រាជធានីភ្នំពេញ ៖ ការប្រកួតប្រដាល់កាលពីថ្ងៃអាទិត្យទី១៦ កញ្ញា កន្លងទៅបានធ្វើឱ្យអ្នកទស្សនាជក់ចិត្តតាំងពីបើកឆាកការប្រកួតនៅគូទី១ម៉្លេះ ដោយសារតែកីឡាករ កីឡាការិនីស្ទើរតែគ្រប់គូប្រកួតត្រូវគេកត់សម្គាល់ថា ឡើងរេញភ្លាមវាយសម្រុកគ្នាភ្លាមធ្វើឱ្យកក្រើកសង្វៀនស្ថានីយទូរទស្សន៍បាយ័នបឹងស្នោតែម្តង ។ ទោះយ៉ាងណា ក្នុងចំណោមនោះគឺមានតែជ័យជម្នះរបស់កីឡាការិនីសូយ សុធា និងកីឡាករវង្ស ណយ ប៉ុណ្ណោះដែលធ្វើឱ្យអ្នកទស្សនាសម្តែងការអបអរសាទរ និងផ្តល់សម្រែកហ៊ោកញ្ជ្រៀវខ្លាំងជាងគេ ដោយសារតែពួកគេទាំងពីរបង្ហាញនូវភាពខ្លាំង ហើយវាយឈ្នះលើគូប្រកួតបានត្រូវចិត្តមហាជនភាគច្រើន ។
ប្រសិនបើផ្តល់ពិន្ទុពីសន្ទុះស្រែកហ៊ោកញ្ជ្រៀវវិញ គូប្រកួតរវាងកីឡាការិនីសូយ សុធា មកពីក្លិបអូដឹមកីឡា និងកីឡាការិនី វី អិុច មកពីក្លិបអេភូថងកីឡា បានទទួលការចាប់អារម្មណ៍ខ្លាំងក្លាជាងគេ ។ កីឡាការិនីទាំងពីរនេះមិនធ្លាប់ជួបគ្នាទេ ប៉ុន្តែការប្រកួតរវាងពួកគេគឺខ្លាំងក្លាដូចគ្នា ទើបធ្វើឱ្យអ្នកទស្សនាស្រែកស្ទើរហើបគូទគ្រប់វិនាទីជាមួយក្បាច់ប្រដាល់វាយទៅវាយមករបស់ពួកគេ ។
ចំណុចពិសេសដែលធ្វើឱ្យអ្នកទស្សនាចាប់អារម្មណ៍ខ្លាំងក្លាបំផុតនោះគឺ ដោយសារតែកីឡាការិនីសូយ សុធា មានរាងតូចល្អិតជាងកីឡាការិនី វី អិុច ដូចមេឃ និងដី តែបែរជាអាចផ្តួលកីឡាការិនី វី អិុច ដែលទើបតែបើកប្រវត្តិសាស្ត្រវាយឈ្នះកីឡាការិនីសម សំណាង បានដែលស្ទើរតែមិនគួរឱ្យជឿ ។ បើក្រឡេកត្រឹមមួយភ្លែតគ្មានអ្នកណាជឿឡើយថា សូយ សុធា អាចយកប្រៀបលើកីឡាការិនី វី អិុច ឡើយ ម្យ៉ាងទាំងទម្ងន់ និងកម្លាំងក្នុងការវាយបោក តើអ្នកណាមិនដឹងថា ជើងខ្លាំង កីឡាការិនីវី អិុច មានប្រៀបជាង បើទោះជា វី អិុច ទើបតែឡើងរេញបានតែ៥ដងបូកទាំងលើកចុងក្រោយនេះក្តី ។ អីុចឹងហើយទើបនៅពេលកីឡាការិនីសូយ សុធា ដែលមានមាឌល្អិតជាង ទម្ងន់តិចជាង ស្រាប់តែមានឱកាសវាយកែងផង ជង្គង់ផង និងម៉ាត់ផង ត្រូវផាច់ៗលើកីឡាការិនី វី អិុច ធ្វើឱ្យម្នាក់ៗផ្តល់សំឡេងហ៊ោកញ្ជ្រៀវគាំទ្រយ៉ាងខ្លាំង ។
ការប្រកួតរវាងកីឡាការិនីពីររូបនេះមិនត្រឹមតែធ្វើឱ្យអ្នកទស្សនាជក់ចិត្តជាងគេប៉ុណ្ណោះទេ គឺបានទាំងធ្វើឱ្យម្ចាស់ឧបត្ថម្ភកម្មវិធីប្រកាសផ្តល់ទឹកប្រាក់២០ម៉ឺនរៀលភ្លាមៗស្មើនឹងការប្រកួតរបស់គូពិសេស ដែលវាយឈ្នះបានជក់ចិត្តថែមទៀតផង ។ ទោះយ៉ាងណា កីឡាការិនី សូយ សុធា មិនមែនទើបតែឈ្នះការប្រកួតពេលឡើងរេញម្តងនេះទេ គឺនាងធ្លាប់ទទួលជ័យជម្នះបែបនេះចំនួន១៦លើករួចមកហើយ ដោយគ្រាន់តែលើកនេះនាងធ្វើឱ្យគេភ្ញាក់ផ្អើលព្រោះតែបានជួបជើងខ្លាំងដូចនាងវី អិុច ទៅហើយ តែបែរជានៅតែឈ្នះពិន្ទុ ធ្វើឱ្យអ្នកទស្សនាជក់ចិត្តជាងលើកមុនៗប៉ុណ្ណោះ ។
