រាជធានីភ្នំពេញ ៖ ខណៈដែលការប្រកួតក្របខណ្ឌអាសា៊ានក្រោមប្រធានបទសាកលវិទ្យាល័យអាស៊ានលើកទី១៦(16th ASEAN University Games-AUG) ដែលត្រូវធ្វើឡើងក្នុងប្រទេសឡាវ និងគ្រោងចាប់ផ្តើមនៅថ្ងៃទី១២ ធ្នូ ឆ្នាំ២០១២នោះ ខាងសហព័ន្ធប៊ូល និងប៉េតង់បានអះអាងថា បានកំណត់បេក្ខភាពកីឡាករ កីឡាការិនី ដែលអាចចូលរួមក្នុងព្រឹត្តិការណ៍ថ្នាក់អន្តរជាតិមួយនេះរួចរាល់ហើយ ។ តំណាងសហព័ន្ធនិយាយថា បេក្ខភាពនោះមានចំនួន៥រូបដែលសុទ្ធសឹងជាធនធាននិស្សិតស្របតាមលក្ខខណ្ឌនៃការប្រកួតទាំងអស់ ។
នៅអំឡុងចុងឆ្នាំ២០១២នេះប្រទេសក្នុងសមាគមអាស៊ាននឹងធ្វើការប្រកួតកីឡាក្នុងក្របខណ្ឌនិស្សិតលើកទី១៦ ក្នុងប្រភេទកីឡាមួយចំនួនដូចជាអត្តពលកម្ម វាយសី បាល់បោះ បាល់ទាត់ យូដូ ការ៉ាតេដូ សីប៉ាក់តាក្រ ហែលទឹក តេក្វាន់ដូ វាយកូនឃ្លីលើតុ វាយកូនបាល់ កីឡាបាល់ទះ វូស៊ូ បាញ់ធ្នូ ប៉េតង់ និងអុកជាដើម ។ កីឡាករកីឡាការិនីដែលអាចចូលរួមក្នុងព្រឹត្តិ ការណ៍នេះគឺលុះត្រាតែជានិស្សិតដែលមានឈ្មោះរៀននៅក្នុងមហាវិទ្យាល័យ ហើយជាកីឡាករកីឡាការិនីជម្រើសជាតិតំណាងឱ្យប្រទេសនីមួយៗ ដោយផ្តល់ការអនុញ្ញាតឱ្យតែបេក្ខភាពដែលមានឈ្មោះជានិស្សិតយ៉ាងច្រើនត្រឹមនិស្សិតបញ្ចប់ឆ្នាំទី៤ សម្រាប់ឆ្នាំសិក្សា២០១១-២០១២មុននេះ ។
អញ្ចឹងហើយទើបប្រទេសកម្ពុជាមានលទ្ធភាពអាចបញ្ជូនកីឡាករកីឡាការិនី ដែលស្ថិតក្នុងក្របខណ្ឌនិស្សិតមហាវិទ្យាល័យបែបនេះ បានតែ៦ប្រភេទកីឡាឱ្យចូលរួមប្រកួត ។ កីឡាទាំង៦ប្រភេទនោះរួមមាន តេក្វាន់ដូ៣រូប វាយកូនបាល់៣រូប យូដូ២រូប វាយកូនឃ្លីលើតុ២រូប អត្តពលកម្ម២រូប និងប៉េតង់៥រូប ។ ដោយឡែកចំពោះសហព័ន្ធប៊ូល និងប៉េតង់បានកំណត់រួចហើយចំពោះបេក្ខភាពកីឡាករ កីឡាការិនីដែលគ្រោងចេញប្រកួតតំណាងជាតិនៅក្នុងប្រទេសឡាវនោះ ។
លោកឯម ហៀង អគ្គលេខាធិការរងសហព័ន្ធកីឡាប៊ូល និងប៉េតង់កម្ពុជា បានប្រាប់កោះសន្តិភាពឱ្យដឹងថា កីឡាករកីឡាការិនីក្នុងក្របខណ្ឌនិស្សិត ដែលត្រូវកំណត់ឈ្មោះឱ្យចេញទៅចូលរួមនោះរួមមាន កីឡាការិនីឌួង ឌីណា អាយុ២៣ឆ្នាំ ជានិស្សិតឆ្នាំទី៤ ត្រៀមបញ្ចប់ផ្នែកច្បាប់ កីឡាការិនីឈិន ស្រីពេជ្រ អាយុ១៩ឆ្នាំជានិស្សិតឆ្នាំទី១ ផ្នែកសិល្បៈ កីឡាការិនីម៉ៃ រតនា អាយុ២០ឆ្នាំ ជានិស្សិតឆ្នាំទី១ ផ្នែកទេសចរណ៍ កីឡាករម៉ី សុភ័ក្ត្រ និងកីឡាករឯក ណារ័ត្ន អាយុ២៤ឆ្នាំដូចគ្នា ជានិស្សិតឆ្នាំទី៤ ផ្នែកធនាគារ ។ លោកមានប្រសាសន៍ថា ក្នុងចំណោមបេក្ខភាពដែលត្រូវចេញទៅប្រកួតនៅប្រទេសឡាវទាំង៥រូបនេះមានតែកីឡាការិនី៣រូបខាងដើមប៉ុណ្ណោះដែលមានឈ្មោះជាជម្រើសជាតិរួចស្រេច ចំណែកកីឡាករ២នាក់ចុងក្រោយគ្រាន់តែត្រៀមបញ្ចូលជាជម្រើសជាតិនៅអំឡុងខែកញ្ញា និងតុលាខាងមុខតែប៉ុណ្ណោះ។
