អ៊ីស្រាអែលកំទេចគេហដ្ឋាន៣ខ្នងរបស់ពួកប៉ាទ្បេស្ទីននៅហ្សេរុយសាទ្បឹមខាងកើត
ដោយ ៖ ប្រុសកោះ
ថ្ងៃពុធ ទី១៤ ខែកក្កដា ឆ្នាំ២០១០ ម៉ោង ១៦:០២
គេហទំព័របរទេស
គ្រឿងចក្រអ៊ីស្រាអែលកំពុងកំទេចផ្ទះពួកប៉ាឡេស្ទីន
អាជ្ញាធរអ៊ីស្រាអែលកាលពីថ្ងៃទី១៣ កក្កដា បានកំទេចចោលគេហដ្ឋាន៣ខ្នងរបស់ពួកប៉ាឡេស្ទីន ក្នុងទីក្រុងហ្សេរុយសាឡឹមខាងកើតដែលទង្វើនេះទទួលការថ្កោលទោសដោយសហភាពអឺរ៉ុប និង អ.ស.ប ។ គេហដ្ឋានទាំងនេះស្ថិតក្នុងសង្កាត់អ៊ីសាវីយ៉ា ត្រូវកំទេចចោលតាមបទបញ្ជារបស់សាលាក្រុងក្រោមលេសថា សាងសង់គ្មានច្បាប់អនុញាត ។ ប៉ូលិសត្រូវបានដាក់ពង្រាយនៅតាមតំបន់នេះ ដោយសារខ្លាចមានការប៉ះទង្គិចគ្នាជាមួយពួកអ្នកតវ៉ាប៉ាឡេស្ទីន ។
គេហដ្ឋានរបស់ពួកប៉ាឡេស្ទីនជាច្រើនពាន់ខ្នងក្នុងផ្នែកខាងកើតនៃទីក្រុងហ្សេរុយសាឡឹមរងការគំរាមកំហែងកំទេចចោល ព្រោះសាងសង់ពុំមានច្បាប់អនុញាតរបស់អាជ្ញាធរអ៊ីស្រាអែល ។ គណៈកម្មការធិការអឺរ៉ុប និងអាជ្ញាធរប៉ាឡេស្ទីនបានបរិហារនាថ្ងៃទី១៣ កក្កដា ចំពោះការកំទេចផ្ទះទាំងនេះ ព្រមទាំងចំពោះការអនុញាតឱ្យពួកអ៊ីស្រាអែលកសាងលំនៅឋានថ្មីៗនៅទីនោះដែលជាឧបសគ្គមួយចំពោះសន្ដិភាព ៕
