រាជធានីភ្នំពេញ ៖ បុរសជនជាតិអាមេរិកកំាងម្នាក់ បានត្រូវគេដឹកតាមរថយន្តសាមុយបញ្ជូនទៅមន្ទីរពេទ្យកាល់ម៉ែត កាលពីម៉ោង១រសៀលថ្ងៃទី១ មករា ២០១៣ បន្ទាប់ពីបុរសនោះដេកសន្លប់នៅលើគ្រែពូកក្នុងបន្ទប់លេខ៤០៤ ជាន់ទី៤ នៃសណ្ឋាគារវ៉អឺបាវ ដែលមានទីតំាងលេខ១០៩ កែងផ្លូវលេខ៥១ និង១៧៤ ស្ថិតក្នុងភូមិទី១១ សង្កាត់ផ្សារថ្មីទី៣ ខណ្ឌដូនពេញ តែគ្រូពេទ្យបានអះអាងថា ជនជាតិអាមេរិកកំាងនេះ បានស្លាប់នៅមុនពេលបញ្ជូនមកដល់មន្ទីរពេទ្យ។
ជនជាតិអាមេរិកកំាងដែលស្លាប់នោះ ត្រូវគេស្គាល់ឈ្មោះស្មល រ៉ាហ្វ ចូសេហ្វ អាយុ៦៥ឆ្នាំ មកកម្ពុជាក្នុងនាមជាអ្នកទេសចរ កាន់លិខិតឆ្លងដែនលេខ៤៤០៨៦៨០៩១ ដោយស្នាក់នៅទីតំាងខាងលើ ។ យោងតាមរបាយការណ៍របស់អធិការដ្ឋាននគរបាលខណ្ឌដូនពេញបានឲ្យដឹងថា បុរសអាមេរិកដែលស្លាប់នេះ បានមកជួលស្នាក់នៅសណ្ឋាគារខាងលើកាលពីវេលាម៉ោង១១និង២៥នាទីយប់ថ្ងៃទី២៥ ធ្នូ ២០១២ រហូតដល់ថ្ងៃទី២៩ធ្នូ បានប្រាប់អ្នកគ្រប់គ្រងសណ្ឋាគារថា ខ្លួនមានបញ្ហាសុខភាពដោយសារជម្ងឺបេះដូង លុះដល់ថ្ងៃទី១ មករា ២០១៣ ម្សិលមិញម្ចាស់សណ្ឋាគារខាងលើឃើញអាការៈជនជាតិអាមេរិកកំាងមិនស្រួល ក៏ទូរស័ព្ទហៅរថយន្តសាមុយមកដឹកយកទៅកាន់មន្ទីរពេទ្យកាល់ម៉ែត ក៏ប៉ុន្តែគ្រូពេទ្យបានប្រាប់ថា បុរសរូបនេះបានស្លាប់មុនមកដល់មន្ទីរពេទ្យទៅហើយ។ មកដល់វេលាម៉ោង១រសៀលថ្ងៃដដែល ទើបម្ចាស់សណ្ឋាគារវ៉កអឺបាវ រាយការណ៏ដល់សមត្ថកិច្ចមូលដ្ឋាន។
មន្រ្តីនគរបាលមូលដ្ឋានមួយរូបនិយាយសុំមិនឲ្យបញ្ចេញឈ្មោះបានឲ្យដឹងថា ជនជាតិអាមេរិកកំាង ដែលគ្រូពេទ្យអះអាងថា បានស្លាប់មុនពេលមកដល់មន្ទីរពេទ្យនោះ ត្រូវបានគេរៀបចំបាត់ខុសប្រក្រតីទៅហើយ ៕
ចែករំលែកព័តមាននេះ