រាជធានីភ្នំពេញ ៖ បុរសជនជាតិបរទេសម្នាក់ស្រវឹងស្រាខ្លាំងពេកជិះម៉ូតូទៅឈប់នៅជាប់សួនច្បារទល់មុខសណ្ឋាគារណាហ្គាវើល រួចចុះពីលើម៉ូតូទៅដេកនៅលើចិញ្ចើមផ្លូវលង់លក់ស្កប់ស្កល់តែម្តង ។ ហេតុការណ៍នេះបានកើតឡើងកាលពីវេលាម៉ោង១ និង១៥នាទីរំលងអធ្រាត្រឈានចូលថ្ងៃទី៧ ធ្នូ ២០១២ តាមបណ្តោយមហាវិថីព្រះសីហនុ ក្នុងសង្កាត់ទន្លេបាសាក់ ខណ្ឌចំការមន។
ប្រភពព័ត៌មានពីសន្តិសុខយាមនៅជិតកន្លែងកើតហេតុឱ្យដឹងថា មុនពេលកើតហេតុបុរសជនជាតិបរទេសម្នាក់ជិះមូ៉តូម៉ាកអ៊ែរប្លែ៊ក ពណ៌ខ្មៅ តាមមហាវិថីព្រះសីហនុពីលិចទៅកើត លុះមកដល់ចំណុចខាងលើបានឈប់ម៉ូតូ ហើយបានចុះពីលើម៉ូតូទៅដេកនៅលើចិញ្ចើមផ្លូវជាប់សួនច្បារមុខសណ្ឋាគារណាហ្គាវើលលង់លក់ស្កប់ស្កល់ធ្វើមិនដឹង ។ ទោះបីសន្តិសុខទៅដាស់យ៉ាងណាក៏មិនព្រមភ្ញាក់ដែរទើបនៅជួយយាមការពារសុវត្ថិភាពឱ្យ ព្រោះមានជនឆ្លៀតឱកាសដើរចុះដើរឡើងជិតជនជាតិបរទេសរូបនោះជាច្រើននាក់ ទើបទូរស័ព្ទហៅប៉ូលិសមកដល់ដាស់ម្តងទៀតក៏នៅតែមិនព្រមភ្ញាក់ទៀត ។
ប៉ូលិសដាស់យ៉ាងណាក៏មិនព្រមភ្ញាក់ទើបប៉ូលិសយកទូរស័ព្ទរបស់ជនជាតិបរទេសនោះឆែករកលេខទូរស័ព្ទប្រាប់ឱ្យសាច់ញាតិមកទទួលយកទៅកន្លែងស្នាក់នៅវិញ ។
ព័ត៌មានលំអិតនឹងផ្សាយជូននៅពេលក្រោយ នៅលើទំព័រកាសែតកោះសន្តិភាព និងនៅតាមវិទ្យុសំឡេងកោះសន្តិភាព FM 87.75 រាជធានីភ្នំពេញ, FM 87.5 ខេត្តបាត់ដំបង៕
ចែករំលែកព័តមាននេះ