ដោយឡែក មួយគូទៀតដែលធ្វើឱ្យសង្វៀនប្រដាល់នៅបឹងស្នោកក្រើកផងដែរនោះ គឺការប្រកួតរវាងកីឡាករវង្ស ណយ មកពីក្លិបកងពលតូចលេខ៣១ និងគូសងសឹករបស់ខ្លួនគឺកីឡាករពុទ្ធ ឆាយរិទ្ធី មកពីក្លិបពុទ្ធសេរីវង្សកីឡា ។ គូប្រកួតទាំងពីរនេះថ្វើបើនៅទឹកដំបូងបានធ្វើឱ្យអ្នកទស្សនាខកចិត្ត ព្រោះតែអត់វាយគ្នាចាញ់ការឡើងរេញរបស់កីឡាករផាន់ គ្រាន់ និងផាន់ សុវណ្ណ ប៉ុន្តែឈានដល់ទឹកទី២ ពួកគេបានចាប់ផ្តើមវាយសម្រុកគ្នាធ្វើឱ្យអ្នកទស្សនាជក់ចិត្តស្រែកហ៊ោហើបគូទពីកៅអី ។ ទីបំផុតកីឡាករវង្ស ណយ ដែលមិនអាចទ្រាំនឹងការព្រមានពីអ្នករៀបចំកម្មវិធីដដែលៗបានក៏បានស្ទុះវាយសម្រុកលើកីឡាករពុទ្ធ ឆាយរិទ្ធី ធ្វើឱ្យកីឡាកររូបនេះដួលផ្ងារជើងសន្លប់ភ្លឹងតែម្តង រហូតរាប់ដល់១០នៅចុងទឹកទី៣ ។
ការសន្លប់របស់កីឡាករពុទ្ធ ឆាយរិទ្ធី លើកនេះកំពុងធ្វើឱ្យកីឡាករវង្ស ណយ ដែលធ្លាប់សន្លប់ក្រោមដៃខ្លួនរួចម្តងនោះ កាន់តែសាងមុខមាត់ ហើយបង្កើតប្រវត្តិសាស្ត្រវាយកីឡាករពុទ្ធ ឆាយរិទ្ធី ឱ្យសន្លប់២លើកក្នុងជំនួបប្រកួតគ្នាទាំង៣លើក ។ ទោះយ៉ាងណា ការភ្លាត់ស្នៀតរបស់កីឡាករពុទ្ធ ឆាយរិទ្ធី ដែលបណ្តោយឱ្យកីឡាករវង្ស ណយ មា៉ាត់មួយទំហឹងចំកណ្តាលមុខរហូតងើបលែងរួចនៅចុងទឹកទី៣នេះ ត្រូវគេមើលឃើញថា បណ្តាលមកពីកីឡាកររូបនេះខ្លាចៗ និងចាញ់ការសម្លុតរបស់គូប្រកួត ហើយមិនហ៊ានវាយសម្រុកលើកីឡាករវង្ស ណយ ច្រើនជាង ដោយសូម្បីតែពេលនោះ វង្ស ណយ អត់ទាំងមានផ្លែដៃ ផ្លែជង្គង់ណាមួយឱ្យល្អទាល់តែសោះផងនោះ ។
ចំពោះគូប្រកួតដទៃទៀត កីឡាករចាន់ ឡហាន មកពីក្លិបនិរោធមានជ័យ ប្រកួតឈ្នះពិន្ទុ កីឡាករមាន វុទ្ធី មកពីក្លិបយុវជនកម្ពុជាមានជ័យ ។ កីឡាករសេង កំសត់ មកពីក្លិបខេមរិន្ទមានឫទ្ធិ ត្រូវគណៈកម្មការប្រកាសឱ្យចាញ់ការប្រកួតលើកីឡាករម៉ន ភីរម្យ មកពីក្លិបព្រែកឯងកីឡា នៅចុងទឹកទី៣តែម្តង បន្ទាប់ពីកីឡាកររូបនេះជ្រុលដៃប្រើស្នៀតលើគូប្រកួតធ្វើឱ្យគេសន្លប់ក្នុងពេលដួលខុសលក្ខន្តិកៈ ។ ចំណែកឯគូចុងក្រោយគឺកីឡាករផាន់ គ្រាន់ មកពីក្លិបព្រះខ័នរាជ ឈ្នះពិន្ទុកីឡាកររៀមច្បងផាន់ សុវណ្ណ មកពីក្លិបមិត្តប៉ូលិស ដែលការប្រកួតរវាងពួកគេទាំងពីរនេះក៏បានទទួលសម្រែកហ៊ោកញ្ជ្រៀវមិនចាញ់ការឡើងរេញរបស់កីឡាការិនីសូយ សុធា និង វី អុិច នាឱកាសនោះដែរ ៕
ចែករំលែកព័តមាននេះ