រាជធានីភ្នំពេញ ៖ បុរសម្នាក់ដោយសារស្រវឹងជោកជាំជិះម៉ូតូទៅមុខលែងរួច ក៏ឈប់សម្រាកលង់លក់នៅលើចិញ្ចើមផ្លូវ ដោយទុកម៉ូតូចោលនៅជិតនោះ ។ ខណៈឃើញបែបនេះអ្នកប៉ះកង់ ម៉ូតូ បានអូសម៉ូតូយកទៅរក្សាទុក ហើយរាយការណ៍ទៅប៉ូលិសឱ្យយកម៉ូតូទៅរក្សាទុកនៅប៉ុស្តិ៍រដ្ឋបាលផ្សារដើមគ តែអ្វីដែលគួរឱ្យចាប់អារម្មណ៍នោះ គឺពេលភ្ញាក់ដឹងខ្លួនវិញមិនឃើញម៉ូតូក៏ស្រែកថាចោរលួចកាច់សោយកទៅបាត់ ។ ហេតុការណ៍នេះកើតឡើងកាលពីវេលាម៉ោង៩យប់ថ្ងៃទី៥ វិច្ឆិកា នៅជិតស្តុបផ្សារដើមគ តាមបណ្តោយវិថីព្រះមុនីរ៉េត ស្ថិតក្នុងសង្កាត់ផ្សារដើមគ ខណ្ឌទួលគោក ។
ប្រភពព័ត៌មានពីអ្នកប៉ះកង់ ម៉ូតូនៅជិតកន្លែងកេើតហេតុឱ្យដឹងថា បុរសម្នាក់នេះជិះម៉ូតូសង់កូរ៉េ ពណ៌ក្រហម ក្នុងស្ថានភាពស្រវឹងជោកជាំ លុះពេលមកដល់ចំណុចខាងលើស្រាប់តែវាត់ចន្ទល់ម៉ូតូសឹងតែមិនទាន់ចុះដេកនៅលើចិញ្ចើមផ្លូវលង់លក់ស្កប់ស្កល់តែម្តង សូម្បីអ្នកឃើញហេតុការណ៍នាំគ្នាទៅចាប់អង្រួនដាស់ក៏មិនព្រមភ្ញាក់ដែរ ។ ដោយឃើញបែបនេះ គាត់បានយកម៉ូតូនោះទៅរក្សាទុក រួចរាយការណ៍ទៅប៉ូលិសចុះទៅដាស់ក៏នៅតែមិនព្រមភ្ញាក់ទៀត ទើបប៉ូលិសជួលរ៉ឺម៉កម៉ូតូមួយគ្រឿងលើកបុរសនោះឱ្យដេកលើរ៉ឺម៉កម៉ូតូកុំឱ្យអាក្រក់មើលពេកដែល ដើរេដកតាមចិញ្ចើមផ្លូវបែបនេះ ហើយយកម៉ូតូនោះទៅរក្សាទុកនៅប៉ុស្តិ៍រដ្ឋបាលផ្សារដើមគ ។
លុះពេលដេកលក់ស្កប់ស្កល់ហើយ បុរសនោះដឹងខ្លួនវិញក៏ស្រែកផ្អើលឆោឡោចោទថាអ្នកជិតខាងលួចកាច់សោ.កម៉ូតូរបស់គាត់យកទៅបាត់ ប៉ុន្តែក្រោយមកទើបគេប្រាប់ថា ម៉ូតូត្រូវប៉ូលិសយកទៅរក្សាទុកឱ្យនៅប៉ុស្តិ៍រដ្ឋបាលផ្សារដើមគ ។ គួរបញ្ឈប់ការផឹកស៊ីបែបនេះតទៅទៀតទៅ ព្រោះមិនបានផ្តល់តម្លៃណាមួយសម្រាប់ខ្លួននោះទេ ៕
ចែករំលែកព័តមាននេះ