រាជធានីភ្នំពេញ ៖ ប៉ូលិសមានគ្នា២នាក់បានបាញ់បុរសបើកបររថយន្តដឹកម្ទេសម្នាក់ត្រូវដោះខាងឆ្វេងរងរបួសធ្ងន់ ។ ហេតុការណ៍នេះកើតឡើងកាលពីវេលាម៉ោង១១និង៥០នាទីយប់ថ្ងៃទី២៧ មករា ២០១៣ ស្ថិតនៅតាមបណ្តោយផ្លូវជាតិលេខ៥ ក្នុងភូមិស្វាយប៉ាក សង្កាត់ស្វាយប៉ាក ខណ្ឌឫស្សីកែវ។
យោងតាមប្រភពព័ត៌មានបានឱ្យដឹងថា បុរសរងគ្រោះមានឈ្មោះឌី វិចិត្រ ភេទប្រុស អាយុ២៩ឆ្នាំ មុខរបរបើកបររថយន្តដឹកផ្លែឈើ មានទីលំនៅម្តុំផ្សារនាគមាស ។ មុនពេលកើតហេតុបុរសរងគ្រោះ២នាក់ប្តីប្រពន្ធជាមួយនឹងប្អូនប្រុសបានបើករថយន្តម៉ាកសាំងយ៉ុងដឹកម្ទេសពីស្រុកកោះធំ ខេត្តកណ្តាលទៅឱ្យម៉ូយនៅប៉ៃលិនមកដល់ចំណុចកើតហេតុខាងលើ ប៉ូលិសបានឃាត់ទារលុយមិនព្រមឈប់ ប៉ូលិសមានគ្នា២នាក់បានជិះម៉ូតូតាម ហើយយកដុំថ្មគប់បំបែកកញ្ចក់រថយន្ត និងបាញ់ជនរងគ្រោះត្រូវដោះខាងឆ្វេងមួយគ្រាប់រងរបួសធ្ងន់ ។ ជនរងគ្រោះត្រូវបានគេបញ្ជូនទៅមន្ទីរពេទ្យកាល់ម៉ែត ហើយជនបង្កបានរត់គេចខ្លួនបាត់ស្រមោល ៕
ចែករំលែកព័តមាននេះ