រាជធានីភ្នំពេញ ៖ យោងតាមរបាយការណ៍ពីនាយកដ្ឋានសណ្តាប់ធ្នាប់នៃក្រសួងមហាផ្ទៃបានឱ្យដឹងថា រយៈពេល១០ខែ ឆ្នាំ២០១២គ្រោះថ្នាក់ចរាចរណ៍ផ្លូវគោកនៅទូទាំងព្រះរាជាណាចក្រកម្ពុជាគិតពីថ្ងៃទី១១ ខែវិច្ឆិកាឆ្នាំ២០១១ដល់ថ្ងៃទី១០ ខែតុលា ឆ្នាំ២០១២ កើតឡើងចំនួន៣.៩៥៣លើក ។ ប្រៀបធៀបរយៈពេលដូចគ្នាក្នុងឆ្នាំ២០១១ ដែលមានចំនួន៤.៧៣៣លើក គឺថយចុះ៧៨០លើកស្មើ១៦% ។ បណ្តាលឲ្យស្លាប់មនុស្ស១.៧៤៨នាក់លើ១.៧៥៥នាក់ គឺថយចុះ០៧នាក់ស្មើ០,៤% ។ របួសធ្ងន់៣.៩៥៤នាក់លើ ៤.៦៦១នាក់ ថយចុះ៧០៧នាក់ស្មើ១៥% ។ របួសស្រាលចំនួន២.៨២៩នាក់ លើ៣.៥២៦នាក់ ថយចុះ៦៩៧នាក់ ស្មើ២០%។
មូលហេតុគ្រោះថ្នាក់បណ្តាលមកពីការបើកបរលើសល្បឿនមាន៤៧%មិនគោរពសិទ្ធិអាទិភាព១៥%ស្រវឹង១១%ប្រជែងគ្នា៩% បើកបរធ្វេសប្រហែស៧%មិនប្រកាន់ស្តាំ៤% កត្តាយានយន្ត២% មិនគោរពភ្លើងសញ្ញា១%បញ្ហាសុខភាព១% និងកត្តាផ្សេងៗ៣% ។
តាមការកត់សម្គាល់ក្នុងចំណោមគ្រោះថ្នាក់ទាំងអស់ អ្នកជិះម៉ូតូមិនពាក់មួកសុវត្ថិភាពចំនួន៣៥% ។ ក្នុងចំណោមជនរងគ្រោះដែលស្លាប់ ជាបុរសមានចំនួន៨៣ %ស្រ្តី១៧% ក្នុងនោះវ័យពលកម្មពីអាយុ១៨-៤៥ឆ្នាំមាន៧០%។របាយការណ៍ប្រាប់ឱ្យដឹងថា ក្នុងចំណោមគ្រោះថ្នាក់ចរាចរណ៍ខាងលើបណ្តាលឲ្យខូចចខាតម៉ូតូចំនួន៥.១៦៨គ្រឿង,យានផ្សេងៗ៣៦៨គ្រឿង,អ្នកថ្មើរជើង៧២៩នាក់ ហើយមិនពាក់មួកសុវត្ថិភាពមាន១.៦៩៥នាក់ ។
ដោយឡែកគ្រោះថ្នាក់ចរាចរណ៍នៅរាជធានីភ្នំពេញមានចំនួន៤៩៦លើក បណ្តាលឲ្យមនុស្សស្លាប់២៣៣នាក់ ប្រុស១៩១នាក់ ។ របួសធ្ងន់៥០៧នាក់ ប្រុស៣៩៧នាក់ ស្រី១១០នាក់។ របួសស្រាល២៧៦នាក់ ប្រុស១៦៤នាក់ ស្រី១១២នាក់ ។ ខូចខាតមូ៉តូ៥១២គ្រឿង,យានផ្សេងៗ២៧គ្រឿង,អ្នកថ្មើរជើងចំនួន៥៣នាក់,មិនពាក់មួកសុវត្ថិភាពពេលគ្រោះថ្នាក់២៤៩នាក់ ។ មូលហេតុបណ្តាលឱ្យគ្រោះថ្នាក់ដោយសារបើកបរលើសល្បឿន១១៣លើក,មិនគោរពភ្លើងសញ្ញា១៣លើក,មិនគោរពសិទ្ធិអាទិភាព៦៥លើក,មិនប្រកាន់ស្តាំ៨៦លើក,ប្រជែងគ្រោះថ្នាក់៤៩លើក,បើកបរធ្វេសប្រហែស៨៥លើក,ស្រវឹង៥៧លើក,ងងុយដេក១លើក,ករណីផ្សេងៗ២៣លើក,កត្តាផ្លូវ១លើក,កត្តាយានយន្ត៤លើក ។
គួរកត់សម្គាល់ថា ទោះបីរាជរដ្ឋាភិបាលយកចិត្តទុកដាក់ និងរិតបន្ដឹងច្បាប់ស្ដីពីចរាចរណ៍យ៉ាងក៏ដោយ គ្រោះថ្នាក់ចរាចរណ៍នៅតែជាបញ្ហាប្រឈមដដែល ។ តាមតួលេខគ្រោះថ្នាក់ខាងលើនេះ អ្នកណាក៏ព្រួយ និងញាក់សាច់ដែរព្រោះការបាត់បង់ជីវិតនោះវាខ្ពស់ពេក គឺជិត២ពាន់នាក់ទៅហើយទម្រាំដាច់ឆ្នាំ ។ ចំណែករបួសក៏តួលេខបង្ហាញញាក់សាច់ដែរ ។ទោះជាយ៉ាងណាក៏ដោយក៏តួលេខនេះបង្ហាញថា បានថយចុះប៉ុនក្រចកដៃដែរបើប្រៀបធៀបឆ្នាំ២០១១ ៕
ចែករំលែកព័តមាននេះ