ខេត្តព្រៃវែង ៖ កាលពីវេលាម៉ោងជាង៦ល្ងាចថ្ងៃទី១៩ កុម្ភៈ ២០១៣ នេះ គេសង្កេតឃើញស្នាក់ការសាខាគយ និងរដ្ឋាករខេត្តព្រៃវែងត្រូវបានគេរុះរើប្តូរទីតាំងពីកន្លែងចាស់ដែលស្ថិតនៅជាប់ផ្លូវជាតិលេខ១ ត្រង់ចំណុចភូមិព្រៃខ្លា ឃុំកំពង់សឹង្ហ ស្រុកព្រះស្តេច មកនៅទីតាំងថ្មីដែលជាប់នឹងផ្លូវជាតិលេខ១ដដែល ប៉ុន្តែស្ថិតក្នុងភូមិស្ទឹងស្លូត ឃុំអ្នកលឿង ស្រុកពាមរក៍ និងមានចម្ងាយប្រមាណជា៤គីឡូម៉ែត្រខាងលិចទីតាំងចាស់ ។
ប្រភពព័ត៌មានពីក្នុងស្ថាប័នគយបានប្រាប់ឱ្យកោះសន្តិភាពដឹងថា ទីតាំងស្នាក់ការមុននោះគឺជាដីកម្មសិទ្ធិឯកជនរបស់លោកឃុត សារិនឌី ហើយបានជួលធ្វើជាស្នាក់ការរបស់មន្ត្រីគយសាខាខេត្តក្នុងអាណត្តិដែលរូបលោកគឺជាមេគយសាខានេះ ។ ប៉ុន្តែក្រោយពីរូបលោកត្រូវបានថ្នាក់លើដកតំណែងកាលពីថ្មីៗនេះមកលោកឃុត សារិនឌី ក៏ឈប់ជួលទីតាំងនេះឱ្យបន្តទៀត ទើបមានការរុះរើប្តូរទីតាំងថ្មីយ៉ាងប្រញាប់បែបនេះ ។
ជុំវិញមូលហេតុនៃការដកលោកឃុត សារិនឌី មេគយសាខាខេត្តព្រៃវែងនេះ ប្រភពព័ត៌មានពីក្នុងស្ថាប័នគយបានប្រាប់ថា គឺដោយសារតែគេបានរកឃើញថា ស្នាក់ការគយសាខានេះបានធ្វើឱ្យបាត់លុយពន្ធមិនបានបង់ចូលរតនាគាររហូតដល់ទៅជាង១០០លានរៀល ហើយមានភាពមិនប្រក្រតីជាច្រើននៅក្នុងកិច្ចការងាររដ្ឋបាលរបស់មន្ត្រីគយសាខាខេត្ត ដែលស្ថិតនៅក្រោមការគ្រប់គ្រងរបស់លោកឃុត សារិនឌី ហេតុនេះហើយទើបថ្នាក់លើសម្រេចដកលោកឃុន សារិនឌី ពីតំណែងប្រធានគយសាខាបែបនេះ ៕
ចែករំលែកព័តមាននេះ