កាលនៅជាព្រៃមិនយកភ្នែកមើលលុះសុខសាន្តអ៊ូអរដេញគេឱ្យរុះរើផ្ទះចេញ
ដោយ ៖ឈិត គឹមឆុន
ថ្ងៃអង្គារ ទី៧ ខែកញ្ញា ឆ្នាំ២០១០ ម៉ោង ១៥:១៥
កោះសន្តិភាព
ប្រជាពលរដ្ឋបាននាំគ្នាធ្វើការតវ៉ា
រាជធានីភ្នំពេញ ៖ ប្រជាពលរដ្ឋប្រមាណ៤០០គ្រួសារ ដែលជាអតីតអ្នករស់នៅភូមិសំបុកចាប ហើយត្រូវបានសាលារាជធានីភ្នំពេញផ្លាស់ប្តូរឱ្យទៅតាំងទីលំនៅនៅសហគមន៍ភូមិអណ្តូងថ្មី សង្កាត់គោករកា ខណ្ឌដង្កោ រាជធានីភ្នំពេញ បាននាំគ្នាធ្វើការតវ៉ា យ៉ាងជ្រួលច្រាលបន្ទាប់ពីតំណាងសហគមន៍ខាងលើហាមឃាត់មិនឱ្យពួកគាត់សង់លំនៅឋាន ដើម្បីស្នាក់នៅ និងមានគំរោងរុះរើលំនៅដ្ឋានរបស់ពួកគាត់ចោល ហើយសង់ផ្ទះថ្មីឱ្យ ប៉ុន្តែឱ្យបង់លុយជារៀងរាល់ខែ ប៉ុន្តែពួកគាត់ពុំមានលទ្ធភាពបង់ ហើយត្រូវរារាំងចំពោះគំរោងនោះ ។
ហេតុការណ៍នេះបានកើតឡើង កាលពីវេលាល្ងាចថ្ងៃទី៦ កញ្ញា ឆ្នាំ២០១០ ដោយប្រជាពលរដ្ឋទាំងនោះបានប្រមូលផ្តុំគ្នាទាំងក្មេងទាំងចាស់ ប៉ុន្តែពុំមានការប្រឈមមុខដាក់គ្នាណាមួយនោះទេ ព្រោះបន្ទាប់ពីបានដឹងថា ប្រជាពលរដ្ឋតវ៉ាខាងសហគមន៍អណ្តូងថ្មី៣ ក៏បានដកថយទៅវិញអស់ ។ ប្រជាពលរដ្ឋបានឱ្យដឹងថា ពួកគាត់ជាអតីតអ្នករស់នៅភូមិសំបុកចាប រាជធានីភ្នំពេញ ហើយត្រូវបានសាលារាជធានីភ្នំពេញរៀបចំផ្លាស់ប្តូរឱ្យរើមកតាំងលំនៅឋានក្នុងសហគមន៍ភូមិអណ្តូងថ្មី មានរយៈពេល៦ឆ្នាំ មកហើយ ។ ចំពោះផ្ទះដែលពួកគាត់ស្នាក់នៅរយៈពេល៦ឆ្នាំកន្លងមកនេះ គឺជាផ្ទះខ្ទមតូចៗ ដែលអង្គការអភិវឌ្ឍន៍ប្រជាជននៃប្រទេសកម្ពុជា ជួយធ្វើឱ្យក្នុងក្តីអាណិតអាសូរដល់ពួកគាត់ ។
ប្រជាពលរដ្ឋបានបន្តទៀតថា ទោះបីជាបែបណា ពួកគាត់មួយចំនួនដែលមានផ្ទះនៅក្នុងភូមិអណ្តូងថ្មីនេះបានរស់នៅទាំងការលំបាកលំបិនដោយត្រូវទឹកលិច និងភក់ជ្រាំ ហើយត្រូវបានអង្គការខាងលើជួយជ្រោមជ្រែងជាបន្តបន្ទាប់ ដោយជួយជាឈើ និងស័ង្កសីសំរាប់សង់ខ្ទមនៅ ឥឡូវនេះក្រុមមន្ត្រីថ្នាក់មូលដ្ឋានបែរជាតម្រូវឱ្យរុះរើទៅវិញ ពួកគាត់មិនអាចទទួលយកបានទេ ។ ព័ត៌មានលំអិតនឹងផ្សាយជូននៅពេលក្រោយ និងនៅលើទំព័រកាសែតកោះសន្តិភាព ៕
