នារីគនិងនារីមានសតិមិនប្រក្រតី ត្រូវបានជនអគតិចាប់រំលោភ ចាប់ខ្លួនម្នាក់និងម្នាក់រត់បាត់
ដោយ ៖ អប្សរា
ថ្ងៃអាទិត្យ ទី៥ ខែកញ្ញា ឆ្នាំ២០១០ ម៉ោង ០៩:៤៥
ចាន់ថេត
ជនត្រូវជាប់ចោទ
ខេត្តកំពង់ចាម ៖ នារីដែលងាយរងគ្រោះ ឬចាត់ទុកថា ពិការ២នាក់បានទទួលរងគ្រោះ ដោយការចាប់រំលោភពីជនអគតិ ក្នុងសកម្មភាពល្មើសដាច់ដោយឡែកពីគ្នា ក្នុងនោះនាងក្រមុំមិនគ្រប់ទឹក អាយុ២៨ឆ្នាំ រស់នៅស្រុកស្រីសន្ធរ ត្រូវបុរសអគតិចាប់រំលោភរហូតមានផ្ទៃពោះ៥ខែ ទើបបែកការណ៍ និងករណីទី២ កើតឡើងនៅស្រុកបាធាយ ដោយនាងក្រមុំគ អាយុ២២ឆ្នាំ ត្រូវបានបុរសម្នាក់ស្រវឹងស្រាចាប់រំលោភសេពសន្ថវៈ រហូតបានសំរេច ហើយជនអគតិនេះត្រូវបានចាប់ខ្លួន ។
តាមសេចក្តីរាយការណ៍ពីលោកអនុសេនីយ៍ឯកខេង ស្រេង អធិការនគរបាលស្តីទីស្រុកស្រីសន្ធរ បានឱ្យកោះសន្តិភាពដឹងតាមទូរស័ព្ទនាព្រឹកថ្ងៃទី៣ កញ្ញា ២០១០ ថា កាលពីព្រឹកថ្ងៃទី២ កញ្ញា ឪពុកម្តាយរបស់នារីរងគ្រោះឈ្មោះ «ប.គ» អាយុ២៨ឆ្នាំ បាននាំកូនស្រីមកប្តឹងដល់អធិការដ្ឋាននគរបាលស្រុកតែម្តង ដោយចោទប្រកាន់លើបុរសសង្ស័យឈ្មោះសាន្ត សឿន អាយុ៣៥ឆ្នាំ រស់នៅភូមិ-ឃុំជាមួយគ្នា បានចាប់រំលោភកូនស្រីគាត់ដែលមានសតិមិនគ្រប់ ហើយរាល់ពេលនៃការចាប់រំលោភ ជននេះតែងតែគំរាមរកសម្លាប់ ធ្វើឱ្យកូនស្រីគាត់ភ័យខ្លាចក៏ចេះតែទ្រាំទៅរហូតមានផ្ទៃពោះ៥ខែ ទើបបែកការណ៍ លុះពេលសួរនាំទើបដឹងថា បុរសសង្ស័យឈ្មោះសឿន ចាប់រំលោភ ។ ទោះបីជាបែបណា ជនអគតិដែលដឹងខ្លួនថា បែកការណ៍ហើយនោះ ក៏បានគេចខ្លួនបាត់ តែមន្ត្រីប៉ូលិសនឹងសុំដីកាតាមស្វែងរកចាប់ខ្លួនជននេះយកមកផ្តន្ទាទោសតាមច្បាប់ ។
ដោយឡែក លោកអនុសេនីយ៍ឯកនាន ណារិន អធិការរងនគរបាលស្រុកបាធាយវិញ បានឱ្យដឹងដែរថា កាលពីវេលាម៉ោង៧យប់ថ្ងៃ១ កញ្ញា ២០១០ នៅស្រុកបាធាយ មានករណីចាប់រំលោភសេពសន្ថវៈមួយលើនារីគ អាយុ២២ឆ្នាំ រហូតបានសំរេច ព្រោះតែស្រវឹងស្រា ។ លោកអធិការរងនគរបាលស្រុកបាធាយបានបញ្ជាក់ថា លោកអនុសេនីយ៍ទោយ៉ូវ ចន្តា នាយប៉ុស្តិ៍នគរបាលឃុំបាធាយបានរាយការណ៍មករូបលោក ហើយភ្លាមៗនោះ លោកចាត់ឱ្យកំលាំងជំនាញស្រុក និងប៉ុស្តិ៍បាធាយ ចុះស្រាវជ្រាវបន្ទាន់រហូតដល់ម៉ោង១០និង៣នាទីព្រឹកថ្ងៃទី២ កញ្ញា ក៏បានឃាត់ខ្លួនជនសង្ស័យឈ្មោះឡាង ឡេន ភេទប្រុស អាយុ២២ឆ្នាំ ។
ជនសង្ស័យឈ្មោះឡាង ឡេន បានសារភាពថា នៅម៉ោងប្រហែល៥ល្ងាចថ្ងៃទី១ កញ្ញា រូបគេបានទៅផឹកស្រានៅផ្ទះអ្នកភូមិជាមួយគ្នា អស់ស្រា៤ទៅ៥លីត្រ ដោយមានគ្នាច្រើននាក់ ។ លុះម៉ោង៧យប់ក៏បានបែកគ្នា រូបគេដើរត្រឡប់ទៅផ្ទះវិញ ក៏ឃើញនាង.គ កំពុងតែដេកលើអង្រឹងក្រោមផ្ទះរបស់ខ្លួន ។ ភ្លាមៗនោះរូបគេមិនបានទៅប៉ះពាល់នាងទេ ក៏ដេកលើគ្រែ បន្តិចក្រោយមក ស្រាប់តែឈឺពោះក៏ក្រោកដើរទៅបត់ជើងនៅខាងក្រោយផ្ទះ ប៉ុន្តែមិនទាន់បានបត់ជើងផង ឃើញនាង.គដើរតាមពីក្រោយ ធ្វើឱ្យរូបគេមានអារម្មណ៍ចង់រួមរ័ក ក៏បានដឹកដៃនាងទៅវាលស្រែ ហើយចាប់រំលោភសេពសន្ថវៈរូបនាងរហូតបានសំរេច ។ លោកអធិការរងនគរបាលស្រុកបាធាយបញ្ជាក់បន្ថែមថា យោងតាមបណ្តឹងរបស់ស្ត្រីជាម្តាយនាង.គ គឺសូមឱ្យសមត្ថកិច្ចធ្វើការផ្តន្ទាទោសឈ្មោះឡាង ឡេន ទៅតាមច្បាប់ និងទារសំណងជំងឺចិត្តពីជននេះចំនួន៤លានរៀល ៕
