើឱ្យគាត់ភ័យស្រាប់តែប៉េអឹមប្រាប់ថា ពួកគាត់ចុះមកជួយស្ទូងស្រូវ ទើបគាត់មានចិត្តរំភើបរីករាយវិញ ។ មន្ត្រីផ្សេងៗក៏ដូចជាមន្ត្រីខាងកសិកម្មបានធ្វើការជំរុញឱ្យប្រជាពលរដ្ឋគ្រប់ទីកន្លែងធ្វើយ៉ាងណាឱ្យរកប្រភពទឹកបូមដាក់ស្រែ និងប្រញាប់ប្រញាល់ដកស្ទូងឱ្យហើយ ព្រោះនៅខេត្តកំពត មិនធ្លាប់ជួបប្រទះនូវភាពរាំងស្ងួតបែបនេះទេ ប៉ុន្តែស្រុកខ្លះក៏មានការស្ទូងស្រូវហើយដែរ ៕