លោកបញ្ជាក់ថា សហព័ន្ធប៊ូល និងប៉េតង់នេះមានកីឡាករកីឡាការិនីជម្រើសជាតិសរុបស្រី១២នាក់ ប្រុស១២នាក់ ប៉ុន្តែភាគច្រើនពួកគេមានវ័យច្រើនហើយមិនមែនជានិស្សិត ទើបកាលពីព្រឹត្តិការណ៍ប្រកួតលើកទី១៥ មិនមានកីឡាករកីឡាការិនីផ្នែកប៊ូល និងប៉េតង់ចូលរួមទេ ។ សហព័ន្ធប៊ូល និងប៉េតង់ទើបតែមានឱកាសចេញប្រកួតក្នុងកម្មវិធីនេះជាលើកទី១ប៉ុណ្ណោះ បើទោះការប្រកួតថ្នាក់សាកលវិទ្យាល័យអាស៊ាននេះកម្ពុជាបានចូលរួមចំនួន៣លើករួចមកហើយដោយសារតែខ្វះធនធានអ្នកចេញប្រកួត ។ អញ្ចឹងហើយទើបខាងសហព័ន្ធកំពុងបង្កើនការបំផុសឱ្យមានសិស្ស និងនិស្សិតចូលហ្វឹកហាត់ ក្លាយជាជម្រើសជាតិនៅក្នុងសហព័ន្ធផ្នែកនេះឱ្យកាន់តែច្រើន ដើម្បីអាចបញ្ជូនពួកគេឱ្យចេញប្រកួតបើមានការស្នើឡើងពីគណៈកម្មការសហព័ន្ធកីឡាអន្តរជាតិ ។
លោកមានជំនឿថា ការកំណត់បេក្ខភាពទាំង៥រូបដែលសុទ្ធសឹងជានិស្សិតឱ្យចូលប្រកួតនេះនឹងទទួលបានជោគជ័យត្រឡប់មកវិញ បើទោះជាក្នុងចំណោមទាំង៥រូបនោះគឺមានតែកញ្ញាឌួង ឌីណា ម្នាក់ប៉ុណ្ណោះដែលធ្លាប់ចេញទៅប្រកួតនៅក្រៅស្រុក និងបានទទួលមេដាយប្រាក់នៅស៊ីហ្គេមឥណ្ឌូណេស៊ី កាលពីឆ្នាំ២០១១កន្លងទៅ ។
លោកឯម ហៀង មានប្រសាសន៍ថា លោកពិតជាមានមោទនភាពដែលក្នុងឆ្នាំនេះ កម្ពុជាមានលទ្ធភាពបញ្ជូនកីឡាករកីឡាការិនីដែលជានិស្សិតរហូតដល់៦ប្រភេទកីឡាស្មើនឹង១៧នាក់ ឱ្យចេញទៅប្រកួតកីឡាថ្នាក់អាស៊ានក្នុងក្របខណ្ឌសាកលវិទ្យាល័យនេះ ។ លោកមានជំនឿថា ផ្នែកប៉េតង់់របស់លោកនឹងទទួលផ្លែផ្កាពីកម្មវិធីនេះដោយសំអាងថា ធនធាននិស្សិតដែលបានកំណត់មុខសញ្ញាឱ្យចេញទៅប្រកួតនោះគឺសុទ្ធតែជាកីឡាករកីឡាការិនីមានទេពកោសល្យ និងមានស្នាដៃក្នុងស្រុករាប់មិនអស់រួចមកហើយ បើទោះជាពួកគេទើបតែសម្រេចចិត្តទទួលយកការបញ្ចូលជាកីឡាករជម្រើសជាតិក្តី ។
រហូតមកទល់ពេលនេះកីឡាករកីឡាការិនីទាំង៥រូប កំពុងបង្កើនការហ្វឹកហាត់ដុសខាត់សមត្ថភាពកាន់តែខ្លាំង ដើម្បីឱ្យការចេញទៅប្រកួតលើកទី១ របស់់សហព័ន្ធប៊ូល និងប៉េតង់នេះបានទទួលជោគជ័យដូចនៅស៊ីហ្គេមឆ្នាំមុន ហើយចាប់ពីខែតុលាទៅការប្រមូលផ្តុំគ្នាធ្វើការហ្វឹកហាត់ នឹងមានសកម្មភាពកាន់តែផុសផុលថែមទៀត ៕
ចែករំលែកព័តមាននេះ